U Vialikabrytanii aryštavanyja 20 chakieraŭ-imihrantaŭ z krain byłoha SSSR.
Kamputarnyja chakiery, aryštavanyja pa padazreńni ŭ kradziažy miljonaŭ funtaŭ z bankaŭskich rachunkaŭ, byli vychadcami z Ukrainy, Łatvii, Hruzii, Biełarusi i Estonii. Pra heta paviedamlajuć krynicy ŭ brytanskich pravaachoŭnych orhanach.
Stali viadomyja nazvy finansavych instytutaŭ, jakija byli mišeńniu chakieraŭ. Heta HSBC, Royal Bank of Scotland, Barclays i Lloyds TSB, pieradaje BBC.
Pakul ustanoŭleny fakt kradziažu 6 młn funtaŭ sterlinhaŭ (kala 9 młn dołaraŭ). Adnak ahulnaja suma skradzienaha, na dumku śledčych, našmat bolšaja.
Banda zajmałasia machlarstvam u Vialikabrytanii z 13 kastryčnika 2009 h pa 28 vieraśnia 2010 hoda.
Złačyncy vykarystali virus ZeuS, jakim zarazili tysiačy kamputaraŭ u Vialikabrytanii. Hetaja prahrama vykradała paroli,nieabchodnyja dla atrymańnia dostupu da asabistych bankaŭskich rachunkaŭ praź interniet. Zavałodaŭšy hetymi dadzienymi, ašukancy nieprykmietna zdymali hrošy z rachunkaŭ.
Ź liku zatrymanych vaśmiarym pradjaŭlenaje abvinavačvańnie ŭ zmovie z metaj machlarstva i admyvańni hrošaj, dvum -- tolki abvinavačvańni ŭ ašukanskaj zmovie. Jany zastajucca pad vartaj i siońnia pavinny ŭpieršyniu paŭstać pierad Viestminsterskim mahistrackim sudom Łondana. Jašče dzieviać čałaviek byli aryštavanyja pa toj ža spravie, ale adpuščany pad zakład.
Raniej paviedamlałasia ab aryšcie 19 čałaviek. Paźniej vyśvietliłasia, što pad vartu ŭ suviazi z tym ža rasśledavańniem uziaty jašče adzin padazravany, hramadzianin Hruzii. Jamu pradjaŭlenyja abvinavačvańni ŭ parušeńni zakona ab paśviedčańniach asoby. Jon taksama znachodzicca pad aryštam.
Uzrost zatrymanych ad 23 da 34 hadoŭ.
Kamientary