Biełaruski stendap-komik Maksim Kanavał raskazaŭ, jak hulaje ŭ chakiej u Polščy

U dziacinstvie daviałosia vybirać pamiž chakiejem i vučobaj

U chakiej Maksim trapiŭ u siem hadoŭ. Tady jon žyŭ u Navapołacku, niedaloka ad ladovaj areny. Adnojčy ŭ škołu pryjšli treniery i prapanavali pieršakłaśnikam pasprabavać siabie ŭ chakiei.

— Ja pryjšoŭ dadomu i skazaŭ baćkam, što chaču zajmacca chakiejem, — uspaminaje Maksim.

Nastupnyja šeść hadoŭ byli ciesna źviazanyja sa sportam. Jon treniravaŭsia ŭ navapołackim «Chimiku», udzielničaŭ u spabornictvach, jeździŭ z kamandaj u inšyja harady i krainy. Mienavita dziakujučy chakieju ŭpieršyniu pabyvaŭ za miažoj — u Polščy i Łatvii.

Ale ŭ padletkavym uzroście źjavilisia prablemy sa zdaroŭjem. Maksim vypaŭ sa zvykłaha trenirovačnaha pracesu. Adnačasova ŭskładniałasia školnaja prahrama, a spartyŭnyja pajezdki patrabavali ŭsio bolš času. Daviałosia vybirać pamiž vučobaj i mahčymaj spartyŭnaj karjeraj. Mama i babula ličyli, što adukacyja važniejšaja. Maksim prysłuchaŭsia da ich i ŭ 13 hadoŭ pierastaŭ zajmacca chakiejem.

Adnak cikavaść da hulni nie źnikła. Časam jon prychodziŭ na katok na Niamizie ŭ Minsku — prosta pakatacca na kańkach. Ale pra viartańnie ŭ kamandu tady havorki nie było.

Pavialičyć

«Kupiŭ kańki i klušku i zrazumieŭ, što ŭsio jašče ŭmieju hulać»

Viarnucca ŭ chakiej Maksim vyrašyŭ užo darosłym, paśla pierajezdu ŭ Kijeŭ. U pačatku 2017 hoda siabry prapanavali pahulać na zamierzłym voziery.

Dla hetaha jon kupiŭ kańki i klušku. Vyjšaŭšy na lod, sa ździŭleńniem vyjaviŭ, što navyki, atrymanyja ŭ dziacinstvie, nie stračanyja.

— Ja zrazumieŭ, što dobra katajusia, pa-raniejšamu mahu kahości abyhryvać. I vyrašyŭ, što treba znajści amatarskuju kamandu.

Tak Maksim apynuŭsia ŭ kijeŭskich «Biełych miadźviedziach». Spačatku treniravaŭsia dvojčy na tydzień, a potym jaho zaprasili ŭdzielničać u Kijeŭskaj chakiejnaj lizie, dzie hulali ŭ tym liku spartsmieny z paŭprafiesijnym dośviedam.

Pastupova chakiej znoŭ zaniaŭ važnaje miesca ŭ jaho žyćci. Maksim rehularna treniravaŭsia, udzielničaŭ u matčach i atrymlivaŭ zadavalnieńnie ad hulni, ad jakoj kaliści daviałosia admovicca.

U Varšavie formu dla chakieja znajšli na OLX

U 2022 hodzie Maksim pierajechaŭ u Polšču. Chakiejnaja ekipiroŭka zastałasia ŭ Kijevie, tamu adrazu praciahnuć treniroŭki nie atrymałasia.

Užo ŭ Varšavie jon paznajomiŭsia ź biełarusam z Hrodna. U razmovie vyśvietliłasia, što abodva cikaviacca chakiejem. Novy znajomy raskazaŭ pra varšaŭskuju kamandu «Lehijon». Zastavałasia vyrašyć pytańnie z ekipiroŭkaj.

— Ja kažu, što ŭsia forma zastałasia ŭ Kijevie. A jon adkazvaje: zaraz na sajcie abjaŭ OLX znojdziem.

Pavialičyć

Adpaviednaja abjava sapraŭdy znajšłasia. Pradaviec zakančvaŭ zajmacca chakiejem praz traŭmu i pradavaŭ užyvanuju ekipiroŭku za nievialikija hrošy. Tak Maksim znoŭ apynuŭsia na lodzie — ciapier užo ŭ polskaj stalicy.

Spačatku hulcy «Lehijona» prosta treniravalisia razam. Paźniej kamanda pačała ŭdzielničać u aficyjnych spabornictvach treciaj lihi. Dva siezony zapar «Lehijon» stanaviŭsia jaje čempijonam.

Z časam hulcoŭ stała tak šmat, što sfarmavalisia dva składy — «Lehijon-1» i «Lehijon-2». Usiaho ŭ ich kala 40 čałaviek.

U siezonie 2026/2027 adzin sa składaŭ — «Lehijon-1», za jaki hulaje Maksim, — vychodzić na ŭzrovień druhoj lihi. Siarod spabornikaŭ jość byłyja prafiesijnyja chakieisty.

Pieršy matč novaha siezona zapłanavany na 25 kastryčnika.

«Nas vyručyła toje, što ŭ pary biełarusaŭ užo jość polskija pašparty»

Varšaŭski «Lehijon» — šmatnacyjanalnaja kamanda. Kala pałovy jaje hulcoŭ składajuć palaki. Siarod astatnich najbolš biełarusaŭ, ale jość taksama ŭkraincy, kanadziec i datčanin.

Maksim raskazvaje, što z hetaha siezonu patrabavańni da kamand źmianilisia. Kali raniej dola polskich hulcoŭ pavinna była składać nie mienš za pałovu, to ciapier, pavodle jaho słoŭ, patrabujecca bolšaść — 50% plus adzin hulec.

Dla «Lehijona» heta mahło stać prablemaj, pakolki zamiežnikaŭ u kamandzie niamała.

— Nas vyručyła toje, što ŭ pary biełarusaŭ užo jość polskija pašparty. Jany svaje, biełarusy, ale zajaŭlenyja jak palaki.

Pry hetym, kaža Maksim, u kamandzie niama ni ksienafobii, ni padziełu pavodle nacyjanalnaj prykmiety. Hulcy paznajomilisia dziakujučy chakieju, i z časam mnohija stali blizkimi siabrami. Chakieisty razam adznačajuć śviaty, vybirajucca na pryrodu, a adnojčy navat adpravilisia katacca na kajakach pa Mazurach.

Kolki kaštuje hulać u chakiej u Varšavie

Kamanda trenirujecca na ladovaj arenie COS Torwar u Varšavie. Asnoŭnyja treniroŭki prachodziać pa aŭtorkach i čaćviarhach. Časam Maksim dadatkova vychodzić na lod pa subotach. U vychadnyja mohuć prachodzić hulni čempijanatu.

Trenier kamandy raniej hulaŭ za varšaŭskuju «Lehiju».

Za mahčymaść zajmacca chakiejem hulcy płaciać sami. Košt zaležyć ad vybranaha farmatu: adna treniroŭka — 60 złotych (45 rubloŭ), abaniemient na miesiac, jaki ŭklučaje 8—9 trenirovak, — 300 złotych (230 rubloŭ). Hrošy iduć na arendu lodu i apłatu pracy treniera.

Dla ŭdziełu ŭ lizie treba atrymać licenziju

Prosta kupić ekipiroŭku i pryjści na treniroŭku dastatkova, kab pasprabavać siabie ŭ amatarskaj kamandzie. Ale dla ŭdziełu ŭ aficyjnych spabornictvach patrebnaja licenzija.

Kab jaje atrymać, chakieist pavinien prajści miedycynskaje abśledavańnie i aformić nieabchodnyja dakumienty praz Polskuju fiederacyju chakieja. Dla hetaha spartyŭny status biełaruskaha hulca, u tym liku najaŭnaść abo adsutnaść prafiesijnaha kantrakta, pavinna paćvierdzić Biełaruskaja fiederacyja chakieja.

— U adroźnieńnie ad inšych orhanaŭ, Biełaruskaja fiederacyja chakieja adkazvaje na zapyt vielmi chutka, — adznačaje Maksim.

«Prajhrali Biełastoku — ciapier nie słuchajem hučna muzyku»

Chakiej — heta nie tolki treniroŭki i spabornictvy, ale i asablivaja «kultura raździavalni». Tut pastajanna žartujuć adzin z adnaho, abmiarkoŭvajuć matčy i pilnujucca tradycyj.

Adna z samych charakternych asablivaściaŭ chakieistaŭ, pavodle Maksima, — zababonnaść.

Naprykład, adzin ź jaho tavaryšaŭ z kamandy zaŭsiody sadzicca ŭ aŭtobusie na peŭnaje miesca pa darozie na matč. Jon upeŭnieny, što heta dapamahaje jamu lepš hulać.

U inšych jość zvyčki, źviazanyja z ekipiroŭkaj: chtości pryncypova nadziavaje kańki ŭ peŭnaj paśladoŭnaści, chtości biare z saboj tolki peŭny ručnik. Jość i kamandnyja zababony.

— My adnojčy pierad hulnioj ź Biełastokam hučna słuchali muzyku ŭ raździavalni. Prajhrali. I ciapier nikoli nie słuchajem hučna muzyku pierad matčami.

Jašče adna viadomaja chakiejnaja tradycyja — nie halicca i nie stryhčysia padčas płej-of — vyrašalnaj stadyi čempijanatu, kali kamandy zmahajucca za pieramohu.

— Płej-of moža iści niekalki tydniaŭ, tamu ŭsie chakieisty chodziać takija niaholenyja, — śmiajecca Maksim.

U samoha Maksima taksama jość toje, z čym jon nie choča rasstavacca, — hulniavy numar 88. Jon vybraŭ jaho pavodle hoda naradžeńnia.

U «Lehijonie» chakieisty mohuć sami vybirać hulniavyja numary — hałoŭnaje, kab jany nie byli zaniatyja inšymi hulcami. Praŭda, numar 1 tut tradycyjna pakidajuć bramniku.

— Nie toje što ŭ Biełarusi, dzie pad pieršym numaram hulaje tolki adzin čałaviek, — śmiajecca Maksim, majučy na ŭvazie Łukašenku.

Paśla trenirovak u raździavalni nakryvajuć śviatočny stoł

U rehularnym čempijanacie chakieisty paśla matčaŭ zvyčajna raźjazdžajucca pa damach. Ale važnyja pieramohi abaviazkova adznačajuć razam.

Tak było i paśla dvuch vyjhranych finałaŭ treciaj lihi. Hulcy źbiralisia ŭ restaranie i śviatkavali zakančeńnie siezona.

Jość u «Lehijona» i mienš farmalnyja tradycyi. Pierad Kaladami ci Vialikadniem kožny prynosić što-niebudź da ahulnaha stała. Paśla treniroŭki chakieisty zanosiać u raździavalniu stały i ładziać supolnuju viačeru.

Na Kalady polskija hulcy prynosiać apłatki — tonkija kaladnyja płaścinki, jakimi ŭ Polščy pryniata dzialicca za śviatočnym stałom, abmieńvajučysia pažadańniami, a biełarusy — draniki.

• 1
• 0
• 0
• 0
• 0
• 0
• 0
• 0