Łukašenka padaŭ dźvie dekłaracyi: na siabie i na žonku Halinu Radzivonaŭnu

Źviestki ab prybytkach i majomaści kandydataŭ u prezidenty buduć ahučanyja padčas ich rehistracyi na pasiadžeńni Centravybarkamu. Jano zapłanavanaje na 18 listapada. Pra heta paviedamiła kiraŭnictva CVK.

Dakumienty ab prybytkach i majomaści ŭsich 11 patencyjnych kandydataŭ nakiravanyja na pravierku ŭ kampietentnyja orhany. Pakul nie budzie vynikaŭ pravierki, u Centravybarkamie nie płanujuć rassakrečvać hetyja źviestki. Pretendenty padali dekłaracyi ab prybytkach i majomaści na siabie, a taksama na žonak i paŭnaletnich svajakoŭ, jakija žyvuć razam ź imi i viaduć ahulnuju haspadarku. Sakratar CVK Mikałaj Łazavik adznačyŭ:

«Navat spadara Pravalskaha, jaki nie vyłučany, tym nie mienš my i jaho dekłaracyju pasyłajem na pravierku. Tak zapisana ŭ zakonie. Łukašenka nie źjaŭlajecca vyklučeńniem, i jaho dakumienty praviarajucca. Było b niapravilnym ciapier raspaŭsiudžvać hetyja dadzienyja — z toj pryčyny, što my pavinny abnarodavać pravieranyja źviestki. Tamu pry rehistracyi 18 listapada hetyja źviestki buduć ahučanyja dla ŭsich».

Staršynia CVK Lidzija Jarmošyna taksama nie paviedamiła, jakija ličby značacca ŭ dekłaracyjach ab prybytkach i majomaści.

«Pakul kandydat nie zarehistravany, jon źjaŭlajecca pryvatnaj asobaj. I źviestki pra jahonyja prybytki nie padlahajuć apublikavańniu. I kali jon budzie zarehistravany, my ŭsio apublikujem u ŚMI pa kožnym ź ich».

Adnak Alaksandr Łukašenka — nie prosta pryvatnaja asoba, a jašče i dziaržaŭnaja. Pavodle spadaryni Jarmošynaj, tym nia mienš «jak prezident jon nie abaviazany publikavać hetyja dadzienyja». Maŭlaŭ, nielha patrabavać ad jaje ahałošvać toje, što jana «nie maje prava ahałošvać».

A jakija dakumienty padavaŭ Alaksandr Łukašenka, aproč svajoj dekłaracyi? Na heta Lidzija Jarmošyna skazała:

«Jon padaŭ dekłaracyju svajoj žonki. Jak i naležyć».

Karespandent: «A heta chto?»

Jarmošyna: «Heta Łukašenka Halina Radzivonaŭna».

Pavodle Lidzii Jarmošynaj, Alaksandr Łukašenka nie padavaŭ dekłaracyi na maci, bo jana, «vidać, ź im razam nie pražyvaje». Taksama niama dekłaracyj i na jahonych dziaciej, bo jany «pražyvajuć asobna, heta asobnyja siemji, i heta ciapier nie patrabujecca».

Na pytańnie, u kaho z kandydataŭ najbolšyja, a ŭ kaho najmienšyja prybytki, spadarynia Jarmošyna skazała:

«Ja hetaha nia pamiataju. Ale mahu skazać, što častka patencyjnych kandydataŭ naahuł nie maje nijakich prybytkaŭ».

Karespandent: «Jak, zusim nie padavali dekłaracyi?»

Jarmošyna: «Nie, jany padali, ale tam pusta. U ich ničoha niama, jany ničoha nie zarablajuć».

Lidzija Jarmošyna taksama nie paviedamiła, chto hetyja kandydaty. Adnak usio stanie viadomym padčas rehistracyi 18 listapada. Darečy, pry rehistracyi prysutnaść kandydataŭ na pasiadžeńni nie abaviazkovaja.

Padčas minułych vybaraŭ A.Łukašenka padaŭ dekłaracyi na maci, žonku, ciošču, synoŭ Viktara i Dźmitryja. Jahony dekłaravany hadavy prybytak składaŭ bolš za 59 miljonaŭ rubloŭ.

• 0
• 0
• 0
• 0
• 0
• 0
• 0
• 0