Rasija ściahvaje vajenny fłot u Bałtyjskaje mora paśla pahroz Pucina ŭ bok Jeŭropy
Rasijskaje kamandavańnie pierakidvaje dadatkovyja bajavyja karabli Paŭnočnaha fłotu ŭ Bałtyjskaje mora. Hetyja manieŭry adbyvajucca na fonie ŭzmacnieńnia kantrolu jeŭrapiejskich krain za rasijskim «cieniavym fłotam» i rezkich zajaŭ Uładzimira Pucina, jaki pahražaŭ ES lustranymi adkazami na dahlady rasijskich sudnaŭ.
Jak paviedamlaje vydańnie BILD, u akvatoryju Bałtyjskaha mora prybyŭ rasijski rakietny frehat «Admirał Kasatonaŭ». Hety sučasny karabiel kłasa «Admirał Harškoŭ», uviedzieny ŭ stroj u 2020 hodzie, zdolny nieści kryłatyja rakiety «Kalibr» i hipierhukavyja rakiety «Cyrkon». Raniej frehat vykarystoŭvaŭsia dla achovy rasijskich hruzavych sudnaŭ u Mižziemnym mory i pralivie Ła-Manš.
Frehat staŭ užo druhim bujnym bajavym karablom, pierakinutym u rehijon za apošnija tydni. U kancy lipienia z Barancava ŭ Bałtyjskaje mora byŭ nakiravany vialiki supraćłodačny eśminiec «Admirał Leŭčanka» prajekta 1155, jaki znachodzicca ŭ składzie VMF z 1988 hoda (darečy, letam 2024 hoda ŭkrainskija vajennyja zajaŭlali pra pažar na hetym karabli praz prablemy z ruchavikami).
Pavodle infarmacyi niamieckaj haziety Kieler Nachrichten, eśminiec «Admirał Leŭčanka» byŭ zaŭvažany niepadalok ad niamieckaha vostrava Fiemarn. Vydańnie adznačaje, što karabiel moh pryjści na zamienu inšamu eśmincu — «Sievieramorsku», jaki raniej patrulavaŭ praliŭ Fierman-Bielt pamiž Danijaj i Hiermanijaj, vykonvajučy zadaču pa «zabieśpiačeńni biaśpieki sudnaŭ hramadzianskaha fłotu». Pad hetaj farmuloŭkaj zvyčajna majecca na ŭvazie eskartavańnie tankieraŭ tak zvanaha «cieniavoha fłotu», jakija transpartujuć rasijskuju naftu i zvadkavany pryrodny haz u abychod zachodnich sankcyj.
Čamu rasijskim tankieram spatrebiłasia vajennaja achova
Pieradysłakacyja bajavych karabloŭ adbyvajecca na fonie ŭzmacnieńnia cisku jeŭrapiejskich krain na rasijski kamiercyjny trafik. Jak adznačajecca ŭ dakładzie mižnarodnaj arhanizacyi ACLED, «cieniavy fłot» Rasii, jaki naličvaje ad 1000 da 3200 starych tankieraŭ sa schavanymi ŭłaśnikami, vykarystoŭvajecca Kramlom nie tolki dla abychodu naftavaha embarha, ale i jak instrumient hibrydnaj vajny.
Jeŭrapiejskija raźviedki nieadnarazova padazravali hetyja sudny ŭ praviadzieńni raźviedki, zapusku dronaŭ nad vajennymi abjektami NATA i navat u paškodžańni padvodnaj infrastruktury (kabielaŭ suviazi i trubapravodaŭ) u Bałtyjskim mory. U adkaz krainy ES i NATA pačali pravodzić apieracyi pa pierachopie, dahladzie i navat aryšcie takich tankieraŭ, časta matyvujučy heta parušeńniami marskoha prava, vykarystańniem falšyvych ściahoŭ i adsutnaściu strachoŭki. Akramia taho, Jeŭrasajuz praciahvaje ŭnosić rasijskija tankiery ŭ sankcyjnyja śpisy.
Maskva adreahavała na dziejańni Jeŭropy rezkaj eskałacyjaj. U sakaviku 2026 hoda Kreml aficyjna abviaściŭ ab płanach vykarystoŭvać vajenna-marskija karabli dla eskartavańnia sudnaŭ «cieniavoha fłotu». Napiaredadni pierakidvańnia karabloŭ u Bałtyku Uładzimir Pucin publična pryhraziŭ jeŭrapiejskim krainam, nazvaŭšy inśpiekcyi rasijskich tankieraŭ «piractvam i rabavańniem». Jon paabiacaŭ, što Rasija adkaža «lustranymi mierami», što faktyčna aznačaje pahrozu siłavoha abardažu jeŭrapiejskich kamiercyjnych sudnaŭ rasijskimi vajennymi marakami.
Źjaŭleńnie rasijskich frehataŭ i eśmincaŭ u Bałtycy pobač z terytaryjalnymi vodami Hiermanii i Danii, z adnaho boku, pavinna ŭskładnić dla jeŭrapiejcaŭ praceduru dahladu tankieraŭ, a ź inšaha — demanstruje hatoŭnaść Maskvy da pramych vajennych incydentaŭ na mory.
«Naša Niva» — bastyjon biełaruščyny
PADTRYMAĆ
Kamientary