Kampanija Johnson & Johnson stamiłasia sudzicca praź nibyta kancerahiennyja dziciačyja prysypki i prapanavała adkupicca

Prapanavanaje pahadnieńnie pavinna pakłaści kaniec šmathadovym sudovym raźbiralnictvam, jakija niehatyŭna adbivalisia na dziejnaści kampanii. Pry hetym Johnson & Johnson praciahvaje nastojvać, što jaje pradukcyja nie vyklikaje ankałahičnych zachvorvańniaŭ. U kampanii taksama nahadali, što skład papularnaj dziciačaj prysypki ŭžo byŭ źmienieny.

Vice-prezident kampanii pa sudovych pytańniach Eryk Haas zajaviŭ, što abvinavačańni nie majuć navukovaha abhruntavańnia. Pavodle jaho słoŭ, kampanija pahadžajecca na vypłatu kampiensacyj nie tamu, što pryznaje svaju vinu, a kab kančatkova zakryć hetaje pytańnie i zasiarodzicca na raspracoŭcy novych lekaŭ i miedycynskich vyrabaŭ.

Prapanova tyčycca kala 76 tysiač pazovaŭ, što składaje bolšaść usich niavyrašanych spraŭ, źviazanych z pradukcyjaj na asnovie talku. Johnson & Johnson płanuje vypłacić da 3 miljardaŭ dalaraŭ u nastupnym hodzie, a astatniuju sumu — nie raniej za 2028 hod.

Kab pahadnieńnie nabyło siłu, jaho pavinny padtrymać jurydyčnyja firmy, jakija pradstaŭlajuć nie mienš jak 95 pracentaŭ pazoŭnikaŭ pa spravach ab raku jaječnikaŭ u fiederalnych sudach i sudach štataŭ.

Kampanija padkreślivaje, što ŭpeŭnienaja ŭ svajoj racyi i ličyć, što mahła b vyjhrać bolšaść sudovych pracesaŭ, jak heta ŭžo adbyvałasia ŭ mnohich papiarednich vypadkach.

Padraździaleńnie Kenvue, jakoje było vyłučana sa składu Johnson & Johnson u 2022 hodzie, ciapier adkazvaje za prodaž dziciačaj prysypki Johnson's Baby Powder za miežami Paŭnočnaj Amieryki. Kampanii Kenvue taksama naležać takija viadomyja brendy, jak Band-Aid, Listerine i Calpol.

Pieršyja pazovy suprać Johnson & Johnson pačali pastupać jašče ŭ 2009 hodzie. Pazoŭniki śćviardžali, što talk u pradukcyi kampanii byŭ zabrudžany aźbiestam, jaki źjaŭlajecca viadomym kancerahienam. Aźbiest moža traplać u talk, pakolki radoviščy hetych minierałaŭ niaredka znachodziacca pobač.

U pačatku lipienia fiederalny sud ZŠA pryniaŭ rašeńnie na karyść kampanii, adznačyŭšy, što asobnym pazoŭnikam ciažka dakazać niepasrednuju suviaź pamiž vykarystańniem talku i raźvićciom raku jaječnikaŭ.

Johnson & Johnson paśladoŭna admaŭlaje ŭsie abvinavačańni i zajaŭlaje, što šmatlikija daśledavańni paćviardžajuć biaśpieku talku, adsutnaść u im aźbiestu i niedakazanaść jaho suviazi z uźniknieńniem raku.

U 2022 hodzie kampanija abviaściła, što całkam spyniaje vytvorčaść i prodaž dziciačaj prysypki na asnovie talku va ŭsim śviecie. Zamiest jaje ciapier vypuskajecca pradukt na asnovie kukuruznaha kruchmału.

• 0
• 0
• 2
• 0
• 1
• 0
• 0
• 0