Pavodle apytańnia servisu rabota.by, 56% biełarusaŭ ličać, što sapraŭdy adpačyvajuć padčas adpačynku. Adnak 43% respandentaŭ pryznalisia, što navat u hety pieryjad im davodzicca zajmacca pracoŭnymi pytańniami, piša Myfin.by.
Uziać adpačynak u luby zručny čas pa ŭzhadnieńni z kiraŭnikom mohuć 42% apytanych. Jašče 37% aryjentujucca na zahadzia zaćvierdžany hrafik. Dla 16% supracoŭnikaŭ navat niekalki volnych dzion arhanizavać davoli składana.
Adpačynak lepš dapamahaje adnaŭlacca maładym ludziam. Siarod respandentaŭ va ŭzroście 14—25 hadoŭ 70% adznačyli, što viartajucca z adpačynku adpačyŭšy. U hrupie 26—45 hadoŭ takich 49%, a siarod ludziej va ŭzroście ad 46 hadoŭ — tolki 41%.
Pry hetym nie ŭsie mohuć adrazu pieraklučycca z pracy na adpačynak. 52% apytanych adčuvajuć siabie svabodnymi ad pracoŭnych spraŭ užo paśla zakančeńnia apošniaha pracoŭnaha dnia. Jašče 27% patrabujecca dzień-dva, a 18% — ad troch da čatyroch dzion.
43% respandentaŭ paviedamili, što im davodziłasia vykonvać pracoŭnyja zadačy padčas adpačynku. Najčaściej heta źviazana sa śpiecyfikaj pracy — tak adkazali 33% tych, chto pracavaŭ padčas adpačynku. Jašče 21% dapamahali kaleham, a 18% zajavili, što pracavać ich prymušała kiraŭnictva.
Dla 8% vykanańnie niekalkich zadač padčas adpačynku nie źjaŭlajecca prablemaj — im padabajecca rabić heta ŭ bolš spakojnym tempie. 6% pryznalisia, što im sumna ŭ adpačynku, a 5% nie paśpieli zaviaršyć usie spravy pierad jaho pačatkam.
Paśla viartańnia na pracu 48% apytanych adčuvajuć ciažkaści z adaptacyjaj, a 52% pierachodziać da pracoŭnaha rytmu biez asablivych prablem.
Siarod asnoŭnych pryčyn składanaj adaptacyi — nieabchodnaść znoŭ rana ŭstavać, jakuju nazvali 52% respandentaŭ. 43% adznačyli ciažkaści z chutkim uklučeńniem u terminovyja spravy, a 39% — vialikuju kolkaść nazapašanych listoŭ, zvankoŭ i inšych zadač.
Apytańnie praviali ŭ pačatku žniŭnia 2026 hoda. U im uziali ŭdzieł 692 čałavieki va ŭzroście ad 14 hadoŭ.
Ciapier čytajuć
Biełaruska, ułaśnica restarana ŭ Batumi, apynułasia ŭ centry skandału z sabakami14
Kamientary