«Chulihanstva z vykarystańniem zbroi». Novy incydent ź biełarusam-dobraachvotnikam va Ukrainie
Kali jamu prapanavali pakłaści zbroju i zdacca, biełarus zrabiŭ jašče adzin streł z aŭtamata. Pieramovy ź im viali bolš za čatyry hadziny.
U Charkavie pavodle padazreńnia ŭ chulihanstvie z vykarystańniem aŭtamata i hranaty ŭ žyłym domie ŭziali pad vartu ŭradženca Minska, hramadzianina Biełarusi, jaki słužyć raźviedčykam u zamiežnym lehijonie Hałoŭnaha ŭpraŭleńnia vyviedki Ministerstva abarony Ukrainy.
Za kraty biełarus trapiŭ 20 žniŭnia, ale moža vyjści pad tak zvanyja «asabistyja abaviazki», kali spłacić 266 240 hryŭniaŭ zakładu (amal 6 tysiač dalaraŭ), piša Radyjo Svaboda.
Svajoj viny biełaruski dobraachvotnik nie pryznaje. Śćviardžaje, što ŭsio adbyłosia ŭ miežach samaabarony ad nieviadomych, jakija na jaho napali. Jaho advakat nazvaŭ padazreńnie nieabhruntavanym.
Abmiežavańni na svabodu pieramiaščeńnia biełarusa buduć dziejničać sama mienš da 18 kastryčnika.
Biełaruskamu vajskoŭcu vystavili padazreńnie pavodle č. 4 artykuła 296 Kryminalnaha kodeksa Ukrainy — chulihanstva, to-bok hrubaje parušeńnie hramadskaha paradku z vykarystańniem ahniastrelnaj zbroi. Jamu pahražaje ad troch da siami hadoŭ pazbaŭleńnia voli.
Incydent adbyŭsia 20 žniŭnia ŭ Charkavie na pieršym paviersie dvuchpaviarchovaha žyłoha doma ŭ pryvatnym siektary horada.
Jak vynikaje z materyjałaŭ spravy, unačy, pryblizna a 01:30, žychary pačuli ŭ padjeździe hučnyja kryki mužčyny, jaki mieŭ z saboj aŭtamat z nabitym mahazinam i bojeprypasy. Potym adbyŭsia vybuch, z voknaŭ pasypałasia škło. Śćviardžajecca, što biełarus nibyta kinuŭ u padjezd hranatu. Na miesca vyklikali palicyju.
Pryjechali pradstaŭniki patrulnaj palicyi, a taksama dvuch śpiecyjalnych padraździaleńniaŭ KORD (Korpus apieratyŭna-raptoŭnaha dziejańnia Nacyjanalnaj palicyi Ukrainy) i TOR (śpiecyjalnaje padraździaleńnie «Taktyčna-apieratyŭnaje reahavańnie» ŭ składzie patrulnaj palicyi).
Kali jamu prapanavali pakłaści zbroju i zdacca, biełarus zrabiŭ jašče adzin streł z aŭtamata. Pieramovy ź im viali bolš za čatyry hadziny. U vyniku jon dastaŭ mahazin z aŭtamata, pakłaŭ zbroju na ziamlu, padniaŭ ruki ŭvierch, paśla čaho vajskoŭcy śpiecyjalnaha padraździaleńnia zatrymali jaho.
Nijakich inšych detalaŭ nie viadoma. Zbroju, jakuju znajšli na miescy incydentu, — aŭtamat, 17 patronaŭ i zapał ad hranaty — pryznali rečavymi dokazami ŭ spravie.
Ciapier čytajuć
«Kali mnie było dva hady, svajaki pavieźli mianie ŭ Biełaruś». Praz sacsietki dziaŭčyna adšukała baćku-rasijanina — ale skončyłasia historyja sumna2323
Kamientary