U Litvie adbyłasia maštabnaja ŭciečka ź dziaržaŭnaj bazy rejestraŭ. Mohuć paciarpieć i biełarusy

Havorka idzie pra danyja, źviazanyja ŭ asnoŭnym ź nieruchomaściu i jurydyčnymi asobami — heta infarmacyja, jakaja zvyčajna nie znachodzicca ŭ adkrytym dostupie, a dajecca tolki za płatu.

Dla palityčnych mihrantaŭ ź Biełarusi heta moža być pytańniem biaśpieki — ich adrasy i źviestki pra stvoranyja jurydyčnyja asoby dy ździełki mohuć stać viadomyja bolš, čym im samim chaciełasia b.

U rejestrach nieruchomaści adčuvalnaj infarmacyjaj mohuć być: 

• suviaź čałavieka z kankretnaj kvateraj, domam abo ŭčastkam; 
• adras abjekta;
• dola ŭłasnaści; 
• ipateka abo inšyja abciažarvańni; 
• historyja ździełak; 
• suviaź čałavieka ź jurydyčnaj asobaj ci arhanizacyjaj.

Centr rejestraŭ śćviardžaje, što nie byli raskryty telefony, elektronnyja adrasy, bankaŭskija rachunki, płaciažy za pasłuhi, dakumienty ździełak, sudovyja rašeńni, kadastravyja płany i inšyja prykładzienyja dakumienty. Pa ich viersii, idzie havorka pra infarmacyju z vypiski rejestra nieruchomaści. Ale navat takaja infarmacyja moža być adčuvalnaj, kali traplaje nie da adnaho lehalnaha karystalnika, a ŭ masivie — i ŭvohule nieviadoma kamu.

Śledstva ŭstanaviła, što da baz danych było bolš za 10 niezakonnych padklučeńniaŭ abo sprob dostupu. Hetyja ataki ździajśnialisia z-za miažy, i pry ich vykarystoŭvalisia taksama sistemy, jakija administrujucca inšymi dziaržaŭnymi strukturami.

Rasśledavańnie viadzie kryminalnaja palicyja Litvy sumiesna ź niekalkimi viedamstvami, u tym liku MUS, Ministerstvam justycyi i Departamientam dziaržaŭnaj biaśpieki.

Papiarednie acenienyja straty składajuć nie mienš za 111 tysiač jeŭra.

Paśla vyjaŭleńnia prablemy byli terminova pryniatyja miery:

• zabłakavali akaŭnty, praź jakija adbyvaŭsia dostup;
• abmiežavali dostup da sistem;
• uzmacnili kibierabaronu.

Pakul śpiecyjalisty nie dajuć asobnych rekamiendacyj dla hramadzian i kampanij, ale žycharoŭ zaklikajuć być aściarožnymi: nie adkryvać padazronyja spasyłki i nie daviarać paviedamleńniam ci zvankam, navat kali ŭ ich vykarystoŭvajucca asabistyja danyja.

Premjer-ministarka Litvy Inha Ruhinienie zajaviła, što situacyja vielmi surjoznaja, bo zakranaje nie tolki techničnuju biaśpieku, ale i davier ludziej da dziaržavy. Jana taksama ličyć, što kiraŭnik Centra rejestraŭ pavinien pakinuć svaju pasadu.

Padrabiaznaści spravy pakul nie raskryvajucca, kab nie naškodzić rasśledavańniu.

Pa danych Centra rejestraŭ, ludzi, čyje danyja mahli być zakranuty, zmohuć pravieryć heta praz samaabsłuhoŭvańnie Registrų centras abo ŭ adździaleńniach absłuhoŭvańnia. Asabliva varta sačyć za apaviaščeńniami tym, u kaho ŭ Litvie jość nieruchomaść, zarehistravanaja kampanija, asacyjacyja abo NKA.

• 1
• 0
• 1
• 3
• 0
• 1
• 0
• 0