Čakajma samitu kryvych uśmiešak!

Moj papiaredni kamentar u błohu vyklikaŭ niečakanuju dyskusiju. Ź jaje vynikaje, što narod kančatkova zabłytali ŭ pytańni pra čarhovy samit SND.

Tamu varta patłumačyć sytuacyju.

Biełaruskaja dziaržaŭnaja presa nie adzin miesiac zvaniła, što jubilejnuju sustreču kiraŭnikoŭ Sadružnaści budzie prymać horad-hieroj Miensk. Lišni raz davodzili, što ŭ nas tut nie bałota izalacyi, jak paklopničajuć vorahi, a bujny centar mižnarodnaj palityki.

Naturalna, uvaha nie zavastrałasia na tym, što honaram prymać mierapryjemstva ciapierašniaje kiraŭnictva faktyčna abaviazanaje biełavieskamu zubru Šuškieviču. Biełaruś ža vybrali haspadyniaj forumu na znak taho, što mienavita tut 15 hadoŭ tamu "razvalili Sajuz".

Jak bačym, nahoda dla ŭračystaści sumnieŭnaja. Mała taho što našaje načalstva raz-poraz škaduje ab toj "najvialikšaj hieapalityčnaj trahiedyi 20-ha stahodździa", dyk ža i siońniašni kamatozny stan SND nia nadta natchniaje na śviatkavańnie.

Darečy, i epitet "iubilejny" ŭ dačynieńni da samitu, jaki planavaŭsia na 17 kastryčnika, padajecca naciažkaj. Bo, pa-pieršaje, Sajuz razvalili až u śniežni. A pa-druhoje, klasyčnymi jubilejami ličacca daty, kratnyja 50.

Ci dažyvie choć da pieršaha paŭnavartasnaha jubileju SND — pytańnie zusim nie vidavočnaje.

Ale heta ŭsio tak, à propos.

Fakt toje, što biełaruskaje kiraŭnictva rychtavałasia z entuzijazmam. Jašče 11 studzienia (!) Alaksandar Łukašenka, ładziačy naradu, zahadaŭ "zrabić usio naležnaje dziela taho, kab hodna pravieści hetaje mierapryjemstva".

Ale potym pačalisia vialikija prablemy ŭ dačynieńniach z Maskvoju. Biełaruski aficyjny kiraŭnik na presavaj kanferencyi 29 vieraśnia vykazaŭsia biez ekivokaŭ. A voś Kreml, musić, vyrašyŭ dziejničać biaz šumu i pyłu.

Praź ličanyja dni Pucin i Nazarbajeŭ vykazalisia za toje, kab adsunuć samit pad markaj niepadrychtavanaści. Analityki syšlisia na versii pra pomstu Kramla. Chacia dziela spraviadlivaści varta dadać, što moh paŭpłyvać i kanflikt z Hruzijaj: u jahony razhar ciažka było b ujavić Pucina i Saakašvili za adnym stałom.

Zrešty, vusnami Alaksieja Małašenki, eksperta Maskoŭskaha centra Karnehi, było skazana adkrytym tekstam, što "heta naš adkaz Łukašenku".

Maskva viedała, jak začapić ambicyi biełaruskaha kiraŭnika! Admietna, što toj navat u kazionna-aptymistyčnym anturažy "Dažynak" nie ŭtrymaŭsia ad sarkastyčnaje repliki, što "asobnyja dziaržavy ŭ SND ličać siabie dziaržavami pieršaha hatunku. Tak rabić nielha". Ale dadaŭ, što Biełaruś hatovaja pryniać samit "u lubym miescy Biełarusi".

Nieŭzabavie, niby dražniačysia, maskoŭskaje vydańnie "Vriemia novostiej" nadrukavała artykuł pad nazvaj "Miesca sustrečy źmianić možna". Inačaj kažučy, Maskva zrabiła jašče adzin infarmacyjny ŭdar, puściŭšy pahałosku, što forum mohuć zładzić nia tolki ŭ inšy čas, ale i ŭ inšaj krainie — Kazachstanie. Maŭlaŭ, jon taksama spryčyniŭsia 15 hadoŭ tamu da afarmleńnia Sadružnaści.

I chacia praz kolki dzion vykanaŭčy sakratar SND Rušajła trochi ŭłahodziŭ sytuacyju zajavaj pra toje, što mierapryjemstva projdzie najchutčej usio ž u biełaruskaj stalicy, — vidavočna, što haspadaram sapsavali ŭsiu malinu.

Ale ž źbiracca treba. Tak što čakajma samitu kryvych uśmiešak!

• 0
• 0
• 0
• 0
• 0
• 0
• 0
• 0