Pry mihreni nie spadziavajsia na kavu

«Hiemikranija» (u pierakładzie z hreckaj movy — «pałova hałavy»), abo mihreń — adno z samych raspaŭsiudžanych nieŭrałahičnych zachvorvańniaŭ. Pry im hałaŭnyja boli niaredka supravadžajucca parušeńniami zroku, śviatła- i hukabojaźziu, młosnaściu i vanitami.

Pavodle statystyki, ad mihreni pakutujuć, u asnoŭnym, ludzi va ŭzroście 18–35 hadoŭ, pryčym žančyny ŭ try razy čaściej, čym mužčyny. A častata i siła prystupaŭ napramuju zaležyć ad ich vahi: siarod chvorych na ciažkija formy mihreni kala 70% pacyjentaŭ majuć dyjahnaz «atłuścieńnie» i ŭ suviazi z hetym nadzvyčaj niezadavolenyja svajoj źniešnaściu.

Kab praduchilić čarhovy prystup, možna źviarnucca da lekaŭ. Efiektyŭnyja taksama hamieapatyja i mietady refleksaterapii (kłasičnaja akupunktura, šyjacu i h.d.).

Puskavym miechanizmam hetaj chvaroby moža źjavicca peŭny pach.

Adnak z dapamohaj pachaŭ mihreń možna i vylečyć — vodaraterapija pry pravilnym prymianieńni daje vielmi dobryja vyniki

(vodarakurylni, vanny, masaž z vykarystańniem efirnych alejaŭ, inhalacyi, raścirańni).

Reakcyja na pachi va ŭsich indyvidualnaja, tamu treba pravilna padabrać alei dla kankretnaha čałavieka. Pry mihreni vykarystoŭvajucca takija efirnyja alei, jak majaran, hierań, limon, hvaździka, bazilik, ramonak, eŭkalipt, razmaryn, chvoja, łavanda, miata, ruža, iłanh-iłanh. Raznastajny i mocny ŭpłyŭ akazvaje na čałavieka koler. Pry mihreni rekamiendujucca kolery sinie-zialonaj hamy.

Kab zrabić prystupy bolš redkimi i słabymi, a to i zusim pieramahčy chvarobu:

Abmiažujcie ŭžyvańnie praduktaŭ (syry, viandlinu, arechi, sasiski, šakaład, koka-kołu, kavu, ałkahol — asabliva suchija viny, šampanskaje, piva) i miedykamientaŭ (nitrahliceryny, antyhistaminnych preparataŭ, harmanalnych supraćzačatkavych srodkaŭ i inš.), jakija stymulujuć utvareńnie ŭ kletkach hałaŭnoha mozha sierataninu, a apošni spryjaje spazmu sasudaŭ.

Paźbiahajcie fizičnaj i razumovaj stomlenaści, stresavych situacyj, dušnych i nakuranych pamiaškańniaŭ. Zabiaśpiečcie sabie spakojny i dastatkova praciahły son.

Nie hrebujcie režymam dnia i dyjetaj, fizičnymi praktykavańniami, rehularnymi prahułkami na śviežym pavietry.

Padčas prystupu nie spadziavajciesia na kavu: ad kafieinu sasudy spačatku rezka zvužajucca, a potym pašyrajucca — i bol uspychvaje z novaj siłaj. Nie złoŭžyvajcie kańjakom: 50 h mohuć vyratavać, a 100 h — tolki pahoršyć stanovišča.

Pamiatajcie: sasudarasšyralnyja i abiazbolvalnyja preparaty pry mihreni nie rekamiendujucca.

***

Aŭstralijskija navukoŭcy, pravioŭšy ŭsiebakovyja daśledavańni na temu mihreni, pryjšli da vysnovy: heta zachvorvańnie — niervova-sasudzistaja reakcyja arhanizma, jakuju možna interpretavać jak nadzvyčaj čutki miechanizm, što abaraniaje mozh ad zanadta rezkich źmien unutranych i źniešnich razdražnialnikaŭ. Bol byccam by kampiensuje tyja adčuvańni, jakija čałaviek nie ŭ stanie abo nie choča vyjavić pa roznych padstavach: siamiejnych, prafiesijnych, siabroŭskich i h.d. Mihreń uźnikaje i tady, kali arhanizm patrabuje adpačynku. Atrymlivajecca, što, prymušajučy nas pakutavać, mihreń prynosić i karyść, achoŭvajučy arhanizm ad zališniaha cisku i dramatyzmu žyćciovych abstavinaŭ.

• 0
• 0
• 0
• 0
• 0
• 0
• 0
• 0