Siurpryz

Jakaja nam sprava da razborak miž Miadźviedzievym i Łužkovym? Piša Vital Taras.

Prezidentu Rasii Dźmitryju Miadźviedzievu 14 vieraśnia spoŭniłasia 45 hadoŭ. Data nie zusim kruhłaja, tamu abyšłosia bieź jubilejnych śviatkavańniaŭ i admysłovych teleprahram. Kiraŭnik Rasijskaj Fiederacyi pravioŭ aŭtorak u svajoj letniaj rezidencyi ŭ Sočy, choć hety dzień dla jaho aficyjna pracoŭny.

Tym nie mienš, Miadźviedzieŭ atrymaŭ vinšavańni ad prezidenta Ukrainy Janukoviča pa telefonie, a taksama ad prezidenta Kazachstana Nazarbajeva.

Imia Alaksandra Łukašenki ŭ paviedamleńniach pra dzień rasijskich ŚMI ŭ suviazi z temaj vinšavańniaŭ nie zhadvałasia.

Što tyčycca Uładzimira Pucina, dyk adno z ahienctvaŭ paviedamiła, što preḿjer-ministr padrychtavaŭ svajmu partnioru pa tandemie niejki «siurpryz». Mahčyma, niekatoryja siurpryzy dla rasijskaha prezidenta sioleta byli nie tolki pryjemnymi. Naprykład, vychad pieradač, u jakich vykryvajucca złoŭžyvańni mera Maskvy, adrazu na troch rasijskich telekanałach, ź jakich dva — fiederalnyja, śviedčyć nie tolki pra pačatak infarmacyjnaj vajny suprać adnaho z zasnavalnikaŭ partyi «Adzinaja Rasija» Juryja Łužkova. (Darečy, film «Sprava ŭ kiepcy», jaki pieršym vyjšaŭ u subotu na kanale NTV, pavodle svajoj stylistyki dy apieratyŭnaści vielmi nahadvaje film «Chrosny baćka».)

Heta jašče zusim nie aznačaje, što čas Łužkova i jaho žonki Baturynaj razam ź firmaj «Inteka» skončyŭsia. Prynamsi, urad Maskvy padaŭ užo ŭ sud na zhadanyja telekanały, a Łužkoŭ u interv́ju abvierh usie abvinavačańni na svoj adras — u tym liku, u karupcyi.

Niekatoryja palitołahi nie biez padstaŭ miarkujuć, što kali b u Miadźviedzieva było dastatkova sił, kab źniać Łužkova z pasady (a jon daŭno hetaha damahajecca) filmaŭ z metaj jaho dyskredytacyi paprostu nie było b. Darečy, toje samaje možna skazać i ŭ adnosinach da «telesieryjała» pra Łukašenku.

Jak viadoma, Łužkoŭ adkryta vystupiŭ suprać źmieny maršrutu chutkasnaj mahistrali, dla budaŭnictva jakoj pačali vyrubać les u Chimkach, choć prezident daručyŭ razhledzieć roznyja varyjanty, u pryvatnaści, bolš biaśpiečnyja z ekałahičnaha hledzišča. Pry hetym mer apielavaŭ nie da kaho-niebudź, ale da premjera Pucina. Kali Łužkoŭ zastaniecca pry svajoj pasadzie, reputacyja Miadźviedzieva budzie kančatkova «padmočana».

Zdavałasia b — jakaja nam sprava da razborak unutry rasijskaj ułady dy vyśviatleńnia adnosinaŭ pamiž ciapierašnim prezidentam Rasii i najbolš realnym pretendentam na budučy šaścihadovy prezidencki termin? Mahčyma, zvyčajnych vybarcaŭ u Biełarusi heta nie vielmi cikavić. A voś Alaksandru Łukašenku jany pavinny tolki radavać. Jak zaŭždy, jamu vielmi pašanciła. Nie vyklučana, što ŭvaha rasijskich ŚMI chutka całkam pieraklučycca na pierypietyi vakoł mera Łužkova i mahčymy raskoł u viarchoŭnym tandemie.

I tady anansavany praciah sieryjała «Chrosny baćka» ni ŭ vieraśni, ni paźniej my nie ŭbačym. A pra infarmacyjnuju vajnu i «capańnie za roznyja miescy» usie, u tym liku Łukašenka i Pucin, zabuduć. Tady sioletnija vybary znoŭ projduć pry spryjalnym dla ŭłady infarmacyjnym nadvorji…

• 0
• 0
• 0
• 0
• 0
• 0
• 0
• 0