Śmiarotnik z Damadziedava pomściŭ za siastru

Śmiarotnika Mahamieda Jaŭłojeva, jaki ŭčyniŭ 24 studzienia terakt u maskoŭskim aeraporcie «Damadziedava», pravodzili ŭ Maskvu siabar, brat i siastra — udava zabitaha śpiecsłužbami bajevika. Mahamied Jaŭłojeŭ syšoŭ u partyzany paśla začystki, jakuju FSB praviało ŭ jaho rodnaj vioscy Ali-Jurt.

Jak ličać ekśpierty, pryčyny sychodu Jaŭłojeva ŭ les da bajevikoŭ i pieratvareńnie jaho ŭ śmiarotnika varta šukać u začystcy, praviedzienaj śpiecsłužbami ŭ siale Ali-Jurt, u jakoj paciarpieli jaho rodnyja. Apošniaj kroplaj mahło stać zabojstva fiederałami muža siastry ŭ žniŭni minułaha hoda.

U aryštavanych u minuły aŭtorak 16-hadovaha Achmieda Jaŭłojeva, 22-hadovaj Facimy Jaŭłojevaj i 22-hadovaha žychara vioski Ali-Jurt Nazranaŭskaha rajona Inhušecii Umara Aušava padčas śledčych dziejańniaŭ na rukach znajšli ślady hieksahiena, jaki ŭvachodzić u skład płastyta, ź jakoha składaŭsia pojas śmiarotnika. Usich traich Mahaski rajonny sud aryštavaŭ na dva miesiacy pa padazreńni ŭ zabojstvie (artykuł 105 KK RF), teraryźmie (art. 205), niezakonnym abarocie zbroi i bojeprypasaŭ (art. 222) i niezakonnym vyrabie zbroi (art. 223).

Za piać dzion da teraktu 20-hadovy Mahamied Jaŭłojeŭ, jaki syšoŭ z chaty i dałučyŭsia da bajevikoŭ letam minułaha hoda, viarnuŭsia ŭ Ali-Jurt, dzie atrymaŭ ad svajakoŭ vybuchovuju pryładu.

Pa słovach siastry śmiarotnika Facimy, mienavita Aušaŭ advioz Mahamieda na svaich «Žyhulach» na aŭtavakzał, adkul toj pajechaŭ u Maskvu. Napiaredadni stała viadoma, što ekśpiertyza DNK paćvierdziła: terakt u «Damadziedavie» sapraŭdy ŭčyniŭ Mahamied Jaŭłojeŭ.

Pavodle viersii śledstva, Jaŭłojevy i Aušaŭ pastajanna padtrymlivali suviazi z bajevikami da vybuchu ŭ «Damadziedavie». U pryvatnaści, ŚMI vyśvietlili, što Facima Jaŭłojeva była žonkaj adnaho ź lidaraŭ plijeŭskaj bandhrupy Biekchana Bahatyrova, źniščanaha 12 žniŭnia 2010. Aŭtamabil, u jakim jechali Bahatyroŭ i «amir» bajevikoŭ Charon Plijeŭ, u pasieliščy Plijeŭ abstralali supracoŭniki FSB.

Pakinuŭšy mašynu, bajeviki schavalisia ŭ siale, adnak ad ciažkich ranieńniaŭ, atrymanych padčas pierastrełki, jany nieŭzabavie pamierli. U kinutym aŭtamabili była znojdzienaja samarobnaja vybuchovaja pryłada mahutnaściu 12 kh traciłu. Heta dazvoliła śpiecsłužbam zajavić ab pieraduchileńni bujnoha teraktu.

Pa słovach baćkoŭ, Mahamied Jaŭłojeŭ syšoŭ z chaty praz dva tydni paśla hetaj śpiecapieracyi — 31 žniŭnia. Małady čałaviek skazaŭ ŭsim, što jedzie na zarobki ŭ Krasnadarski kraj, a sam dałučyŭsia da bajevikoŭ, što chavalisia ŭ lasach. Razam ź Jaŭłojevym, pa niekatorych dadzienych, u les pajšli jašče niekalki žycharoŭ vioski Ali-Jurt. Urešcie jany zrabilisia členami bandy byłoha sunžanskaha emira Chamzata, jaki ŭznačalvaje bryhadu śmiarotnikaŭ «Imarata Kaŭkaz».

Pavodle źviestak «Kommiersanta», bombu, jakuju Jaŭłojeŭ padarvaŭ 24 studzienia ŭ «Damadziedavie», mahli vyrabić u susiednim z Ali-Jurtam pasieliščy Ekažava, u domie svajaka Biekchana Bahatyrova — Barysa Bahatyrova. Paśla vyjaŭleńnia tam vybuchovych pryład Barysa Bahatyrova abjavili ŭ vyšuk.

Pryčyny sychodu Jaŭłojeva da bajevikoŭ šukajuć u začystcy ŭ Ali-Jurcie

Jak piša vydańnie «Hazieta.ru», ekśpierty sprabujuć rastłumačyć, što prymusiła hrupu maładych ludziej z Ali-Jurta, siarod jakich byli Mahamied Jaŭłojeŭ i Adam Hanižaŭ, zatrymany ŭ minuły aŭtorak sudom Mahasa na 72 hadziny, dałučycca da bajevikoŭ.

Jak vyśvietliła vydańnie, u lipieni 2007 hoda proźviščy Jaŭłojevych i Hanižavych fihuravali ŭ śpisie paciarpiełych ad začystki śpiecsłužbaŭ. Śpiecapieracyja była praviedzienaja fiederałami paśla abstrełu administracyi prezidenta Inhušecii i budynka FSB ŭ Mahasie. Jak tady vyśvietlili, stralanina viałasia z boku vioski Ali-Jurt. Pavodle dadzienych pravaabaroncaŭ,

niekalki čałaviek, u tym liku padletki, žančyny i muła byli mocna źbityja, niekalki dziasiatkaŭ čałaviek zatrymali.

Žychary Ali-Jurta źviarnulisia ŭ sud, ale vinavatych u źbićci nie znajšli. Ciapier ich pozvu razhladaje Jeŭrapiejski sud pa pravach čałavieka ŭ Strasburhu. Jak adznačajuć pravaabaroncy, jak praviła, atrady śmiarotnikaŭ papaŭniajuć maładyja ludzi, čyje svajaki byli zabityja, vykradzienyja albo paciarpieli ad žorstkich dziejańniaŭ śpiecsłužbaŭ.

Jak ličyć kiraŭnik pravaabarončaj arhanizacyi «Miemaryjał» Cimur Akijeŭ, začystka u Ali-Jurcie całkam mahła stać šturškom dla taho, kab małady čałaviek dałučyŭsia da atrada, pierakanaŭšysia ŭ tym, što vinavatych u złačynstvie nie znojduć i nie pakarajuć. Mahčyma, apošniaj kroplaj u rašeńni Jaŭłojeva syści ŭ les stała zabojstva fiederałami muža siastry.

Nahadajem, raniej presa pisała, što jašče adnym matyvam sychodu Jaŭłojeva z domu mahło stać niaščasnaje kachańnie. Pierad svaim źniknieńniem Mahamied raźvioŭsia z 16-hadovaj hramadzianskaj žonkaj Marjam. Razam maładyja ludzi pražyli ŭsiaho piać miesiacaŭ. Mahamied i Marjam pasvarylisia paśla taho, jak jon pačuŭ, što jana razmaŭlaje pa telefonie sa svaim byłym chłopcam. Mahamied učyniŭ skandał, dziaŭčyna paskardziłasia na muža baćkam.

Paśla hetaha baćka zabraŭ Marjam dadomu. Pa słovach mužčyny, siamju pakryŭdziła jašče i toje, što Jaŭłojevy nie vykanali svajho abiacańnia — pasłać ich dačku vučycca. Pakolki Marjam była niepaŭnaletniaj, šlub nie byŭ zarehistravany. Maładyja ludzi prosta raźjechalisia i vyzvalili adzin adnaho ad abaviazańniaŭ. Jak raskazaŭ haziecie «Komsomolskaja pravda» znajomy Jaŭłojeva, ciapier Marjam nie znachodzić sabie miesca — dumaje, što jość i jaje vina ŭ tym, što Mahamied zrabiŭsia bandytam.

• 0
• 0
• 0
• 0
• 0
• 0
• 0
• 0