«Pačynaju razumieć ludziej, jakija žyvuć u turystyčnych haradach i nie lubiać zajezdžych». Što turystyčny bum prynosić Hrodnu

Apošnija niekalki hadoŭ Hrodna pieražyvaje sapraŭdny turystyčny bum, i kolkaść achvotnych naviedać horad praciahvaje pavialičvacca.

Choć poŭnaj statystyki pa ahulnym turystyčnym patoku niama, jość šerah uskosnych pakazčykaŭ, jakija kažuć na pavialičeńnie kolkaści turystaŭ u paraŭnańni z 2025 hodam. Dyj sami haradžanie adznačajuć, što turystaŭ stała jašče bolš.

Što pakazvajuć ličby

Tak, naprykład, pa stanie na 25‑26 lipienia chosteły i haścinicy Hrodna byli zapoŭnienyja, za vyklučeńniem niekalkich luksavych numaroŭ. I heta pry tym, što tolki za 2025 hod u horadzie dadałosia 528 novych łožka-miescaŭ, što składaje tracinu ad ciapierašniaha abjomu.

Pavodle zahadčycy siektara turyzmu ŭpraŭleńnia ekanomiki Hrodzienskaha harvykankama Viery Murašovaj, za pieršaje paŭhodździe hetaha hoda kolkaść pastajalcaŭ u haścinicach pavialičyłasia amal na 50%.

Letam u vychadnyja dni ŭ Hrodna pryjazdžajuć bolš za 50 turystyčnych aŭtobusaŭ z arhanizavanymi hrupami, paviedamiła čynoŭnica. A siarod turystaŭ, jakija pryjazdžajuć u Hrodna, usio bolš tych, chto naviedvaje horad paŭtorna.

Pavialičyć

Raście popyt i na pasutačnuju arendu kvater, kolkaść jakich taksama pavialičvajecca.

Ludzi, jakija zdajuć kvatery na sutki, kažuć, što žyllo ŭ dobraj łakacyi ŭ siezon (z krasavika pa kastryčnik) moža być zabraniravana na miesiac napierad.

Centr nie dla miascovych

Raniej «Naša Niva» pisała, što Hrodna źjaŭlajecca lidaram pa kolkaści pasutačnych kvater na dušu nasielnictva. I takoje lidarstva maje jak pazityŭnyja, tak i niehatyŭnyja nastupstvy. Pa-pieršaje, u horadzie mocna vyraśli ceny na kvatery ŭ centry. Pa-druhoje, znajści kvateru ŭ centry i pablizu jaho, jakuju zdajuć na doŭhi termin, amal nierealna, bo ŭłaśnikam značna vyhadniej zdavać jaje na sutki.

Arendnyja staŭki na pasutačnuju arendu kvater radujuć ułaśnikaŭ, ale časam šakujuć turystaŭ.

Naprykład, kali hladzieć kvatery na 15‑16 žniŭnia, to samyja dastupnyja pačynajucca z 200 rubloŭ za noč na dvuch čałaviek ź nie samym sučasnym ramontam u spalnych rajonach horada.

Za kvatery z dobrym ramontam u centry abo ŭ blizkaj da centra častcy horada prosiać užo 250‑300 rubloŭ za sutki pry ŭmovie pražyvańnia dvuch čałaviek.

Pavialičyć

Čałaviek, jaki zdaje niekalki kvater u Hrodnie, kaža, što niekatoryja turysty ź inšych haradoŭ Biełarusi niaredka admaŭlajucca ad načoŭki praz vysoki košt.

«Kali ludzi nie pakłapacilisia pra žytło zahadzia, to volnymi zastajucca tolki samyja darahija varyjanty. Pryčym čaściakom darahija jany nie tamu, što z dobrym ramontam i ŭ fajnym miescy, a prosta praz toje, što ŭsie inšyja ŭžo zabraniravanyja. Tamu mnohija vymušana pryjazdžajuć tolki na dzień», — kaža surazmoŭca, jaki ŭžo nie pieršy hod u hetym biznesie.

Pa jaho słovach, amal usie turysty, jakija zajazdžajuć da jaho, — heta rasijanie, jakija zdymajuć žytło praz servis «Sutočno.ru», biełarusy ž čaściej šukajuć praz «Kufar». Praŭda, im kvatery dastajucca zredku, bo rasijanie branirujuć ich raniej, pakolki bolš zahadzia płanujuć svaje pajezdki, čym biełarusy.

Inšy surazmoŭca pačaŭ zdavać kvateru na sutki tolki sioleta.

Pavialičyć

«Da hetaha zdavali bolš za hod u doŭhaterminovuju arendu, a ź viasny pasprabavali zdavać na sutki. Atrymałasia, što heta našmat vyhadniej. Navat vyhadniej, čym chadzić na pracu», — kaža haradzieniec, jaki maje dvušku niepadalok ad centra horada.

Muziei taksama adčuvajuć napłyŭ

U Ministerstvie kultury zajavili, što za pieršaje paŭhodździe 2026 hoda hrodzienski Stary zamak pryniaŭ na 6000 naviedvalnikaŭ bolš, čym za anałahičny pieryjad 2025 hoda.

Toje, što turystaŭ sioleta prykmietna bolš, čym było navat u 2025 hodzie, adznačajuć i ekskursavody. Naturalna, što asnoŭny rost idzie za košt rasijan, dla jakich Hrodna staŭ ledź nie adzinaj mahčymaściu adčuć siabie ŭ starym jeŭrapiejskim horadzie. Maŭlaŭ, Minsk ad siabie takich jeŭrapiejskich uražańniaŭ nie pakidaje.

Što da inšych zamiežnikaŭ, to, pa nazirańniach hidaŭ, u Hrodnie ad turystaŭ niaredka možna pačuć polskuju movu, ale skazać, što palakaŭ hetak ža šmat, jak było da kavidu i vajny, nie vypadaje.

Pavialičyć

Taksama sustrakajucca turysty ź Litvy i Łatvii. Samich ža mašyn na polskich i litoŭskich numarach u horadzie niamała, ale heta nie zaŭsiody abaviazkova turysty, bo za styrnom mohuć być i biełarusy, jakija žyvuć ci pracujuć u hetych krainach.

Zadavolenyja nie ŭsie

I kali ludzi, jakija zarablajuć na turystach, zadavolenyja situacyjaj, to šarahovyja haradžanie turystyčny bum usprymajuć inakš.

Niaredka ludzi skardziacca na pavodziny rasijan jak na darohach, tak i ŭ cełym.

«Bolšaść turystaŭ jeduć da nas z Rasii, mašyn na rasijskich numarach šmat, i častka ź ich jeździać i parkujucca pa-chamsku», — kaža haradžanin i dadaje, što, navat kali prosta špacyruje pa vulicy, čaściakom možna apaznać rasijan pa ich pavodzinach.

Surazmoŭca kaža, što z adnaho boku jamu pryjemna, što jahony horad cikavy turystam, a ź inšaha — źjaŭlajecca adčuvańnie, što Hrodna bolš užo tabie nie naležyć.

Pavialičyć

«Ciapier ja pačynaju razumieć ludziej, jakija žyvuć u turystyčnych haradach i nie lubiać turystaŭ. Časam u centry ich možna ŭbačyć nastolki šmat, što iści na špacyr u hety natoŭp nie chočacca», — pryznajecca haradzieniec.

Inšaja žycharka Hrodna taksama adznačaje, što sioleta nadta šmat turystaŭ pryjazdžaje ŭ horad.

«U asnoŭnym, kaniečnie, rasijanie, pryčym z roznych rehijonaŭ. Sioleta niejak časta traplajucca na voka mašyny z Samarskaj vobłaści. Raniej takoj kolkaści mašyn na rasijskich numarach nie nazirała», — kaža haradzienka.

Žančyna adznačaje, što praź vialikuju kolkaść turystaŭ znajści parkovačnaje miesca ŭ centry stała jašče składaniej.

Pavialičyć

«Časam stała składaniej trapić u niejkaje kafe, bo ŭsio zaniata turystami. U rajonie zamkaŭ i sinahohi jany litaralna chodziać natoŭpami. Heta ŭsio jašče troški niazvykła i krychu niaŭtulna, kali chočaš prosta spakojna prajścisia pa horadzie», — kaža haradzienka.

• 0
• 0
• 0
• 0
• 0
• 0
• 0
• 0