FRS ZŠA nadrukavała bolš za miljard brakavanych 100-dalaravych banknot

Urad ZŠA vydatkavaŭ amal 132 młn dalaraŭ na toje, kab nadrukavać hrošy, jakija nie mohuć być vykarystany. Z 1,1 młrd novych 100-dalaravych kupiur treciaja častka praz technałahičnuju pamyłku vyjaviłasia nieprydatnaj dla vykarystańnia.

Jak pieradaŭ telekanał CNBC sa spasyłkaj na krynicu va ŭradzie, novyja kupiury, jakija, jak ličyłasia, adpaviadali ŭsim sučasnym standartam i ŭtrymlivali biesprecedentnyja elemienty abarony, musili ŭbačyć śviet užo ŭ lutym. Adnak ich vypusk adkładzieny na niavyznačany termin, pakul FRS nie prydumaje, jak adździalić z masy nadrukavanych banknot brakavanyja.

A na sajcie Biuro hravijavańnia i druku — najbujniejšaha vytvorcy błankaŭ dla finansavych dakumientaŭ u ZŠA — źjaviłasia tłumačeńnie, što padčas druku banknot u adzinkavych vypadkach utvarajucca zmorščyny, što viadzie da ŭźniknieńnia na ich niepradrukavanych pałos.

Poŭny naminalny košt nieprydatnych banknot — 110 młrd dalaraŭ — heta bolš za 10% usich zapasaŭ amierykanskaj valuty na płaniecie,

Nadrukavanyja kupiury buduć zachoŭvacca ŭ schoviščach FRS u techaskim Fort-Uercie i ŭ Vašynhtonie, pakul nie budzie znojdzieny i źniščany ŭvieś brak. Pa padlikach FRS, kali sartavańnie budzie pravodzicca ŭručnuju, na heta moža syści 20–30 hadoŭ, a śpiecyjalnych aŭtamatyčnych pryładaŭ dla hetaha pracesu nie isnuje.

CNBC adznačaje, što košt druku kožnaj novaj banknoty skłaŭ 12 centaŭ — udvaja bolš, čym pry raniejšaj technałohii. Zaraz defiektnyja kupiury, kolkaść jakich składaje dziasiatki miljonaŭ, a naminalny košt — miljardy dalaraŭ, pavinny być źniščanyja. Straty padatkapłatnikaŭ tolki ad likvidacyi brakavanaj častki partyi składuć 120 miljonaŭ dalaraŭ. U jakuju sumu abydziecca pravierka banknot, nieviadoma.

Brakavanyja banknoty byli pieršymi, što źmiaščali podpis dziejnaha ministra finansaŭ ZŠA Cimaci Hajtniera. Kab pieraduchilić deficyt najaŭnych hrošaj — 100-dalaravyja kupiury, što ciapier u abarocie, sastareli, — FRS vyrašyła adnavić vytvorčaść hrašznakaŭ ciapierašniaha dyzajnu, na jakich staić podpis ministra finansaŭ va ŭradzie eks-prezidenta Buša Chenka Połsana. Jany nie majuć sučasnych sistem abarony.

100-dalaravyja kupiury — samyja raspaŭsiudžanyja, tamu ich čaściej za ŭsio padrablajuć za miežami ZŠA. Siońnia padrobkami źjaŭlajecca mienš za 0,01% ad ahulnaha abjomu amierykanskaj valuty, jakaja znachodzicca ŭ volnym zvarocie. Samym bujnym trymalnikam najaŭnych dalaraŭ za miežami ZŠA źjaŭlajecca Rasija.

• 0
• 0
• 0
• 0
• 0
• 0
• 0
• 0