«Šancy jość zaŭsiody». Siastra biełaruski Kaciaryny Sakovič, jakaja źnikła ŭ Niepale, raskazała, jak iduć jaje pošuki
26 žniŭnia na poŭnačy Niepała i ŭ pryhraničnych da jaho rehijonach Kitaja zdaryłasia mocnaja pavodka: paśla ziemlatrusu i sychodu sielevaha patoku raka Bchote-Košy vyjšła ź bierahoŭ, razburyŭšy vioski, darohi i hidraelektrastancyi. Pavodle aktualnych danych ź niepalskaha boku, kolkaść zahinułych u vyniku katastrofy ŭžo pieravysiła 1 tysiaču čałaviek. Jašče bolš za 3,9 tysiačy ličacca źnikłami bieź viestak. U ich liku — adna hramadzianka Biełarusi, 41‑hadovaja Kaciaryna Sakovič, pra jakuju my pisali raniej. Vydańnie «Anłajnier» źviazałasia z rodnaj siastroj dziaŭčyny Darynaj, jakaja žyvie ŭ Izraili i zaraz zajmajecca kaardynacyjaj dapamohi ŭ jaje pošukach.
Chto takaja Kaciaryna Sakovič i jak jana apynułasia ŭ Niepale?
Kaciaryna — uradženka Hrodna, ale apošnija 16 hadoŭ žyvie ŭ Miłanie. Dziaŭčyna zachaplajecca duchoŭnymi praktykami i miedytacyjami, atrymała dypłom śpiecyjalista pa hetym kirunku ŭ Indyi.
«Kaćka vielmi śvietły čałaviek, jana ŭ nas hareza i šmat padarožničaje, zajmajecca duchoŭnym raźvićciom, — apisvaje dziaŭčynu siastra Daryna. — Usia maja siamja, kaniečnie, była nie vielmi zadavolenaja jaje padarožžami ŭ nie samyja biaśpiečnyja miescy. Ale nichto nie viedaŭ, što heta [pajezdka ŭ Tybiet] budzie niebiaśpiečnaja. Jana nie źbirałasia ni na Evierest, ni na Elbrus, ni ŭ jakija inšyja ekstremalnyja miescy».
Žnivieńskaja pajezdka biełaruski była źviazanaja z koraj — rytualnym abychodam śviaščennaj hary Kajłas na poŭdni Tybieckaha nahorja ŭ Kitai, niepadalok ad miažy ź Niepałam. Pałomnicki maršrut, pa jakim płanavała iści Kaciaryna, uklučaje ŭ siabie 52 kiłamietry piešaha šlachu i padjom na vyšyniu prykładna 5600 mietraŭ.
U vialikaj hrupie, arhanizavanaj niepalskim turapierataram Leaf Holidays, ličycca 55 čałaviek. U padhrupie z vaśmi turystaŭ razam z Kaciarynaj byli jašče siem hramadzian Ukrainy i hid ź Niepała, jaki ich supravadžaŭ. Nichto ź ich pakul taksama nie byŭ znojdzieny i nie vychodziŭ na suviaź.
Što adbyłosia 26 žniŭnia i jak viaducca pošuki?
U 6:30 pavodle niepalskaha času (3:45 pa Minsku) Kaciaryna dasłała ŭ siamiejny čat videa, dzie paviedamiła, što vyjazdžaje z pryhraničnaha pasiołka Cimure na pamiežny punkt Rasuvahadchi. Mienavita pa im, jak stała viadoma paźniej, pryjšoŭsia mocny ŭdar adnaho ź pieršych patokaŭ vady, hrazi i kamianioŭ.
Nieviadoma, ci znachodziłasia hrupa biełaruski mienavita ŭ toj momant na KPP, ale kali tak, to turysty mahli apynucca ŭ samym epicentry katastrofy. Pa pravieranych Darynaj krynicach, suviaź z kim-niebudź z udzielnikaŭ hrupy apošni raz była ŭ 8:30 pa Niepale (heta 5:45 u Minsku).
«Naš tata ŭbačyŭ u navinach, što adbyŭsia apoŭzień, i praktyčna adrazu ž źviazaŭsia sa mnoj. My pačali źjazdžać z hłuzdu, čytać usie naviny, ale ŭ ich było šmat fejkaŭ i niedakładnaściaŭ. Potym užo ja stała manitoryć aficyjnyja krynicy, źviazvacca z MZS usich krain».
Apocalyptic floods and a massive landslide have devastated parts of Tibet and Nepal
The scale of destruction is hard to comprehend pic.twitter.com/2hLlg3BiPO
Havorka idzie nie tolki pra viedamstvy Biełarusi, Niepała i Kitaja. Niadaŭna Kaciaryna atrymała izrailski pašpart, taksama ŭ jaje jość dazvoł na žycharstva ŭ Italii. Ale pakolki turystka zajechała ŭ Niepał pa biełaruskich dakumientach, va ŭsich śpisach źnikłych bieź viestak jana ličycca jak hramadzianka tolki Biełarusi.
Ź pieršaha dnia pošukaŭ Daryna damahałasia, kab Kaciaryna fihuravała ŭ ich i jak hramadzianka Izraila. Izrailskija dypłamaty ŭžo paćvierdzili, što hatovyja akazvać konsulskuju dapamohu, italjanskija ŭłady taksama adreahavali na zapyty blizkich. Adnak va ŭmovach NS suviaź ź Niepałam i Kitajem pakul zastajecca niachutkaj — danyja ŭ śpisach jašče nie adkarektavanyja.
«Reč u tym, što kali raptam maja siastra znachodzicca biez prytomnaści dzie-niebudź u balnicy, to hetyja niestykoŭki mohuć pryvieści da taho, što my nie adrazu atrymajem pra heta infarmacyju. A dla mianie i ŭsioj majoj siamji vielmi važna jak maha chutčej daviedacca, što jana była znojdziena. Usio heta robicca tolki dla taho, kab jak maha chutčej atrymać infarmacyju.
Pa biełaruskim, pa izrailskim boku ja niepasredna razmaŭlaju z pasłami, z konsułami, dziažurnymi linijami. Telefanavała, naprykład, na kruhłasutačnuju liniju biełaruskaha MZS — usie tam całkam u kursie ŭsiaho. Tłumačyli, jak pracujuć dypmisii, bo ja z hetym raniej nie sutykałasia. Spakojna infarmujuć, padtrymlivajuć, razumiejučy, što ja čałaviek, jaki znachodzicca ŭ stresie. Z hetaha punktu hledžańnia struktury pracujuć dobra, biełaruskija u tym liku».
Na hety momant Kaciaryna ličycca źnikłaj tolki ŭ niepalskich śpisach — vierahodniej za ŭsio, tamu što jaje hrupa albo nie prajšła daloka pa terytoryi Kitaja, albo zusim nie paśpieła pierasiačy miažu. Takoha mierkavańnia prytrymlivajecca kiraŭnik turahienctva Leaf Holidays Hapał Tchapa, ź jakim Daryna taksama trymaje suviaź.
Kitajski bok pierachod miažy ŭdzielnikami hrupy pakul aficyjna nie paćviardžaje.
«Budu chadzić pa balnicach»
Daryna razam sa svaim maładym čałaviekam zaŭtra vylataje ŭ Katmandu, kab brać udzieł u pošukach siastry ŭžo na miescy. Izrailskaje MZS nakiravała dziaŭčynu na DNK-testavańnie — heta standartnaja pracedura dla svajakoŭ źnikłych bieź viestak.
«Što budzie rabicca ŭ Niepale? Ja źbirajusia razharnuć takuju ž dziejnaść, jakuju razharnuła ŭ Izraili. Praciahnu cisnuć na miascovyja ŚMI, kab MZS [Niepała i Kitaja] jak maha chutčej dali infarmacyju pra druhoje hramadzianstva. Heta budzie rana ci pozna zroblena, prosta ahałošvańnie ŭ ŚMI paskaraje hetyja pracesy.
Ja budu chadzić pa balnicach, usimi sposabami daviedvajučysia, što, jak i čamu tam adbyvajecca. Zachodzić u balnicy, šukać ludziej, jakija nie mohuć siabie nazvać, ci ludziej na ŠVŁ. Svaimi vačyma, ručkami praviarajučy. Tamu što infarmacyja dachodzić roznaja: to niama zamiežnikaŭ, to błytanina… Situacyja moža źmianiacca ŭ luby momant. Taksama maja meta — jak maha chutčej prybyć u jaki-niebudź štab, kab taksama pravieryć usiu infarmacyju, jakuju mnie buduć davać. Usio dla taho, kab maja siamja nie źjazdžała z hłuzdu ad nieviadomaści».
Biełaruska, vyvučyŭšy padobnyja vypadki, zapeŭnivaje, što šancy vyžyć, navat znachodziačysia ŭ epicentry sychodu sielevaha patoku, jość, tamu i nadzieju znajści siastru Daryna hublać nie źbirajecca.
«Jość aficyjnyja danyja, što ludzi (źniasilenyja, viadoma), u jakich navat nie było dostupu da vady, vyžyvali navat praz dva tydni pad zavałami. Tamu niahledziačy na toje, jak usio vyhladaje tryvožna, strašna, dla kahości biezvychodna, šancy jość zaŭsiody».
«Kajłas, ja idu». Što za biełaruska źnikła ŭ žudasnym sieli ŭ Niepale
«My pavinny byli jechać hetym ža maršrutam». Biełarus cudam paźbieh katastrofy ŭ Niepale i straciŭ tam siabra
U hrazievym patoku ŭ Niepale zahinuła ci źnikła 5700 čałaviek
U niepalskaj katastrofie cudam acaleŭ biruzovy dom, na jaki abrynuŭsia sielevy patok. Jak jamu heta ŭdałosia?
U Niepale pachavali 229 nieapaznanych cieł. Sotni achviar pavodki mohuć tak i zastacca nieapaznanymi
Ciapier čytajuć
31‑hadovy rasijanin akruciŭ 17‑hadovuju biełarusku. Finał historyi strašny: turma za narkotyki, śmierć dziciaci, «SVA» i skradzienyja hrabavyja12
Kamientary