Ratavalniki znajšli cieła alpinista Nirmała Purdžy. Jon zahinuŭ pad łavinaj u Pakistanie
Jon za 189 dzion uzyšoŭ na ŭsie 14 vaśmitysiačnikaŭ — najvyšejšych viaršyniaŭ śvietu.
Alpijski kłub Pakistana paviedamiŭ, što ratavalniki znajšli cieła brytanska-niepalskaha alpinista Nirmała «Nimsa» Purdžy. Raniej kampanija Elite Expeditions, u jakoj jon pracavaŭ hidam, paćvierdziła jaho hibiel razam jašče ź dzieviaćciu alpinistami, jakija zahinuli ŭ vyniku schodu łaviny na hary Broŭd-Pik u pakistanskim Karakarumie, piša Bi-bi-si.
Śmierć Purdžy taksama paćvierdziŭ premjer-ministr Niepała Balendra Šach, zajaviŭšy, što «trahičnaja hibiel šaści niepalcaŭ i čatyroch inšych zamiežnych alpinistaŭ, u tym liku suśvietnaha rekardsmiena Nirmała Purdžy, u harach Karakaruma ŭ Pakistanie ŭzrušyła nas».
Purdžy było 43 hady. Jon naradziŭsia ŭ Niepale, słužyŭ u brytanskaj armii i atrymaŭ suśvietnuju viadomaść u 2019 hodzie, kali razam ź inšymi alpinistami za 189 dzion uzyšoŭ na ŭsie 14 vaśmitysiačnikaŭ — najvyšejšych viaršyniaŭ śvietu.
Praz dva hady vyjšaŭ dakumientalny film Netflix «14 viaršyniaŭ: niama ničoha niemahčymaha», pryśviečany jaho padarožžu, jaki i prynios jamu šyrokuju viadomaść.
Naiła Kijani, pres-sakratar Alpijskaha kłuba Pakistana, jaki ŭdzielničaje ŭ ratavalnaj apieracyi, raskazała, što Purdža ŭznačalvaŭ mnohija ekśpiedycyi, u jakich jana brała ŭdzieł.
Vysoka aceńvajučy jaho lidarskija jakaści, jana acharaktaryzavała jaho jak «vielmi vopytnaha i biasstrašnaha alpinista».
Prync Uelski zajaviŭ, što «ščyra zasmučany navinoj pra trahičnuju hibiel» Purdžy, jaki, pavodle jaho słoŭ, «hodna słužyŭ» u vojsku, pierš čym «stać adnym z najvialikšych alpinistaŭ».
Ministr abarony Vialikabrytanii Ues Strytynh napisaŭ u sacyjalnaj sietcy X: «Nievierahodna sumna daviedacca pra hibiel Nirmała (Nimsa) Purdžy i tych, z kim jon ździajśniaŭ uzychodžańnie».
Purdža i ŭdzielniki ekśpiedycyi, jakuju jon uznačalvaŭ, zahinuli na 12‑j pa vyšyni viaršyni śvietu paśla schodu łaviny na piku vyšynioj 8047 mietraŭ u hornym masivie Karakarum.
Raniej pakistanskija ŭłady paviedamili, što byli znojdzieny cieły troch alpinistaŭ z hetaj ekśpiedycyi — amierykanca Mełory Hiejsa, Nadziry Achmied Abduły Al-Charci z Amana i Pura Bachadura Hurunha ź Niepała.
Purdža prasłužyŭ u brytanskaj armii 16 hadoŭ, ź jakich 10 — u śpiecnazie. U 2018 hodzie karaleva Lizavieta ŭznaharodziła jaho ordenam MBE za dasiahnieńni ŭ ekstremalnym vysakahornym alpiniźmie.
Purdža žyŭ razam z žonkaj i trochhadovaj dačkoj u hrafstvie Chempšyr na poŭdni Anhlii.
Paśla ekśpiedycyi 2019 hoda jon skazaŭ: «Heta byli źniasilvajučyja, ale vielmi pavučalnyja šeść miesiacaŭ, i ja spadziajusia, što dakazaŭ: pry dastatkovaj rašučaści, viery ŭ siabie i pazityŭnym nastroi mahčyma ŭsio».
U svaim apošnim dopisie ŭ X, apublikavanym u paniadziełak, jon napisaŭ, što pieršapačatkova nie płanavaŭ uzychodzić na Broŭd-Pik.
«Pieršapačatkovy płan byŭ padniacca tolki na G2», — napisaŭ Purdža, majučy na ŭvazie Hašerbrum II — jašče adnu viaršyniu ŭ hornym chrybcie Karakarum.
Adnak niepasredna pierad adjezdam u Pakistan jon zrazumieŭ, što, kali zdoleje pakaryć i Broŭd-Pik, jamu zastaniecca ŭzyści tolki jašče na adnu haru, kab stać «pieršym čałaviekam u historyi, jaki dvojčy pakaryŭ usie 14 vaśmitysiačnikaŭ. Biez kisłarodu».
«Heta nie było zapłanavana, — napisaŭ Purdža. — Ale mahčymaści nie kryčać: jany šepčuć tym, chto ŭžo pracuje ŭ cišyni. Broŭd-Pik, ja nie prašu ničoha, akramia biaśpiečnaha ŭzdymu i spusku. Ja nikoli nie staŭlusia ni da adnaho ŭzychodžańnia jak da lohkaj prahułki».
Broŭd-Pik ličycca adnoj z samych składanych hor dla alpinistaŭ. Pieršaje paśpiachovaje ŭzychodžańnie adbyłosia ŭ 1957 hodzie, kali viaršyniu pakaryła aŭstryjskaja ekśpiedycyja.
Z taho času na hetuju haru ŭzyšli mnohija, adnak dziasiatki ludziej zahinuli.
Adnym z samych śmiarotnych hadoŭ dla Broŭd-Pika staŭ 2013 hod, kali było zafiksavana nie mienš za šeść śmiarotnych vypadkaŭ.
Ciapier čytajuć
I pra realnych bandytaŭ, i pra kryvarukaha Kościu-plitačnika, i pra seks u ciahniku. Žurnalistka z Homiela napisała knihu — čytać jaje strašna i śmiešna66
Kamientary