Radyjeaktyŭny impłant u mozhu strachuje ad viartańnia rakavaj puchliny. Ludzi vyžyvajuć čaściej

Mietastazy ŭ mozhu zastajucca adnym z samych ciažkich uskładnieńniaŭ ankałahičnych zachvorvańniaŭ. Paśla vydaleńnia puchliny pacyjentam zvyčajna davodzicca čakać niekalki tydniaŭ, pakul arhanizm adnovicca nastolki, kab možna było pačać pramianiovuju terapiju. Za hety čas rakavyja kletki mohuć znoŭ pačać raści, a lačeńnie asnoŭnaha zachvorvańnia ŭ inšych orhanach niaredka prypyniajecca.

Jak piša The Wall Street Journal, amierykanskija navukoŭcy prapanujuć sposab paźbiehnuć hetaha niebiaśpiečnaha pierapynku. Vyniki novaha daśledavańnia pakazali, što nievialiki radyjeaktyŭny impłant GammaTile, jaki ŭstaloŭvajuć niepasredna padčas apieracyi, moža značna źnizić ryzyku recydyvu i pavialičyć praciahłaść žyćcia pacyjentaŭ.

GammaTile dazvalaje pačać apramianieńnie adrazu paśla vydaleńnia puchliny. Impłant ujaŭlaje saboj tonkuju płaścinku pamieram prykładna z paštovuju marku. Paśla vydaleńnia puchliny niejrachirurh vykładvaje takimi płaścinkami ścienki ŭtvoranaj paražniny. Pry nieabchodnaści ich možna padrazać tak, kab jany adpaviadali jaje konturam.

Płaścinki składajucca z kałahienu i ŭtrymlivajuć radyjeaktyŭny materyjał, jaki pastupova vypramieńvaje vysokuju dozu radyjacyi mienavita ŭ tych tkankach, dzie z najbolšaj imaviernaściu mohuć zastacca adzinkavyja rakavyja kletki. Praź niekalki tydniaŭ radyjeaktyŭnaść praktyčna źnikaje, a sam materyjał rassmoktvajecca ŭ arhaniźmie. Pry hetym ustanoŭka impłanta pavialičvaje praciahłaść apieracyi ŭsiaho na niekalki chvilin.

Pavialičyć

Efiektyŭnaść mietadu acanili ŭ randamizavanym daśledavańni z udziełam 230 čałaviek. Amal dźvie treci pacyjentaŭ, jakim ustalavali GammaTile, byli žyvyja praz dva hady paśla lekavańnia. U hrupie sa standartnaj paślaapieracyjnaj pramianiovaj terapijaj hety pakazčyk skłaŭ prykładna adnu treć.

Asabliva prykmietnaj akazałasia roźnica ŭ častacie viartańnia puchliny ŭ miescy apieracyi. Siarod pacyjentaŭ ź impłantami recydyŭ zafiksavali tolki ŭ 1% vypadkaŭ. Pry tradycyjnym padychodzie puchlina viartałasia ŭ 12% pacyjentaŭ.

Zhodna z vynikami daśledavańnia, ahulny ŭzrovień biaśpieki novaha mietadu byŭ supastaŭny sa standartnaj pramianiovaj terapijaj. Razam z tym daśledčyki zaŭvažyli niekatoraje pavieličeńnie kolkaści vypadkaŭ raspaŭsiudžvańnia rakavych kletak u śpinnamazhavuju vadkaść (9,7% suprać 3%), adnak hetaja roźnica nie była pryznana statystyčna značnaj i nie paŭpłyvała na ahulnuju pazityŭnuju acenku mietadu miedycynskaj supolnaściu.

Śpiecyjalisty adznačajuć, što adnoj z hałoŭnych pieravah technałohii stała mahčymaść paźbiehnuć praciahłaha čakańnia paśla apieracyi. U hety pieryjad pacyjenty časta vymušanyja spyniać chimijaterapiju, tamu rak u inšych častkach arhanizma moža praciahvać raźvivacca biez naležnaha kantrolu.

Niahledziačy na abnadziejlivyja vyniki, šyrokaje raspaŭsiudžańnie mietodyki moža zaniać čas. Impłanty GammaTile užo dazvolenyja da vykarystańnia ŭ ZŠA. Nieabchodnaść ciesnaj kaardynacyi pamiž roznymi adździaleńniami balnicy nazyvajuć bazavaj umovaj dla paśpiachovaha ŭžyvańnia technałohii.

Pry hetym daśledavańni technałohii praciahvajucca. Ciapier navukoŭcy vyvučajuć jaje efiektyŭnaść u pacyjentaŭ z hlijabłastomaj — adnoj z samych ahresiŭnych formaŭ raku mozhu, jakaja raźvivajecca niepasredna ŭ tkankach mozha, a nie ŭźnikaje ŭ vyniku raspaŭsiudžvańnia puchliny ź inšych orhanaŭ.

• 3
• 0
• 0
• 0
• 0
• 0
• 0
• 0