Ułady Kyrhyzstana buduć patrabavać vydačy Bakijeva praź mižnarodnyja sudy
Pra heta zajaviŭ namieśnik staršyni časovaha ŭrada Kyrhyzstana Azimbiek Bieknazaraŭ infarmacyjnamu ahienctvu 24.kg u adkaz na aficyjnuju admovu Biełarusi vydać skinutaha prezidenta.
Pavodle słoŭ Bieknazarava, pra toje, što rašeńnie budzie mienavita takim, «było viadoma z samaha pačatku». «Jany spasyłajucca, što heta palityčnaja sprava. Ale ž my asudžajem nie samoha Kurmanbieka Bakijeva, a chočam tolki pryciahnuć jaho da adkaznaści za śmierć 90 maładych chłopcaŭ. Ja jašče ranicaj kazaŭ hienprakuroru, kab jon daŭ tłumačeńnie ŭ presie. Raz jon hetaha jašče nie zrabiŭ, to, napeŭna, zaŭtra vystupić z adpaviednaj zajavaj», — skazaŭ namieśnik kiraŭnika časovaha ŭrada Kyrhyzstana.
Situacyju taksama prakamientavać namieśnik staršyni časovaha ŭrada Amurbiek Tekiebajeŭ.
«Ułada budzie mianiacca i ŭ Kyrhyzstanie, i ŭ Biełarusi, ale našy patrabavańni ab vydačy Kurmanbieka Bakijeva zastanucca niaźmiennymi»,
— zajaviŭ jon infarmahienctvu 24.kg.
Pavodle słoŭ Tekiebajeva, admova ekstradavać skinutaha 7 krasavika prezidenta Kyrhyzstana, niahledziačy na nastojlivyja patrabavańni časovaha ŭrada, «nie ździŭlaje i całkam pradkazalnaja».
«Dla Łukašenki heta byŭ palityčny chod.
Ja maju na ŭvazie, što jon daŭ prytułak u siabie Bakijevu i zajaŭlaŭ, što jon lehitymny prezident. Uvieś čas kazaŭ pra sumnieŭny status časovaha ŭrada. Ale ja jašče raz paŭtaraju: my budziem i nadalej źviartacca da spadara Łukašenki z patrabavańniem vydać nam Bakijeva, kab tut, u Kyrhyzstanie, addać jaho pad sud», — padkreśliŭ Tekiebajeŭ.
Skinuty prezident Kyrhyzstana Kurmanbiek Bakijeŭ znachodzicca ŭ Biełarusi z 19 krasavika pavodle zaprašeńnia Alaksandra Łukašenki. Zapyt na vydaču Bakijeva i nieabchodnyja dla hetaha dakumienty pastupili ŭ Hienieralnuju prakuraturu Biełarusi ŭ dvaccatych čysłach maja.
Viečaram 15 červienia stała viadoma, što biełaruskija ŭłady admovilisia vydać Bakijeva časovamu ŭradu Kyrhyzstana. «Hienieralnaj prakuraturaj pakinuty biez zadavalnieńnia zapyt Hienprakuratury Kyrhyzstana ab vydačy Bakijeva», — paviedamiŭ BiełaPAN načalnik adździeła infarmacyi i suviaziej z hramadskaściu Hienprakuratury Piotr Kisialoŭ. Pryčynu takoha rašeńnia jon nie nazvaŭ.
Pavodle słoŭ Kisialova, adkaz na zapyt kirhizskaha boku byŭ nakiravany pa pošcie jašče 10 červienia.
Ciapier čytajuć
«Chaču ŭziać intervju» — «Nie» — «Davajcie ja vas sfatahrafuju» — «Nie». Bialacki raskazaŭ pra sustreču ŭ kałonii z Pratasievičam4
Kamientary