Za adnu bazavuju pradajuć histaryčny brovar z majontka Śviackich. U tym ža majontku pracavaŭ i Janka Kupała
U ahraharadku Połymia Sieńnienskaha rajona na tarhi vystaŭleny kompleks haspadarčych pabudoŭ siadziby kanca XIX — pačatku XX stahodździa. Histaryčnyja cahlanyja budynki prapanujucca inviestaram pa minimalnym pačatkovym košcie z umovaj praviadzieńnia restaŭracyjnych rabot.
Pavodle infarmacyi ź placoŭki Biełaruskaj univiersalnaj tavarnaj biržy, na aŭkcyjon 29 kastryčnika vystaŭlena piać kapitalnych pabudoŭ. Rynkavy košt kompleksu ŭ kancy 2022 hoda aceńvaŭsia ŭ 2,9 miljona rubloŭ. Ciapier startavy košt kožnaha łota źnižany da adnoj bazavaj vieličyni (40 rubloŭ).
Da nabyćcia prapanujucca nastupnyja abjekty:
- hałoŭny dvuchpaviarchovy cahlany korpus śpirtzavoda (1890 h., 1502 kv. m);
- budynak małačarni (1913 h., 162 kv. m);
- trochpaviarchovy skład (1913 h., 779 kv. m);
- zbožžaskład (1913 h., 1764 kv. m);
- śpirtaschovišča (1900 h., 75 kv. m).
Dla pakupnika praduhledžany standartnyja dla pomnikaŭ architektury ŭmovy: nieabchodna na praciahu adnaho hoda raspracavać prajektna-kaštarysnuju dakumientacyju, a na praciahu piaci hadoŭ z momantu zaklučeńnia dahavora vykanać ramontna-restaŭracyjnyja pracy. Ziamielnyja ŭčastki ahulnaj płoščaj bolš za 1 hiektar pieradajucca ŭ arendu biez praviadzieńnia dadatkovaha aŭkcyjonu. Paśla adnaŭleńnia budynki možna vykarystoŭvać dla pradprymalnickaj dziejnaści abo raźmiaščeńnia sacyjalna-kulturnych i administracyjnych ustanoŭ.
Vystaŭlenyja budynki — heta pramysłovaja častka majontka ŭ Staroj Bielicy (sučasny ahraharadok Połymia). Jašče da pačatku XX stahodździa tut pracavali młyn i fierma, vyrablali masła i syry pad brendam «Dobra Bielica, K. Swiackiego». Pieraabstalavany ŭ brovar (śpirtzavod) budynak praciahvaŭ pracavać jak pradpryjemstva saŭhasa «Połymia» ŭ saviecki i postsaviecki čas až da 2002 hoda.
Sam siadzibny kompleks taksama maje vialikuju histaryčnuju kaštoŭnaść. Jašče da pierachodu ziamiel da rodu Śviackich tut žyli žonka kanclera Vialikaha Kniastva Litoŭskaha Jana Hlaboviča Hanna Bartaševič i hietman VKL Jan Sapieha.
Svoj architekturny roskvit kłasicystyčny majontak pieražyŭ pry Karali Śviackim u pačatku XX stahodździa. U 1909—1911 hadach da pałaca dabudavali vaśmihrannuju viežu, sprajektavanuju poznańskim architektaram Uładzisłavam Mičkoŭskim. Na pieršym jaje paviersie miaściłasia skulpturnaja majsternia syna haspadara. Kožnaja cahlina novaj pabudovy była paznačana manahramaj «KS» (Karal Śviacki). Interjery pałaca ŭpryhožvali kaštoŭnyja pałotny, siarod jakich była karcina Valancina Vańkoviča «Napaleon la vohnišča», a biblijateka naličvała kala 3 tysiač tamoŭ.
Z 1903 pa 1904 hod u majontku pracavaŭ budučy kłasik biełaruskaj litaratury Janka Kupała, vykonvajučy abaviazki nastaŭnika i małodšaha prykazčyka. Paźniej na budynku siadziby była ŭstalavanaja miemaryjalnaja doška ŭ honar paeta.
Siadziba była ŭziataja pad dziaržaŭnuju abaronu ŭ 1976 hodzie. Sproby ažyvić histaryčny kompleks ŭžo rabilisia: u 2009 hodzie byŭ padpisany pratakoł ab namierach z łatvijskaj kampanijaj, jakaja płanavała stvaryć kulturna-dziełavy centr i haścinicu, adnak prajekt zastaŭsia nierealizavanym.
Kamientary