TBM nie pierastaje spadziavacca na ŭłady, ale raźličvaje na zvyčajnych biełarusaŭ

Tavarystva biełaruskaj movy pryniało dźvie zajavy: adna nakiravanaja ŭ bok vysokich uładaŭ, druhaja źviernutaja da šarahovych biełarusaŭ. Prablemy, jakija niepakojać TBM: vyciaśnieńnie biełaruskaj movy z VNU i biednaść fondaŭ pravincyjnych biblijatek.

Pieršaja zajava vytrymanaja ŭ dyplamatyčnym duchu i źviernutaja da «ŭsich uładnych struktur». U pasłańni ŭźnimajecca prablema raptoŭnaha źniknieńnia biełaruskaj movy z vučebnych standartaŭ vyšejšaj škoły:

«U suviazi z raspracoŭkaj Ministerstvam adukacyi novych adukacyjnych standartaŭ u halinie vyšejšaj adukacyi istotna vidaźmianiŭsia błok sacyjalna-humanitarnych dyscyplin. Źmienšylisia jak abjom hadzin, tak i kolkaść dyscyplin sacyjalna-humanitarnaha błoku. U pryvatnaści, biełaruskaja mova ŭ vučebnych standartach, adpaviedna i ŭ płanach, adsutničaje zusim. Ministerstva adukacyi apraŭdvaje hetyja miery tym, što akcent pieranosicca na vyvučeńnie biełaruskaj movy ŭ škole».

TBM nie pahadžajecca z takim padychodam, robić akcent na tym, što školnych viedaŭ niedastatkova dla paŭnacennaha karystańnia movaj, a tym bolš karystańnia joju ŭ sfery abranaj studentam specyjalnaści, pra što śviedčyć nizki siaredni bał testavańnia. Da taho ž, adznačaje TBM, biaz pracy zastanucca vykładčyki.

Bolš za toje, u krokach Minadukacyi TBM bačyć pahrozu nacyjanalnym intaresam: «Ministerstva adukacyi nasupierak zajavam kiraŭnika dziaržavy metanakiravana vyvodzić biełaruskuju movu z usich sacyjalnych śfieraŭ. U ciapierašni składany palityčny čas takija niedaravalnyja akcyi Ministerstva nie tolki viaduć da duchoŭnaj katastrofy, ale i samym niepasrednym čynam staviać pad pahrozu niezaležnaść krainy, jaje aŭtarytet u śviecie».

TBM nie chaciełasia b rasčaroŭvacca ŭ ščyraści zajavaŭ kiraŭnika dziaržavy, jaki «nieadnarazova padkreślivaŭ, što biełaruskaja mova znachodzicca pad pilnaj dziaržaŭnaj apiekaj i kłopatam», ale «kali ž palityka rusifikacyi i nadalej budzie biespakarana praciahvacca, to ŭźniknuć spraviadlivyja sumnieńni ŭ ščyraści dekłaravanaj dziaržavaj padtrymki nacyjanalnaj movy i kultury».

❏

U druhoj zajavie Tavarystva biełaruskaj movy źviartajecca da suajčyńnikaŭ z prośbaj padpisać na biełaruskamoŭnyja vydańni (i ŭ tym liku na hazetu TBM «Naša słova») školnyja i viaskovyja biblijateki, a taksama rajonnyja muzei, tym bolš što naleta spaŭniajecca symbaličnaja dla biełaruskaj kultury data — 125 hadoŭ z dnia narodzinaŭ Janki Kupały i Jakuba Kołasa.

“My spadziajemsia na biełaruskich pradprymalnikaŭ i pradstaŭnikoŭ biźniesu, jakija nie paškadujuć hrošaj na prapahandu siarod vučniaŭ i studentaŭ, a taksama siarod viaskovych ludziej i haradžanaŭ rodnaha biełaruskaha słova. Tolki dziakujučy našym ahulnym namahańniam biełaruskaja mova budzie isnavać i pašyracca ŭ našaj krainie i śviecie”, — havorycca ŭ zajavie TBM

• 0
• 0
• 0
• 0
• 0
• 0
• 0
• 0