Futboł pa-čornamu

Mundyjal moža stać asablivym: niezvyčajnuju hulniu na rodnaj ziamli zdolnyja pakazać afrykancy.

Ad 11 červienia da 11 lipienia ŭ Paŭdniovaj Afrycy projdzie 19‑y čempijanat śvietu pa futbole. Upieršyniu spabornictva takoha ranhu prymaje Čorny kantynient.

Z hetaj nahody i afrykanskich kamand na mundyjali budzie rekordna šmat — cełych šeść. Aproč PAR, udzieł voźmuć Hana, Nihieryja, Ałžyr, Kamierun, Kot‑dJIvuar.

Apošniuju kamandu ŭznačaliŭ viadomy šviedski śpiecyjalist Śvien‑Horan Eryksan. Ale «słanam» znoŭ nie pašancavała ź losavańniem. Druhi čempijanat zapar jany traplajuć u «hrupu śmierci».

Čatyry hady tamu kraina słanovaj kostki nie zmahła vyjści z hrupy, dzie trapilisia Hałandyja, Arhiencina i Sierbija. Sioleta fartuna padrychtavała im u supierniki Braziliju, Partuhaliju i KNDR. Adzinaja na¬dzieja — na najlepšaha bambardzira anhlijskaj premjer‑lihi Dzidźje Drahbu.

Afrykanskija zbornyja zvyčajna pakazvajuć niezvyčajny futboł — trochi bieśsistemny i karnavalny. Asałoda.

Paŭnočnyja karejcy na suśvietnaje pieršynstvo trapili tolki ŭ druhi raz. Upieršyniu jany ŭdzielničali ŭ čempijanacie 1966 hoda ŭ Anhlii. Zbornaja nieprafiesijanałaŭ vyklikała sapraŭdny šok u zaŭziataraŭ.

Spačatku karejcy prajhrali SSSR — 0:3 (dva hały tady zabiŭ budučy trenier zbornaj Biełarusi Eduard Małafiejeŭ). Potym zhulali ŭničyju z Čyli. A ŭ vyrašalnym hrupavym matčy absalutna niečakana pieramahli Italiju — 1:0. Na Apieninach taja hulnia i siońnia ličycca adnoj z najbolš dramatyčnych u historyi «skuadry adzury».

U čverćfinale karejcy sustrakalisia z partuhalcami i ŭžo na 24‑j chvilinie vyjhravali ź likam 3:0. Ale hienijalny Ejsiebijo zmoh pierałamać chod toj sustrečy.

Toj projhryš žachliva razzłavaŭ karejskaha dyktatara Kir Ir Siena. Amal u poŭnym składzie zbornaja była adpraŭlenaja ŭ kancłahiery. Tym nie mienš, heta byŭ pieršy pośpiech azijackaha futboła.

Intryha pieršynstva ŭ tym, jak zmoža padrychtavać arhiencincaŭ da matčaŭ adzin z najvialikšych futbalistaŭ XX stahodździa Dyjeha Maradona. U jahonym rasparadžeńni — najlepšy futbalist sučasnaści Lijanel Miesi. Ci zmohuć dźvie zorki ŭžycca razam?

Čempijony Jeŭropy ź Ispanii nikoli nie vyjhravali suśvietnaje pieršynstvo. Im chočacca złamać takuju sumnuju tradycyju. Anhličanie, niemcy, italjancy, brazilcy taksama nastrojvajucca na pieramohu.

Biełarusaŭ u Afrycy nie budzie. Tut niama ničoha niečakanaha. Nie budzie na pieršynstvie taksama i bližejšych susiedziaŭ — Rasii, Ukrainy, Polščy. Samaja blizkaja da nas kraina, jakaja pajedzie ŭ PAR, — Słavaččyna.

Cikava, što napiaredadni mundyjalu hadavancy Štanhie syhrali dźvie hulni ŭ Aŭstryi z kamandami‑ŭdzielnicami čempijanatu. Z Handurasam razyšlisia miram — 2:2, a voś u Paŭdniovaj Karei vyjhrali — 1:0. Takich vynikaŭ mahło b chapić dla vychadu z hrupy.

U lubym vypadku, navat bieź biełarusaŭ, nas čakaje miesiac jakasnaha futboła z afrykanskim kałarytam.

Źmicier Pankaviec

«Mužčynskaja hulnia, a nie balet»

Za kaho na čempijanacie śvietu buduć pieražyvać biełarusy? Apytańnie «NN».

Siarhiej Kryviec, futbalist zbornaj Biełarusi: «Italija. Uvohule budu za pryhožy futboł. A inšyja simpatyi ŭźniknuć ciaham čempijanatu».

Vital Silicki, dyrektar Biełaruskaha instytuta stratehičnych daśledavańniaŭ: «1. ZŠA. Kraina, dzie ja pražyŭ šeść hadoŭ i adbyŭsia jak prafiesijanał. 2. Słavakija. Prosta tam u mianie šmat siabroŭ i ich mova vielmi padobnaja da našaj».

Alhierd Bacharevič, litaratar, žyvie ŭ Hamburhu: «Deutschland, Deutschland ber alles. I, miarkuju, našy vyjhrajuć hety čempijanat. A jašče za Słavieniju, bo daŭno simpatyzuju hetaj krainie. I za KNDR — jana maje šaniec «adpomścić» partuhalcam za 1966 hod».

Lavon Barščeŭski, pierakładčyk: «Ź dziacinstva chvareju za Hiermaniju. Na hety raz taksama budu za ich».

Pavieł Sieviaryniec, sustaršynia BCHD: «Za anhličan. Pryhoža hulajuć. Padabajecca ichniaja vola da pieramohi. Bjucca da apošniaha. Ich futboł adpaviadaje majmu charaktaru, napeŭna».

Bahdan Arłoŭ, zaŭziatar, aŭtar biełaruska‑rasijskaha słoŭnika spartovych terminaŭ: «Za Ispaniju. Ja pa adukacyi ispanist. Krychu kryŭdna, što takaja prystojnaja zbornaja nie moža vyjhrać mundyjal. Złyja jazyki navat nazyvali ispanskuju zbornuju «futbolnymi impatentami». Minuły čempijanat Jeŭropy heta abvierh, budu čakać praciahu. Taksama budu zaŭzieć za ŭsich aŭtsajderaŭ, za siensacyi».

Andrej Chadanovič, paet: «Za charošy futboł. A tak simpatyzuju Anhlii i Arhiencinie».

Źmicier Busieł, prahramist: «Za Anhliju. Mnie padabajecca anhlijskaja premjer‑liha, uvohule anhlijski futboł. Da taho ž, daŭnieńka jany ŭžo nie vyjhravali čempijanat śvietu. Budu taksama pieražyvać za Arhiencinu, za Maradonu».

Alaksiej Janukievič, staršynia Partyi BNF: «Za anhličan. Hetaja kraina rodapačynalnica futboła, ludzi tam prosta žyvuć futbołam. Anhličanam daŭno nie šancuje na čempijanatach śvietu, i mnie chočacca, kab im narešcie pašancavała».

Ivan Šyła, palityk z Salihorska: «Za anhličan. Uvieś čas chvareju za zbornuju Anhlii, za «Mančester Junajted». Mnie kryŭdna, što hetaja zbornaja daŭno ničoha nie vyjhravała».

Alaksandr Starykievič, žurnalist: «Adnoj takoj kamandy nie budzie. Kali b byli biełarusy, to heta adna sprava. Tady ciabie prosta padkidvaje ŭvierch u paryvie zaŭziatarskaj žarści. Tut ža budu hladzieć futboł spakojna. Moža, chaciełasia b, kab Anhlija niešta vyjhrała. Ale kali i nie vyjhraje, to ničoha strašnaha».

Aleh Ivanoŭski, redaktar časopisa kiwi.mag: «Budu chvareć za zbornuju Hiermanii. Mnie padabajecca ich uparty styl, na miažy hrubijanstva. U vykanańni niemcaŭ futboł bolš padobny da sapraŭdnaj mužčynskaj hulni, a nie da baleta. Nie pamiataju takich matčaŭ, kali b jany źmirylisia, apuścili ruki. Davoli simpatyčna vyhladaje Arhiencina, chaciełasia b, kab Maradona dadaŭ da svaich tytułaŭ niešta istotnaje z hetaha čempijanatu. Pry takim niełahičnym, ale mocnym padbory hulcoŭ».

Apytaŭ Źmicier Pankaviec

• 0
• 0
• 0
• 0
• 0
• 0
• 0
• 0