Biełarusy kupili tur na pali ciulpanaŭ, a ŭbačyli tolki zielaninu

Ahranomy pisali, što pryblizna ćvicieńnie pačniecca 23 krasavika.

Užo 24‑ha na palach byli pieršyja turysty, jakija nabyli prahramu ŭ kampanii «Anita Baj». Jak raspaviali ŭ turfirmie, rasčaravanyja ludzi ŭbačyli adnu zielaninu, skroź jakuju tolki miescami prabivalisia butony.

Emacyjny ryłz pra heta apublikavali sami pradstaŭniki «Anita Baj». Pavodle ich słoŭ, u «Znachodcy Paleśsia» nie papiaredzili arhanizataraŭ tura ab tym, što ciulpany jašče nie zaćvili.

— My ŭžo niekalki hadoŭ supracoŭničajem z hetaj ciapličnaj haspadarkaj. Kožny hod jany trymali nas u kursie pa terminach ćvicieńnia ciulpanaŭ. Kali byli niejkija karekciroŭki, my ŭnosili ich u našy płany, bo broni na ŭsie hrupy raźmiaščajucca jašče ŭ studzieni. Na žal, sioleta z boku haspadarki nie było nijakaj infarmacyi ab tym, što praz drennaje nadvorje ćvicieńnie budzie paźniejšym. My vyjechali zhodna z hrafikam, jany nas taksama čakali, vystavili rachunak na pieradapłatu. Na miescy turysty pačali aburacca: kvietki ž nie raspuścilisia. Pradstaŭnik haspadarki skazaŭ, što heta było naša rašeńnie jechać da ich. Karaciej, pierakłali ŭsiu adkaznaść na nas, — patłumačyła ŭ razmovie z Onlíner namieśnica dyrektara «Anita Baj» Hanna Słažanikina.

Pavodle słoŭ Hanny, mieniedžary turahienctva ŭvieś čas byli na suviazi sa «Znachodkaj Paleśsia». Jany daviedvalisia, ci ćvicie što-niebudź, i napiaredadni vyjezdu, 23 krasavika.

— Čamu vy nie paprasili ŭ haspadarki fota i videa, kab dakładna pierakanacca, što ciulpany ŭžo pryhoža ćvituć?

— Pakolki my ź imi pracujem nie pieršy siezon, usio ŭžo niejak było arhanizavana na daviery. My pamiatali, jak ludzi pracavali letaś i pazaletaś. Takich pytańniaŭ nikoli nie ŭźnikała.

Na nastupnyja dva tydni ŭ «Anita Baj» było zapłanavana kala dziesiaci turaŭ, jakija ŭklučajuć u siabie naviedvańnie ciulpanavych paloŭ. Najbližejšyja ŭžo admienieny, turystam pakul prapanujuć pačakać, kali ŭžo ŭsio stoadsotkava budzie jak na karcinkach. A što nakont kampiensacyj tym, chto zastaŭsia biez pryhožych fatahrafij?

— Učorašniaj hrupie my vierniem poŭny košt tura sumaj 150 rubloŭ. Usie vydatki pajezdki voźmiem na siabie, — adkazała Hanna Słažanikina.

Onlíner taksama źviazaŭsia z kiraŭnikom «Znachodki Paleśsia» Ramanam Špakom, u jakoha svaja viersija taho, što adbyłosia. Pavodle jaho słoŭ, kankretna hety turapieratar zanadta mocna zavysiŭ čakańni i sabie, i svaim klijentam. Usie astatnija naviedvalniki paloŭ całkam zadavolenyja ŭbačanaj karcinkaj.

— My vyroščvajem jak rannija, tak i poźnija sarty ciulpanaŭ. Nikoli nie byvała takoha, kab jany zaćvili adnačasova. A z-za taho, što dadzieny turapieratar naabiacaŭ svaim turystam «biaskrajnija pali ciulpanaŭ», jany, mahčyma, i zastalisia niezadavolenyja. Prosta zaraz da nas pryjazdžajuć turysty, ja ŭžo paprasiŭ supracoŭnikaŭ źbirać vodhuki. Pakul što nijakaha niehatyvu nie było. Učora taksama, akramia hrupy «Anita Baj», pryjazdžali ludzi, usie ŭ zachapleńni ad łakacyi, ad fotazon. U hetaha turapieratara, vierahodna, prosta zdaryłasia šumicha sa svaimi turystami, i ciapier jany vinu za jaje sprabujuć pierakłaści na nas.

Pavialičyć

Raman kaža, što haspadarka trymaje suviaź absalutna z usimi turahienctvami-partniorami. Tak, u svaich sacsietkach «Nachodka Paleśsia» dziela pryciahnieńnia ŭvahi vykarystoŭvaje minułahodnija videa i fota ciulpanaŭ, ale arhanizatary turaŭ zaŭsiody bačać realnuju karcinku. Jany ž prymajuć rašeńnie, jechać ci nie.

— Toje, što mieniedžary «Anita Baj» prosta patelefanavali supracoŭnikam i nie paprasili fota i videa — heta ich niedahlad. Usie astatnija turapieratary zapytvajuć [fota i videa]. Jość i bolš adkaznyja rabiaty, jakija dasyłajuć rabočyja hrupy, kab pahladzieć usio svaimi vačyma. Ale, paŭtarusia, pali nikoli nie zaćvitajuć całkam, na 120 hiektarach heta niemahčyma.

Ja ŭčora zajšoŭ u aŭtobus i ŭsim turystam «Anita Baj» skazaŭ, što kali im nie spadabałasia ekskursija, ja hatovy viarnuć hrošy (choć sam ich jašče nie atrymaŭ). Taksama hatovy ŭ luby inšy dzień zaprasić i pravieści ekskursiju, kali hetym razam niešta nie zadavoliła. Mnie padałosia, što ŭ aŭtobusie mierkavańni padzialilisia «50 na 50». Ja pasprabavaŭ zahładzić navat nie svoj kanflikt z turystami, ale ŭsio roŭna heta vyliłasia ŭ toje, u što vyliłasia.

— Kali ŭsio ž taki čakać takich paloŭ, jak na minułahodnich fota?

— Heta pryroda, tut dakładna skazać nielha. Treba padłoŭlivać momant. Zaraz rannija sarty zaćvili, poźnija jašče nie. Darečy, minułahodnija pryhožyja karcinki, jakija zaraz publikujucca, byli zrobleny turystami ŭ dakładna takich ža ŭmovach. U peŭnym rakursie jano mienavita tak i hladzicca, a pavierniešsia krychu ŭ bok — užo budzie pa-inšamu. Zaraz u pryvatnym paradku pryjazdžajuć turysty z fatohrafami — fota atrymlivajucca vydatnyja.

• 1
• 0
• 1
• 1
• 0
• 0
• 0
• 0