Brytanija stała pieršaj zachodniaj dziaržavaj, jakaja padtrymała ZŠA ŭ pastupovaj admienie zachodnich sankcyj suprać Rasii za ŭvarvańnie va Ukrainu.
Maštaby pasłableńniaŭ adnosna ścipłyja z-za paraŭnalna nievialikaha abjomu brytanskaj ekanomiki, adnak rašeńnie ŭrada Kira Starmiera maje palityčnaje značeńnie, piša Bi-bi-si.
ZŠA asłabili sankcyi suprać Kramla adrazu paśla taho, jak Iran u adkaz na napad zakryŭ Armuzski praliŭ i pazbaviŭ śviet 13% nafty i 17% hazu. Kab strymać rost suśvietnych cen, administracyja Donalda Trampa dazvoliła trecim krainam — pieradusim Indyi i Kitaju — kuplać rasijskuju naftu.
U paniadziełak Bieły dom užo treci raz praciahnuŭ «časovyja» pasłableńni, a viečaram taho ž dnia najbližejšy sajuźnik ZŠA — Vialikabrytanija — dałučyłasia da hetaj kampanii.
Brytanskija ŭłady dazvolili impart dyzielnaha paliva i avijacyjnaha kierasinu, vyrablenych z rasijskaj nafty ŭ trecich krainach, a taksama źniali abmiežavańni na akazańnie pasłuh dvum rasijskim hazavym prajektam: «Sachalin-2» i «Jamał ZPH». Ciapier brytanskija kampanii mohuć strachoŭvać i kredytavać pastaŭki zvadkavanaha hazu z Rasii ŭ trecija krainy, a taksama pieravozić jaho marskim šlacham.
Pasłableńnie amierykanskich i brytanskich sankcyj časova źmiakčyć enierhietyčny kryzis va ŭsim śviecie, pakolki častkova kampiensuje deficyt paliva, adnak hałoŭnymi bienieficyjarami stanuć Rasija, Kitaj i Indyja.
Da iranskaj vajny Rasija skaračała ekspart svajho hałoŭnaha tavaru i hublała dachody praz amierykanskija druhasnyja sankcyi suprać pakupnikoŭ rasijskaj nafty. Ich admiena dazvoliła Kramlu zarabić na vajnu suprać Ukrainy i załatać dzirku ŭ biudžecie.
Indyja, u svaju čarhu, takim čynam zmahła paźbiehnuć maštabnaha deficytu naftapraduktaŭ, bo ŭ krainie amal niama zapasaŭ syraviny, a zakuplaje jana jaje pieravažna ŭ Piersidskim zalivie.
U Kitaja zapasaŭ šmat, adnak jon taksama straciŭ klučavoha pastaŭščyka nafty z-za błakady Armuzskaha praliva, i rasijskaja nafta pryjdziecca jak nikoli darečy, pakolki schiemy jaje zakupak daŭno naładžanyja, a adnavić ich paśla admieny amierykanskich sankcyj možna chutka i biez prablem.
Kamientary