Jakaja nasamreč padtrymka ŭ Łukašenki

Centrvybarkam Biełarusi śćviardžaje, što za dziejnaha kiraŭnika dziaržavy prahałasavała amal 80% vybarščykaŭ, jakija pryjšli na ŭčastki. Ministr zamiežnych spravaŭ Polščy Radasłaŭ Sikorski nazvaŭ ličbu, udvaja mienšuju. A što nasamreč?

U takoj situacyi lubyja dadzienyja mohuć padviarhacca sumnievam. Daviarać viedamstvu Jarmošynaj niejak śmiešna. Ale ŭsio ž pasprabujem ŭziać za adpraŭnuju kropku dadzienyja CVK i rastłumačyć, čamu jany nie adpaviadajuć rečaisnaści.

Arhumient № 1

Vy idziacie dadomu. Jak vy patrapicie ŭ svaju kvateru: dastaniecie kluč i adčynicie dźviery abo pačniacie ŭzłomvać zamki?

Dziŭnaje pytańnie? A dla mianie nie mienš dziŭna inšaje.

Pavodle aficyjnych dadzienych, Alaksandr Łukašenka atrymaŭ padtrymku 80% vybarščykaŭ. Kali b heta sapraŭdy było tak, to kiraŭnik dziaržavy i jaho prychilniki byli b zacikaŭlenyja, kab biełaruskija i zamiežnyja naziralniki, što sumniavajucca va ŭsienarodnaj padtrymcy, asabista pierakanalisia ŭ tym, što čaćviora ź piaci hramadzian hałasujuć za Łukašenku.

Hetych «skieptykaŭ» treba było ciahnuć za vušy da miesca padliku hałasoŭ i nahladna demanstravać im kožny biuleteń,

Zamiest hetaha Łukašenka i całkam padkantrolnyja jamu vybarkamy prykłali kałasalnyja namahańni, kab i blizka nie padpuścić naziralnikaŭ da pracesu padliku. NAVOŠTA BYŁO TAK NAPRUŽVACCA, KALI VYNIKI HAŁASAVAŃNIA ŚVIEDČAĆ PRA PIERAKANAŬČUJU PIERAMOHU ŁUKAŠENKI? NAVOŠTA ŬZŁOMVAĆ DŹVIERY VA ŬŁASNAJ KVATERY, KALI JAJE MOŽNA ADKRYĆ KLUČOM?

Adkaz adzin: nijakaj pieramohi nie było.

Arhumient № 2

U Biełarusi i ŭ śviecie dastatkova raspaŭsiudžany taki punkt hledžańnia: viadoma, za Łukašenku hałasujuć nie 80%, ale dakładna bolš za 50% vybarščykaŭ. U jakaści adnaho sa śviežych prykładaŭ pryviadu mierkavańnie viadomaha niamieckaha palitołaha Alaksandra Rara.

Jak paviedamlaje Deutsche Welle, na publičnaj dyskusii ŭ Niamieckim tavarystvie zamiežnaj palityki pavažany ekśpiert zajaviŭ, što Łukašenka abapirajecca nie tolki na struktury ŭłady, ale i na šyrokija słai nasielnictva, jakija i sapraŭdy ščyra jaho padtrymlivajuć. U masiŭnyja falsifikacyi samoj pracedury vybaraŭ Alaksandr Rar nie vieryć. Pavodle jaho acenki, administracyjny resurs dazvalaje padtasavać padčas padliku nie bolš za 4–5 adsotkaŭ hałasoŭ, ale nijak nie 40 ci 50.

Niamiecki palitołah zychodzić z taho, što hałasy ŭ Biełarusi ličać. U jaho śviadomaść, mabyć, prosta, nie ŭkładvajecca dumka, što možna prosta ŭziać čysty list papiery, namalavać na im lubuju ličbu, abviaściŭšy jaje vynikam vybaraŭ.

Kab dakazać, što ŭ 2010 hodzie ŭ ciapierašniaha kiraŭnika dziaržavy nie było bolšaści hałasoŭ, vierniemsia ŭ 1994 hod. Tady navat u druhim tury vybaraŭ, pry praktyčna maksimalnaj mabilizacyi prychilnikaŭ Alaksandra Łukašenki i značnym pratestavym hałasavanni suprać prem'jer-ministra Viačasłava Kiebiča, za pieršaha prahałasavała 56% ad śpiskavaha składu vybarščykaŭ.

Siońnia Centrvybarkam sprabuje nas pierakanać, što ŭ 2010 hodzie za Łukašenku vykazalisia 72% ad śpiskavaha składu vybarščykaŭ. Chłopcy, pra što vy kažacie?

Kab nabrać chacia b 50%+1 ad liku hramadzian, jakija pryjšli na ŭčastki dla hałasavańnia, Łukašenku treba było jak minimum zachavać padtrymku na ŭzroŭni 1994 hoda. Ale tady jon karystaŭsia vidavočnaj šalonaj papularnaściu: na sustrečach z vybarščykami jamu całavali ruki, za Łukašenku išli hałasavać cełymi vioskami — jak na śviata. I hetak ža vidavočna, što ničoha takoha siońnia niama: ludziej «pad pałkaj» daviałosia zahaniać na daterminovaje hałasavańnie.

Pa darozie z vybarčaha ŭčastka ja sustreŭ svaju školnuju nastaŭnicu. Kab vy mahli ŭjavić sabie stupień jaje apalityčnaści, udakładniu: idučy hałasavać, jana nie viedała navat proźviščaŭ kandydataŭ (akramia Łukašenki, zrazumieła). I pry hetym hatovaja była padtrymać kaho zaŭhodna, ale tolki nie jaho.

U razmovie nastaŭnica padzialiłasia ŭłasnymi nazirańniami: «Usie, z kim razmaŭlaju (a jana žančyna tavaryskaja — A.S.) — suprać Łukašenki: i susiedzi, i ŭ transparcie…»

Nasamreč, «usie suprać» — heta, viadoma, pierabolšańnie. Ale, paŭtarusia, i toj papularnaści, jakaja była ŭ 1994-m, blizka niama. Adpaviedna, havorki nie idzie nie tolki pra 80%, ale i pra 50%.

***

Tady kolki ž?

Heta vielmi składanaje pytańnie. Ministr zamiežnych spravaŭ Polščy Radasłaŭ Sikorski zajaŭlaje pra 40%. Pry hetym jon spasyłajecca na nienazvanyja, ale vartyja davieru krynicy.

Navat samaje sumlennaje sacyjałahičnaje daśledavańnie naŭrad ci zdolnaje dać dakładny adkaz — praz faktaru strachu. Ujavicie sabie sučasnaha biełarusa, u jakoha nieviadomyja ludzi pytajuć, za kaho jon prahałasavaŭ. «A kali jany z KDB i daviedajucca, što ja suprać kiraŭnika dziaržavy? Nie-je, lepš užo ja zmaniu», — dumaje častka apytvanych.

Adpaviedna, luboje sacapytańnie budzie davać zavyšanyja ličby padtrymki Łukašenki.

Padsumoŭvajučy ŭsiu dastupnuju infarmacyju, ja b skazaŭ, što Łukašenka siońnia karystajecca padtrymkaj 30–35% nasielnictva (u Minsku — mienš, u rehijonach — bolš). Ale nie budu nastojvać na svajoj acency. Urešcie, nie maje pryncypovaha značeńnia: 20, 30 abo 45% hałasavali za Łukašenku.

Važna inšaje, u čym ja absalutna ŭpeŭnieny: hetym razam pałovy hałasoŭ u pieršym tury ciapierašni kiraŭnik krainy nie nabraŭ.

• 0
• 0
• 0
• 0
• 0
• 0
• 0
• 0