Amierykanskija ŭłady chočuć vyprabavać na miažy niabačny «ciepłavy pramień», ad jakoha čałavieku zdajecca, što jon haryć

Amierykanskija vajskoŭcy ŭžo niekalki dziesiacihodździaŭ raspracoŭvajuć zbroju, jakaja dazvalała b spyniać abo razhaniać ludziej biez prymianieńnia ahniastrelnaj zbroi. Adzin z kirunkaŭ takich daśledavańniaŭ — technałohii, jakija ŭździejničajuć na čałavieka z dapamohaj elektramahnitnaha vypramieńvańnia.

Raboty ŭ hetaj halinie pačalisia jašče ŭ kancy 1980‑ch hadoŭ, a ŭ 2002‑2007 hadach Pientahon raspracavaŭ demanstracyjnuju sistemu, jakaja atrymała nazvu Active Denial System (ADS). Jaje pryznačeńnie — prymusić čałavieka pakinuć peŭnuju terytoryju praz mocnaje adčuvańnie bolu, nie nanosiačy jamu pry hetym śmiarotnych paškodžańniaŭ.

Ideju vykarystoŭvać takuju technałohiju dla strymlivańnia mihrantaŭ, jakija sprabujuć pierasiekčy amierykana-mieksikanskuju miažu, abmiarkoŭvajuć nie ŭpieršyniu. U 2018 hodzie tahačasnaja ministarka ŭnutranaj biaśpieki Kirsten Nilsen adchiliła prapanovu prymianić jaje suprać mihrantaŭ. Adnak u lipieni 2025 hoda adno z padraździaleńniaŭ Pientahona apublikavała materyjał, u jakim abhruntoŭvała pieravahi padobnaj zbroi dla achovy miažy.

Ciapier sprava dajšła da praktyčnych vyprabavańniaŭ. Ministr abarony Pit Chiehsiet dazvoliŭ pieradać Active Denial System Ministerstvu ŭnutranaj biaśpieki na siem miesiacaŭ. Za hety čas viedamstva zmoža pravieryć jaje mahčymaści i raspracavać taktyku mahčymaha vykarystańnia suprać ludziej, jakija sprabujuć nielehalna trapić u ZŠA. Zrešty, kančatkovaha rašeńnia ab prymianieńni zbroi pakul niama.

Jak pracuje «ciepłavy pramień»

Active Denial System zdolnaja ŭździejničać na čałavieka na adlehłaści da adnaho kiłamietra. Pryłada vypramieńvaje niabačny pučok elektramahnitnych chval, jakija pranikajuć prykładna na 0,4 milimietra ŭ skuru i imkliva nahravajuć jaje pavierchniu.

Adčuvańnie paraŭnoŭvajuć z mocnym žaram, jaki možna adčuć, kali adkryć vielmi haračuju duchoŭku. Bol nastolki intensiŭny, što čałaviek amal imhnienna imkniecca pakinuć zonu dziejańnia pramiania.

Pavodle Pientahona, jak tolki čałaviek vychodzić z-pad uździejańnia pramienia, adčuvańnie apioku źnikaje. Adnak jašče 10‑15 chvilin jon moža adčuvać pakołvańnie abo bol pry dakranańni da skury.

Niahledziačy na toje, što sistema raspracavanaja jak nieśmiarotnaja zbroja, jana nie całkam biaśpiečnaja. Viadomyja prynamsi dva vypadki, kali jaje ŭździejańnie vyklikała apioki druhoj stupieni.

Pientahon śćviardžaje, što dla śmiarotnaha paškodžańnia nieabchodnaje značna bolš praciahłaje ŭździejańnie, čym toje, jakoha dastatkova, kab prymusić čałavieka adyści. Ryzyku traŭmaŭ, pavodle vajskoŭcaŭ, pavinny źnižać techničnyja abmiežavańni, prahramnaje zabieśpiačeńnie i śpiecyjalnaja padrychtoŭka apierataraŭ.

Vykarystańnie takoj zbroi suprać mihrantaŭ vyklikaje etyčnyja i jurydyčnyja sprečki. U Słužbie mytnaha i pamiežnaha kantrolu ZŠA ŭ svaju čarhu zajaŭlajuć, što novyja technałohii pavinny pavyšać biaśpieku i dapamahać zachoŭvać čałaviečyja žyćci.

• 3
• 0
• 1
• 0
• 0
• 1
• 0
• 0