Ci atrymajecca Płošča-2?

Abjadnanyja demakraty vyłučajuć lozunh "My vierniemsia na płošču Kalinoŭskaha 19 sakavika 2007 hodu a 20-j hadzinie". Jaho buduć prapahandavać, karystajučysia ŭdziełam u miascovych vybarach.

Słohan hruvastki, takoje nie praskanduješ. Ale tekst možna šlifanuć, heta nie pytańnie. A pytańnie — ci atrymajecca Płošča-2?

Žadańnie apazycyjnych lideraŭ niejak zajavić pra siabie, pakazać, što kaalicyja jašče dychaje, — hety matyŭ całkam zrazumieły. Adnak jakaja matyvacyja budzie ŭ šarahovych hramadzianaŭ demakratyčnych pohladaŭ? Ci pašencić zapalić hetu publiku, nie anhažavanuju ŭ partyjnyja spravy, abstraktna pryhožaj idejaj Płoščy-2?

Palitolah Jury Čavusaŭ pryznaŭsia mnie, što prosta škaduje tych, chto pojdzie na miascovyja vybary pad śvincovym ciažaram dyrektyvaŭ apazycyjnych štaboŭ. Bo staviacca zadačy, jakija ciažka spałučyć. Pytańni miascovaj ułady — heta najpierš "bytoŭka", "sacyjałka". I razam z tym prapanujecca, umoŭna kažučy, revalucyjny scenar. Jak heta budzie vyhladać u adnym flakonie?

Kab vyvieści ludziej, treba mieć hruntoŭny plan metanakiravanaj pracy. Ci jość jon? I na što raźlik? Na toje, što da viasny rezka pahoršycca sacyjalna-ekanamičnaja sytuacyja? Ale nia fakt, što budzie mienavita tak, što padaražeńnie enerhanośbitaŭ nastolki chutka padpsuje malunak stabilnaści dy pastupovaha rostu dabrabytu.

Zrešty, moj inšy surazmoŭca — analityk Valer Karbalevič hladzić na zadumu Płoščy-2 z hledzišča budzionnaj palityčnaj prahmatyki. Jon stavić pytańnie tak: a jakija daty, jakija kalandarnyja padstavy možna ličyć zaraz najbolej prydatnymi dziela masavych akcyj?

Sapraŭdy, na Dzień voli ŭžo navat BNF abmiažoŭvajecca niejkimi kamernymi mierapryjemstvami. "Čarnobylski šlach", kładučy ruku na serca, taksama zaŭvažna straciŭ svaju enerhietyku.

Miž tym palityčnaja apazycyja, kab nie zastyć u letarhii, musić ładzić niejkija značnyja akcyi z peŭnaj peryjadyčnaściu, a nia tolki pad "revalucyjnuju sytuacyju", chiba nia tak?

Adnak raniej zhadany Jury Čavusaŭ miarkuje, što "ludzi zaraz najchutčej prosta nia vyjduć". Bo heta ž ryzyka trapić na sutki, stracić vučobu ci pracu...

Sapraŭdy, hod tamu byŭ momant palityčnaha ŭzrušeńnia. U dzień hałasavańnia na vybarach, chaj sabie jany naskroź niedemakratyčnyja, dziejnaja ŭłada na niejki čas padvisaje ŭ pavietry. Uźnikaje peŭny deficyt lehitymnaści... Tady Płošča moža niešta vyrašyć.

Narešcie, uviesnu 2006-ha mnohija išli, kažučy teatralnaj movaj, na Milinkieviča. Ciapier i rejtynh nia toj, i ź siabrami kaalicyi stasunki, zdajecca, daloka nie biazvobłačnyja... ("BiełPartyzan" śćviardžaje pra surjozny kanflikt eks-adzinaha z Partyjaj BNF, čyjoj kreaturaj Milinkieviča i ličać).

Dyk na kaho pojdzie publika 19 sakavika 2007 hodu?

Moža, inicyjatyvu pierachopić Anatol Labiedźka? Va ŭsiakim razie, na siońnia mienavita jon vyhladaje matoram idei zładzić Płošču-2.

Kaniešnie, ciažka zahadvać, ale nadta imavierna, što 19 sakavika 2007 hodu zusim nia budzie patychać revalucyjnaj sytuacyjaj. To bok mierapryjemstva nabyvaje rytualnuju afarboŭku. I možna zrabić dapuščeńnie, što mnohija z tych, chto, ryzykujučy, nasupierak zapałochvańniam, išoŭ na płošču minułaj viasnoj, kab kinuć vyklik režymu, — zaraz nie zachočuć padhulvać apazycyjnym lideram. Bo za sprobami znoŭ sabrać masu na ryzykoŭnaj terytoryi niepadalok ad aficyjnaj rezydencyi, peŭna, šmat chto ŭbačyć najpierš ichniaje žadańnie svojeasablivaj lehitymacyi: voś, hladziecie, jašče jość porach, možam vieści za saboj prychilnikaŭ pieramienaŭ!

Narešcie, čysta techničny momant. Pamiž dataj hałasavańnia na miascovych vybarach (14 studzienia) i hadavinaj Płoščy — vialiki pramiežak času, ceły miortvy sezon. Publika sto razoŭ zabudziecca na zakliki ahitataraŭ, a ŭvieś čas štučna razahravać jaje — tut i resursy, i kreatyŭ, i nahody patrebnyja. Ci šmat hetaha ŭ inicyjataraŭ?

Tak što ciažka skazać, nakolki ŭdałym stanie rymejk.

• 0
• 0
• 0
• 0
• 0
• 0
• 0
• 0