Zaviaščaŭ Karynie Šulak 50 miljonaŭ, a jaje baćka lotaŭ ź im na viertalocie za miesiac da aryštu. Što jašče stała viadoma z fajłaŭ Epštejna

Chto takija Džefry Epštejn i Karyna Šulak

Džefry Epštejn — amierykanski finansist, abvinavačany ŭ arhanizacyi sietki seksualnaj ekspłuatacyi, u tym liku niepaŭnaletnich. U 2008 hodzie jon užo byŭ asudžany za ŭciahvańnie padletka ŭ prastytucyju i pravioŭ u turmie 13 miesiacaŭ. U 2019 hodzie, paśla novaha aryštu pa abvinavačańni ŭ seksualnym handli ludźmi, Epštejn skončyŭ žyćcio samahubstvam u kamiery ńju-jorkskaj turmy.

Publikacyja masivaŭ dakumientaŭ pa jaho spravie stała mahčymaj paśla zakona, padpisanaha prezidentam ZŠA Donaldam Trampam u 2025 hodzie. Materyjały, siarod jakich akazałasia finansavaja spravazdačnaść bankaŭ Deutsche Bank i JP Morgan Chase, raskryli suviazi Epštejna z suśvietnymi znakamitaściami i palitykami.

Karynie Šulak 36 hadoŭ. Jana skončyła škołu ŭ Minsku i vučyłasia ŭ Biełaruskim dziaržaŭnym miedycynskim univiersitecie. U ZŠA pryjechała ŭ 2009 hodzie, dzie nieŭzabavie sustreła Epštejna. ŚMI nazyvali jaje addanaj dziaŭčynaj, jakaja zastałasia ź finansistam paśla jaho pieršaha turemnaha terminu. Pavodle infarmacyi The New York Times, Karyna Šulak była apošnim čałaviekam, jakomu Epštejn telefanavaŭ pierad śmierciu.

Pavialičyć

Ułasnaść na astravach, ranča i piarścionak

Siarod apublikavanych Ministerstvam justycyi dakumientaŭ jość trastavaje pahadnieńnie, padpisanaje Džefry Epštejnam 8 žniŭnia 2019 hoda — usiaho za dva dni da jaho samahubstva ŭ turemnaj kamiery. Zhodna z analizam ABC News, biełaruska Šulak — hałoŭny bienieficyjar jaho majomaści. U dakumientach paznačana, što Epštejn zaviaščaŭ joj 50 miljonaŭ dalaraŭ. Ale hrošy — heta tolki častka spadčyny. Karynie taksama pavinny byli adyści:

• ranča Epštejna Zorro ŭ Ńju-Mieksika;
• jaho ŭłasnaść na skandalna viadomym vostravie Litł-Sient-Džejms i susiednim Hrejt-Sient-Džejms;
• kvatera ŭ adnym z samych prestyžnych rajonaŭ Paryža kala Tryumfalnaj arki;
• majontak u Pałm-Bič;
• taŭnchaus u Vierchnim Ist-Sajdzie Manchetena.

Taksama ŭ tastamiencie zhadvajecca, što Šulak pavinna była atrymać šyrokuju kalekcyju juvielirnych upryhažeńniaŭ, uklučajučy piarścionak z bryljantam amal na 33 karaty. Amierykanskaje vydańnie adznačaje, što ŭ rukapisnych natatkach na palach dakumienta Epštejn paznačyŭ, što pieradaŭ kaštoŭnaść «u čakańni šlubu».

Pieravody ŭ Minsk i viertalot nad Ńju-Jorkam

Paśla apublikavańnia pieršaj častki «fajłaŭ Epštejna» ŭ śniežni stała viadoma pra dva jahonyja pieravody ŭ Minsk u 2013 hodzie na ahulnuju sumu 30 tysiač dalaraŭ. Tady imia atrymalnika było schavana, viadomy byŭ tolki jaho adras — vulica Karyckaha ŭ Minsku.

U novaj publikacyi bolš detalaŭ: u płaciežnym daručeńni ad 16 kastryčnika 2013 hoda na sumu 20 000 dalaraŭ u hrafie «Bienieficyjar» paznačana imia: Chouliak Fedor (Šulak Fiodar). Hrošy pastupili na rachunak u «Technabanku».

Pavialičyć

Dniom raniej, 15 kastryčnika 2013 hoda, Karyna adpraviła mierkavanaj pamočnicy Epštejna list z bankaŭskimi rekvizitami. U hrafie «Tema» byŭ kamientaryj: «Heta bankaŭski rachunak majho baćki».

U novych fajłach jość infarmacyja pra jašče jak minimum dźvie raty. 10 červienia 2014 hoda z rachunku Epštejna ŭ toj ža «Technabank» Fiodaru Šulaku było adpraŭlena 25 000 dalaraŭ.

15 krasavika 2016 hoda na elektronnuju skryniu Epštejna pryjšoŭ list z tekstam: «Pieraviała hrošy baćkam. Dziakuj tabie vialiki!!!» U im taksama jość układańnie — skan kvitancyi, jaki paćviardžaje, što Karyna Šulak pieraličyła baćku 25 000 dalaraŭ.

Pavialičyć

Takim čynam, tolki pavodle apublikavanych dakumientaŭ ahulnaja suma, pieraviedzienaja siamji Šulak u Biełaruś, składaje nie mienš za 100 tysiač dalaraŭ.

Biznes-kłas i viertalot za miesiac da aryštu

Baćki Karyny — Fiodar i Taćciana — nie tolki atrymlivali hrošy sa Złučanych Štataŭ Amieryki, ale i naviedvali Epštejna. Raschody na pieraloty braŭ na siabie bok, jaki prymaŭ.

Adzin ź vizitaŭ datujecca letam 2012 hoda. Kvitki byli kuplenyja praz ahienctva American Express Travel. Ź pierapiski vidać, što Fiodar Šulak vylecieŭ ź Minska ŭ Maskvu, a adtul — u Ńju-Jork 8 žniŭnia 2012 hoda. Zvarotny rejs byŭ zapłanavany na 20 žniŭnia. Pamočniki Epštejna ŭdakładniali: «Baćka Karyny zabraniravany na toj ža rejs, što i jaje mama».

Taćciana i Fiodar Šulak lotali ŭ Amieryku i praź piać hadoŭ. U dakumientach jość kvitki na ich imiony ŭ biznes-kłas na rejs «Aerafłota» Ńju-Jork — Maskva — Minsk ad 12 śniežnia 2017 hoda.

12 červienia 2019 hoda — mienš čym za miesiac da aryštu finansista — Fiodar Šulak taksama znachodziŭsia ŭ ZŠA. Zhodna z dakumientami, jon razam z Epštejnam i jašče dvuma pasažyrami lotaŭ nad Ńju-Jorkam na viertalocie Sikorsky. Jany startavali ź placoŭki na 34‑j vulicy ŭ Ńju-Jorku i pryziamlilisia ŭ aeraporcie na Łonh-Ajlendzie.

«Z pavahaj, mama i tata!»

Dakumienty śviedčać, što adnosiny pamiž siamjoj Šulak i amierykanskim finansistam byli davierlivymi. Baćki Karyny vinšavali Epštejna sa śviatami i dniom naradžeńnia.

U archivie jość list, adpraŭleny 20 studzienia 2014 hoda z elektronnaj skryni Fiodara Šulaka dačce, jaki jana ŭ toj ža dzień pierasłała Epštejnu. Tema paviedamleńnia «Z Dniom Naradžeńnia Jeffrey!». U tekście lista pa-anhlijsku napisana: «Ad maich baćkoŭ». Da jaho taksama była prymacavanaja spasyłka na vinšavalnuju karcinku, raźmieščanuju na rasijskim resursie Radikal.ru, jaki ŭžo nie pracuje.

Epštejn tady emacyjna adkazaŭ Karynie: «Skažy im, što jany padaryli mnie ciabie, heta najlepšy padarunak».

U archivie jość jašče adno vinšavańnie, jakoje Fiodar Šulak adpraviŭ Epštejnu ŭ 2017 hodzie. Jaho tekst byŭ na anhlijskaj movie: «Džefry, vinšujem ciabie z dniom naradžeńnia i žadajem mocnaha zdaroŭja, ščaścia i dušeŭnaha spakoju. Zaŭsiody budź aptymistam, vier u budučyniu, i ŭsio budzie dobra. Z pavahaj, mama i tata! Ź luboŭju, Karyna!»

Sama Karyna Šulak admaŭlajecca što-niebudź kamientavać žurnalistam.

• 2
• 0
• 1
• 5
• 3
• 0
• 0
• 2