Žak Šyrak uznaharodziŭ Kazimira Śviontka

Svaim dekretam pan Žak Šyrak, Prezident Francuzskaj Respubliki, nadaŭ Jaho Eminencyi kardynału Kazimiru Śviontku zvańnie Kamandora Ordena Hanarovaha Lehijona.

Hetaja ŭznaharoda nadadziena čałavieku, jaki ŭ vačach francuzskich hramadzianaŭ uvasablaje saboj historyju biełaruskaha naroda apošnich siamidziesiaci hadoŭ.

Pavodle dadzienych Pasolstva Francyi ŭ Respublicy Biełaruś, kardynał Śviontek źjaŭlajecca pieršym i adzinym hramadzianinam Biełarusi, jakomu było nadadziena hetaje zvańnie z momantu abviaščeńnia dziaržaŭnaha suvierenitetu.

Orden Hanarovaha Lehijona, zasnavany Napaleonam Banapartam u 1802 hodzie, pryjšoŭ na źmienu karaleŭskamu ordenu Śviatoha Ludvika – pieršamu z francuzskich ordenaŭ, skasavanamu ŭ 1792 hodzie.

11 maja 1998 hoda takija samyja adznaki byli ŭručanyja kardynału Jozafu Ratcynhieru, siońniašniamu Papu Benedyktu XVI.

23 listapada 2006 hoda, a 18 hadzinie, u Rezidencyi Pasła Francyi ŭ Respublicy Biełaruś (v. Zacań, vuł. Rabińnickaja, 44), adbudziecca aficyjnaja cyrymonija ŭznaharodžańnia Jaho Eminencyi kardynała Kazimira Śviontka adznakami Kamandora Ordena Hanarovaha Lehijona.

Histaryčnaja daviedka

Orden Hanarovaha Lehijona – vyšejšaja vajskovaja i cyvilnaja ŭznaharoda Francyi. Jon byŭ zasnavany ŭ 1802 hodzie Napaleonam Banapartam, jaki staŭ pieršym jaho kavaleram, dla ŭznaharodžańnia cyvilnych i vajskovych asobaŭ za vydatnyja zasłuhi pierad nacyjaj u mirny i vajenny čas. Orden – heta nie prosta adznaka, ale i arhanizacyja ŭznaharodžanych kavaleraŭ. Uznačalvaje Orden Vialiki mahistr, jakim aŭtamatyčna stanovicca Prezident Francyi. Dekretam Prezidenta terminam na šeść hadoŭ pryznačajecca Vialiki kancler Ordena, jaki kiruje dziejnaściu Rady Ordena, sfarmavanaj z 14 kavaleraŭ uznaharody, pačynajučy ad stupieni kamandora.

Orden maje piać stupieniaŭ – kavaler, aficer, kamandor, vyšejšy aficer i kavaler Vialikaha kryža, jaki pryznačajecca za vyklučnyja zasłuhi.

Adnym ź pieršych kavaleraŭ Ordena Hanarovaha Lehijona staŭ Fransua-Pjer-Žozef Ame – udzielnik šmatlikavych bitvaŭ, u tym liku za Połack i pry pierapravie praź Biarezinu. Jaho imia vysiečana na Tryumfalnaj arcy ŭ Paryžy.

Siarod kavaleraŭ roznych stupieniaŭ Ordena znakamity inžynier Hiustaŭ Ejfiel, aŭtar dvuch samych viadomych pomnikaŭ – Ejfielevaj viežy ŭ Paryžy i statui Svabody ŭ Ńju-Jorku, a taksama zamiežnyja hramadzianie: niemka Marta Ryše – pieršaja žančyna, jakaja ŭ 1913 hodzie atrymała licenziju piłota, rasijanie Mścisłaŭ Rastrapovič, Halina Višnieŭskaja, Maja Plisieckaja.

Siarod uznaharodžanych taksama kardynał Jozaf Ratcynhier, siońniašni Papa Benedykt XVI, jakomu adznaki Kamandora Ordena Hanarovaha Lehijony byli ŭručanyja 11 maja 1998 hoda.

Apisańnie aficyjnaj cyrymonii

Pan Stefan Šmialeŭski, Nadzvyčajny i Paŭnamocny Pasoł Francyi ŭ Respublicy Biełaruś, taksama kavaler Ordena Hanarovaha Lehijona, skaža pramovu na francuzskaj movie ź pierakładam na biełaruskuju, jakaja zavieršycca nastupnaj frazaj: «Kazimir Śviontek! Ad imia Prezidenta Respubliki i dadzienymi nam paŭnamoctvami, nadajem Vam zvańnie Kamandora nacyjanalnaha Ordena Hanarovaha Lehijona». Paśla hetaj frazy pan Pasoł i adzin z supracoŭnikaŭ Pasolstva paviažuć vakoł šyi Kardynała załaty kryž Kamandora na punsovaj stužcy. Zatym słova budzie dadziena Jaho Eminencyi kardynału Śviontku, jaki skaža svaju pramovu na francuzskaj movie.

• 0
• 0
• 0
• 0
• 0
• 0
• 0
• 0