Kvatery ŭ Minsku na druhasnym rynku padaraželi na 27% z pačatku hoda
Na staličnym rynku kvater za pieršaje paŭhodździe było zarehistravana 6244 ździełki, što na 17% mienš u paraŭnańni z takim ža pieryjadam minułaha hoda. Pry hetym siaredni košt kvadratnaha mietra na druhasnym rynku vyras na 27%, piša Office Life.
Ceny na kvatery praciahvajuć raści na fonie abmiežavanaj prapanovy. Ciapier na rynku nazirajecca dysbałans pamiž kolkaściu prapanavanych kvater i tym, što pakupniki hatovyja nabyvać.
Siaredni košt kvadratnaha mietra na «druhasnym rynku» pavialičyŭsia za pieršaje paŭhodździe na 420—470 dalaraŭ u zaležnaści ad kolkaści pakojaŭ. Jak adznačajuć ekśpierty, na rost cen upłyvajuć niekalki faktaraŭ: pavieličeńnie dachodaŭ nasielnictva na 7,9%, dastupnyja kredyty paśla źnižeńnia staŭki refinansavańnia, a taksama stabilny kurs biełaruskaha rubla.
Na rost koštaŭ paŭpłyvała i skaračeńnie prapanovy. Za hod kolkaść kvater na druhasnym rynku źmienšyłasia z 6,8 tys. da 4,5 tys.
U cełym u studzieni — červieni hetaha hoda pakupniki zapłacili za kvatery 689,8 młn dalaraŭ. Heta na 5% bolš, čym hodam raniej. Pry hetym ahulnaja płošča nabytaha žylla źmienšyłasia na 17% i skłała 325,6 tys. kv. m.
Jak adznačyli ŭ Nacyjanalnym kadastravym ahienctvie, u pieršym paŭhodździ prykmietna źniziŭsia popyt na žyllo ŭ sučasnych damach, pabudavanych paśla 2020 hoda. Ich dola ŭ ździełkach źmienšyłasia z 30% da 25%. Na pieršasnym rynku viarnuŭsia zvyčajny ŭzrovień — 9—12% ad ahulnaj kolkaści apieracyj kupli-prodažu.
Što datyčycca struktury staličnaha rynku žylla, to ŭ druhim kvartale na «druhasnym rynku» 44% ździełak pryjšłosia na adnapakajovyja kvatery, 35% apieracyj byli zarehistravanyja z «dvuškami», 18% — z trochpakajovymi kvaterami. Padobnaja situacyja była i ŭ studzieni — sakaviku.
A voś na pieršasnym rynku 77% ździełak u krasaviku — červieni zaklučyli na adnapakajovyja kvatery. Praŭda, u paraŭnańni ź pieršym kvartałam ich kolkaść źniziłasia na 10%.
Za druhi kvartał hetaha hoda ŭ Minsku pradali 13 kvater daražej za 1 młn rubloŭ. Samyja darahija kvatery stalicy znachodzilisia na vulicach Vitala Ćvirki, Hrybajedava, Kirava, Kisialova, Novavilenskaj, Ratamskaj, Smalačkova i Staražoŭskaj.
Ciapier čytajuć
Kolkaść achviar vybuchu ŭ maskoŭskim elitnym restaranie na jubilei hienierała, jaki kamandavaŭ nastupam na Kijeŭ ź Biełarusi ŭ 2022-m, vyrasła da piaci čałaviek44
Kamientary
[Zredahavana]