Pamior Viačasłaŭ Dubinka. Pra jaho ŭspaminaje mastak Uładzimir Krukoŭski.
Pra Viačasłava Dubinku ŭspaminaje mastak Uładzimir Krukoŭski.
Heta byŭ niezvyčajny, unikalny dla Biełarusi čałaviek. Śviadomy biełarus, naš čałaviek. Dobry, razumny, kamunikabielny, ščodry. Ciesna źviazany ź lehiendarnaj majsterniaj «Na Paddašku» Jaŭhiena Kulika. Na jaho možna było spadziavacca ŭ luboj spravie, u jakoj jon viedaŭ tołk. A ŭnikalnaść jahonaja ŭ tym, što niama ŭ Biełarusi čałavieka, jaki b adnačasova naležaŭ da čatyroch tvorčych supołak. U 60-ja, kali jon sa słuckaj rajonki fatohrafam pierajšoŭ u «Źviazdu», dałučyŭsia da Sajuza žurnalistaŭ. Abjechaŭ usiu krainu. Fatahrafavańnie ŭ jaho paralelna išło z napisańniem artykułaŭ, narysaŭ. Jak majstar vycinanki ŭ tych ža 60-ch pryjšoŭ u Sajuz mastakoŭ i Sajuz narodnych majstroŭ. Viačasłaŭ litaralna viarnuŭ biełaruskuju vycinanku ź niabytu. Spačatku jon pryhladaŭsia da dziejnaści ŭkrainskich majstroŭ, a potym za jakija 10 hadoŭ i sam staŭ pryznanym majstram. Vystaŭlaŭsia ŭ Biełarusi, Litvie, Rasii. Jahonymi vycinankami ilustravalisia litaraturnyja tvory. Naprykład, kniha Artura Volskaha «Žyvyja litary». U pačatku 2000-ch ja pryniaŭ udzieł u stvareńni jahonaha albomu vycinanki. Pajšli vystavy. U Muziei sučasnaha mastactva, u Nacyjanalnym mastackim, za miažoj. Zamiežniki achvotna nabyvali jahonyja vycinanki. Tak jaho napatkała mižnarodnaje pryznańnie.
Čaćviortym jahonym tvorčym sajuzam staŭ Sajuz piśmieńnikaŭ. Viačasłaŭ — aŭtar šaści apovieściaŭ. Pieršaja — «Nie płač, maja duša» — była nadrukavanaja ŭ časopisie «Maładość».
Ciažka pra Słavu havaryć ŭ minułym časie. Jašče piać dzion tamu bačylisia ź im u jahonaj majsterni. Jon prosta poŭniŭsia płanami. Padrychtavaŭ da druku pry ŭdziele Uładzimira Basałyhi makiet novaha alboma vycinanak. Nie dačakaŭsia novaj apovieści ŭ vyhladzie knihi, jana pakul ŭ elektronnym varyjancie.
Raźvitańnie ź Viačasłavam Dubinkam adbudziecca 12 žniŭnia ad 10-j da 12-j hadziny ŭ Minsku ŭ pamiaškańni Upravy BNF (Mašerava, 8 — byłaja Varvašeni). Pachavajuć jaho na Paŭnočnych mohiłkach.
Apošniaje intervju Viačasłava Dubinki.
Drukavaŭsia sp.Dubinka i staronkach NN.
Kamientary