Miadźviedzieŭ zaklikaŭ Biełaruś «nie stvarać takich situacyj»
Pra heta jon padčas videakanfierencyi z udziełam staršyni praŭleńnia «Hazproma» Alaksieja Milera.
Dźmitryj Miadźviedzieŭ raźličvaje, što Biełaruś budzie «dakładna vykonvać svaje abaviazacielstvy» ŭ hazavaj śfiery. Pra heta prezident Rasii, jaki znachodzicca ŭ Kanadzie, zajaviŭ 25 červienia padčas videakanfierencyi z udziełam staršyni praŭleńnia «Hazproma» Alaksieja Milera. Frahmienty mierapryjemstva pakazaŭ kanał «Viesti 24».
«Dobra, što kanflikt uładžany, tamu što zaŭsiody pravilna zaviaršać takoha kštałtu mierapryjemstvy jak maha chutčej, — skazaŭ Miadźviedzieŭ. — Biełaruski bok raspłaciŭsia. Heta dobra. Chacia dziela spraviadlivaści treba pryznać, što im heta treba było zrabić raniej, a nie stvarać prablemy, źbirać daŭhi i ŭ kančatkovym vyniku nie stvarać takich situacyj».«Ja spadziajusia, što jany buduć bolš abačlivyja i buduć dakładna vykonvać svaje kantraktnyja abaviazacielstvy», — zajaviŭ rasijski kiraŭnik.
25 červienia na naradzie z uradam, jakaja była pryśviečana supracoŭnictvu z KNR, Alaksandr Łukašenka zajaviŭ, što daje Maskvie sutki na pahašeńnie ŭ poŭnym abjomie zapazyčanaści za tranzit hazu.
«Jašče raz papiaredžvaju ŭrad: niavypłata «Hazpromam» u poŭnym abjomie pasłuh u najbližejšyja sutki pavinna pryvieści da spynieńnia ŭsialakich pasłuh dla Rasijskaj Fiederacyi pa transparciroŭcy vuhlevadarodnaj syraviny — nafty i hazu», — skazaŭ Łukašenka.
Alaksiej Miler u chodzie kanfierencyi skazaŭ Miadźviedzievu, što dapaŭnieńni da kantrakta pa ŭmovach tranzytu rasiejskaha hazu praź Biełaruś na 2010 hod užo ŭzhodnienyja, ale nie padpisanyja: «My padpišam hety dakument u bližejšy čas. Apłata za tranzit da ciapierašniaha času rasiejskim bokam, «Hazpromam», ažyćciaŭlałasia pa bazavaj staŭcy, jakaja adlustravanaja ŭ kantrakcie, padpisanym u śniežni 2006 hoda. U adpaviednaści z hetym kantraktam, kali niama dapaŭnieńnia, jak u našym vypadku, na biahučy hod, to dziejničaje bazavaja staŭka 1 dalar 45 centaŭ za tysiaču kubamietraŭ na 100 kiłamietraŭ».
Dźmitryj Miadźviedzieŭ adreahavaŭ na heta: «Heta vidavočna dla luboha čałavieka, jaki vałodaje elementarnymi jurydyčnymi viedami, a nie zajmajecca palitykanstvam. Tamu płacić pavinny pa hetaj staŭcy. Jak tolki jany damoviacca z nami pra niejkuju inšuju staŭku, naturalna, my budziem płacić pa inšaj staŭcy. Usio astatniaje — heta emocyi, jakija, jak praviła, stvarajuć dadatkovyja prablemy. Tamu, ja spadziajusia, jany troški achałodziacca, našy partnery, i buduć pracavać tak, jak pryniata ŭ hetych adnosinach, buduć pracavać sumlenna, pa-partniorsku. Jašče raz paŭtaraju, nie zajmajučysia palitykanstvam, a dobrasumlenna vykonvajučy svaje kantraktnyja abaviazacielstvy».
Kamientary