Va Urocłavie biełarusam zalili zamki mantažnaj pienaj i napisali na dźviarach «Preč». Z kvatery ich vyzvalali ratavalniki

Viktoryja i Raman pierajechali ŭ Polšču ź Biełarusi ŭ 2021 hodzie. Jany atrymali mižnarodnuju abaronu i žyvuć va Urocłavie. Apošnija amal try hady zdymajuć kvateru ŭ starym domie niedaloka ad centra horada.

Ranicaj 21 kastryčnika, kali para źbirałasia vyjści z domu, vyśvietliłasia, što ŭvachodnyja dźviery zabłakavanyja.

— U nas zamiest zvyčajnaha vočka ŭ dźviarach staić pramavuholnaje škielca. My ŭbačyli, što jano ŭsio niečym zaklejenaje. Akazałasia, heta mantažnaja piena i čyrvonaja farba. My ŭvohule nie mahli adčynić dźviery. Zamki praktyčna nie prakručvalisia, — raskazvaje Viktoryja.

Nieviadomyja zalili pienu ŭ abodva zamki — vierchni i nižni. Na dźviarach taksama pakinuli nadpis pa-polsku — Won do siebie, jaki biełarusy ŭspryniali jak zaklik źjazdžać z krainy.

Para patelefanavała haspadaru kvatery, a zatym źviarnułasia pa dapamohu ŭ ekstrannyja słužby. Na miesca pryjechali pažarnyja, jakija dapamahli biełarusam vybracca.

— My paprasili ich spačatku ŭsio sfatahrafavać, kab zastalisia dokazy dla palicyi. Jany zrabili fatahrafii, a potym nas vyzvalili. Kali ŭbačyli, što adbyłosia, skazali, što za takoje praduhledžanaja kryminalnaja adkaznaść.

Paśla hetaha Raman adpraviŭsia ŭ palicejski kamisaryjat pisać zajavu. Sama dziaŭčyna zastałasia doma: praz paškodžanyja zamki dźviery bolš nielha było začynić zvonku.

— Chtości pavinien pastajanna znachodzicca doma, tamu što zvonku dźviery nie začyniajucca. Znutry jašče niejak možna začynić, choć i ź ciažkaściu.

U apošnija tydni ahresii stała bolš

Viktoryja raskazała, što jany z chłopcam — adzinyja zamiežniki ŭ domie. Pavodle jaje słoŭ, raniej u pary zdaralisia bytavyja kanflikty ź niekatorymi susiedziami, ale ŭ apošnija dva-try tydni situacyja abvastryłasia.

Adna z pryčyn roznahałośsiaŭ — niezačynienyja dźviery ŭ padjezd i padvalnyja pamiaškańni.

Viktoryja i jaje partnior zajmajucca prodažam tavaraŭ, častku jakich zachoŭvajuć u padvale doma. Tam ža znachodzicca darahi elektraviełasipied. Para niepakoicca za zachavanaść majomaści, pakolki, pavodle słoŭ žančyny, dźviery ŭ padjezd i padvał časta zastajucca adčynienymi.

— My ŭžo treci hod sprabujem vyrašyć hetuju prablemu. Dźviery adčynienyja — zachodź chto chočaš. Ja sama bačyła, jak u padjeździe spali biazdomnyja, jak chtości spraŭlaŭ tam patrebu. My niekalki razoŭ pisali ŭ administracyju, prasili, kab žychary začyniali dźviery.

Pavodle słoŭ Viktoryi, administracyja raźmiaščała abjavy z prośbaj zachoŭvać paradak, adnak prablema zastavałasia.

Na hetaj hlebie ŭ pary ŭźnikali kanflikty z žycharami čatyroch kvater.

— My žyviom tut amal try hady. Raniej takoj aktyŭnaj ahresii nie było. Uźnikali niejkija svarki, ale ničoha surjoznaha. A voś apošnija dva-try tydni ŭsio nibyta abvastryłasia.

Pavialičyć

Dziaŭčyna śćviardžaje, što susiedzi nieadnarazova abražali jaje i Ramana, u tym liku kryčali im pa-polsku «vybirajsia». Praz adzin z takich kanfliktaŭ para ŭžo vyklikała palicyju.

Pra svaje padazreńni Raman paviedamiŭ palicyi. Adnak chto mienavita zaliŭ zamki pienaj, pakul nieviadoma.

Pavodle słoŭ dziaŭčyny, užo paśla zdareńnia da ich pryjšoŭ adzin z susiedziaŭ z haječnym klučom. Jon abvinavačvaŭ paru ŭ paškodžańni svajoj majomaści ŭ padvale. Viktoryja ŭspryniała jaho pavodziny jak pahrozu, choć kaža, što nie razumieje, čamu jon da ich pryjšoŭ.

— Ja i tak u stresie i nie razumieju, čamu jon pryjšoŭ da nas.

«My ciapier nie viedajem, što rabić»

Viktoryja raskazała, što paśla zvarotu Ramana ŭ kamisaryjat kvateru naviedali supracoŭniki palicyi. Jany ahledzieli paškodžanyja dźviery, sfatahrafavali ich i sabrali ŭzory mantažnaj pieny i farby.

Paśla zdareńnia biełarusy zadumalisia pra pierajezd, pakolki bolš nie adčuvajuć siabie ŭ biaśpiecy. Adnak chutka źmianić žyllo im niaprosta.

Para ŭdzielničaje ŭ intehracyjnaj prahramie dla ludziej, jakija atrymali mižnarodnuju abaronu. Pavodle słoŭ Viktoryi, padčas udziełu ŭ prahramie im niepažadana mianiać miesca žycharstva.

— My nie viedajem, što ciapier rabić. Tut stała sapraŭdy niebiaśpiečna. Chočam pahavaryć z haspadarom kvatery, tamu što zastavacca ŭ takich umovach strašna.

• 0
• 0
• 3
• 11
• 6
• 5
• 25
• 0