Elektronnyja płanšety zamiest padručnikaŭ

Nakolki heta realna? Raźbiraŭsia karespandent «NN».

Ministerstva adukacyi vystupiła ź niečakanaj inavacyjnaj prapanovaj— zamianić školnyja padručniki na elektronnyja płanšety. U pamiaci pryłady maje zachoŭvacca infarmacyja z usich padručnikaŭ za 1–11 kłasy. Takuju ideju ahučyŭ pieršy namieśnik ministra adukacyi Alaksandr Žuk. Zhodna ź jaho słovami, prajekt budzie zapuščany spačatku ŭ adnoj z vobłaściaŭ, a paśla pašyrycca na ŭsiu krainu.

Što takoje płanšety, abo płanšetnyja kampjutary? Heta maleńkija kampjutary z sensarnym ekranam, za jakimi pracujuć biez kłavijatury i myški. Na ekran naciskajuć palcami abo styłusam — stryžniem z zavostranym kancom.

Dać pracu «Intehrału»

Hałoŭnaja meta prahramy — aščadžeńnie dziaržaŭnych hrošaj. Čynoŭniki padličyli, što kali chacia b častkova admovicca ad vypusku padručnikaŭ, možna zachavać $7 miljonaŭ. I ŭ dadatak nahruzić pracaj «Intehrał» i BDU z BDUIRam. Na zavod chočuć «paviesić» vypusk novych hadžetaŭ, a na ŭniviersitety — raspracoŭku prahramnaha zabieśpiačeńnia.

Voś tolki nichto, aproč Ministerstva adukacyi, nakont idei vytvorčaści płanšetaŭ — ni snom ni ducham.

Nie admaŭlajučy samu ideju vypusku takoha abstalavańnia, supracoŭniki «Intehrała» taktoŭna namiakajuć — nas biez nas ažanili. «Nichto navat tearetyčna nie praličvaŭ mahčymaść vypusku «navučalnych płanšetaŭ», — paviedamlajuć u adździele zbytu pradpryjemstva. U internecie źjaŭlajucca mierkavańni, što vypusk «biełaruskich» płanšetaŭ moža źvieścisia da naklejvańnia cetlika «Intehrał» na madeli kitajskaj vytvorčaści. Tak užo byvała, naprykład, z manitorami. Pakul zavod nie maje ni adpaviednych technałohij, ni vytvorčych mahčymaściaŭ.

A kali elektronnaja kniha?

Što da aščadžeńnia biudžetnych srodkaŭ, to varta paraŭnać pakupku adnaho płanšeta i adzinaccaci kamplektaŭ padručnikaŭ za kožny kłas. Pa letašnich rascenkach

baćki vučnia vydatkoŭvali 210 tysiač rubloŭ ($70) za ŭsie hady navučańnia

samy niedarahi płanšetny kamputar kaštuje kala 500 tysiač rubloŭ — 170 dalaraŭ. Ale jość jašče adzin varyjant, jaki moža zamianić padručniki — elektronnaja kniha koštam ad $120.

U jaje isnuje istotnaja pieravaha pierad płanšetami — zrok školnikaŭ budzie psavacca nie tak chutka.

Naprykład, amierykanskaja anłajn-kniharnia amazon.com prapanuje elektronnyja knihi Kindle ekranam e-ink za $139 z ubudavanym wi-fi. Pry vykarystańni hetaj technałohii ekrana vočy stamlajucca nie bolš, čym ad čytańnia zvyčajnaj papiarovaj knihi.

Sinhapur chvalić, Rasija łaje

Prajekt moža całkam zapracavać nie raniej, čym praź dziesiać hadoŭ, pryznajuć u Minadukacyi. Čynoŭniki abiacajuć uličvać dośvied inšych krainaŭ. Naprykład, Sinhapura i Paŭdniovaj Karei. Tam pačali realizoŭvać padobny prajekt try hady tamu. «Paddoślednymi trusikami» stali vučni pačatkovych kłasaŭ. Z padobnymi prapanovami vystupali i kazachstanskija čynoŭniki. A voś u Rasii prajekt «płanšetyzacyi» siabie nie apraŭdaŭ.

Sama ideja pierachodu ad papiarovych padručnikaŭ da kampjutarnych vyhladaje cikavaj i zachaplalnaj. Ź ciaham času jana ŭsio adno musić realizavacca. Voś tolki zaraz taki pierachod uprecca ŭ proćmu nievyrašalnych pytańniaŭ. Što rabić z techničnym absłuhoŭvańniem płanšetaŭ, bo niemaładyja nastaŭniki naŭrad ci raźbiarucca ŭ ich. Jak nie apynucca ŭ situacyi, što dzieci na ŭrokach buduć hulać u stralałki? Jak, u rešcie rešt, harantavać, što padčas pierapynka płanšet nie zvalicca z party i baćkoŭskija $300 nie razabjucca ab padłohu biełaruskaj škoły.

• 0
• 0
• 0
• 0
• 0
• 0
• 0
• 0