U aŭtorak urad Łatvii na zakrytaj častcy pasiedžańnia padtrymaŭ zabaronu na ŭjezd dla biełaruskich čynoŭnikaŭ.
U aŭtorak urad Łatvii na zakrytaj častcy pasiedžańnia ŭ pryncypie padtrymaŭ zabaronu na ŭjezd dla biełaruskich słužbovych asobaŭ, pry hetym u śfiery ekanamičnych sankcyj Łatvija zaklikaje aceńvać kožny prajekt supracoŭnictva asobna.
Pradstaŭnik MZS Iłze Juchansonie paviedamiła, što ŭrad zaćvierdziŭ pazicyju Łatvii, jakuju kraina zojmie na naradzie ministraŭ zamiežnych spravaŭ ES 31 studzienia, dzie jaje budzie pradstaŭlać ministr zamiežnych spravaŭ Hirts Vałdzis Krystoŭskis.
Adnym z hałoŭnych pytańniaŭ na naradzie budzie ŭviadzieńnie sankcyj u dačynieńni da Biełarusi.
Da narady rychtujecca rašeńnie ab adnaŭleńni zabarony na ŭjezd dla biełaruskich słužbovych asobaŭ, u tym liku dla prezidenta Alaksandra Łukašenki, supracoŭnikaŭ milicyi i žurnalistaŭ. Havorka idzie pra śpis prykładna z 160 čałaviek, choć pamiž krainami ES jašče praciahvajucca dyskusii pra tych, chto budzie ŭ jaho ŭklučany.
Juchansonie paćvierdziła, što Łatvija ŭ pryncypie padtrymlivaje zabaronu na ŭjezd u ES dla biełaruskich słužbovych asobaŭ.
«My ŭžo nieadnarazova vykazvali mierkavańnie, što Jeŭrasajuzu nieabchodna adreahavać na ŭžyvańnie siły paśla prezidenckich vybaraŭ», — padkreśliła jana, adznačyŭšy niedapuščalnaść zatrymańnia apazicyi pa palityčnych matyvach.
Adnačasova Łatvija zaklikaje ŭvažliva aceńvać toje, jak ES praciahnie padtrymlivać kantakty ź Biełaruśsiu, nie dapuskajučy, kab paciarpieła hramadstva, supracoŭnictva ŭ śfiery adukacyi i raźvićcio demakratyčnaha pracesu.
Kamientujučy łatvijskuju pazicyju adnosna ekanamičnych sankcyj suprać Biełarusi, Juchansonie skazała, što nie varta padtrymlivać liniejny padychod, heta značyć, prypynieńnie ŭsich prajektaŭ supracoŭnictva, biez acenki, nakiravanyja jany na ŭmacavańnie centralnaha aparata abo na śfieru navučańnia.
«Varta aceńvać kožny kankretny prajekt, kab my z dapamohaj liniejnaha padychodu nie pahoršyli situacyju», — skazała jana.
Kamientary