Cud nad hramadzianami Rasii z Płoščy — sprava razvaliłasia?

Praces praciahniecca 1 sakavika ŭ suviazi ź pierakvalifikacyjaj abvinavačvańnia.

16:32

Hramadzianski pazoŭnik admoviŭsia ad pazovu na 14 miljonaŭ rubloŭ paśla taho, jak sudździa prademanstravała kvitancyi ab apłacie hramadzianami tych samych 14 młn rubloŭ.

Prakuror prosić pieranieści praciah suda na 7 dzion, kab pierakvalifikavać abvinavačvańnie.

Sud praciahniecca ŭ aŭtorak, 1 sakavika, pačatak, a 10-j.

16^31

Sudździa apytvaje Haponava, da jaho pytańniaŭ mienš, bo na videa Ivan amal nie fihuravaŭ.

16.29

Breus u razmovie z advakatam zajaviŭ, što sproba «šturmu» Doma Ŭrada doŭžyłasia niekalki chvilin, a potym užo nichto nie sprabavaŭ jaje adnavić. Sam Breus byŭ zaniaty svajoj traŭmaj, kali pačaŭsia razhon, jaho zatrymali i zaciahnuli ŭ aŭtazak.

16:27

Sudździa pytaje ŭ Haponava, čamu jon byŭ na Płoščy. Ivan adkazvaje toje ž, što i Breus. Kaža, što jamu prosta było cikava.

16:24

Sudździa pytajecca ŭ Breusa, jak jon aceńvaje padziei 19 śniežnia. Toj adkazvaje, što ničoha takoha raniej nie bačyŭ, viedaŭ, što nie źbirajecca parušać zakon, a samo znachodžańnie na płoščy Niezaležnaści jon nie ličyŭ jaho parušeńniem.

16:19

Advakaty zadajuć pytańni śviedku Jakaŭlevu. Reč u tym, što ŭ pratakole čas zatrymańnia Breusa paznačyŭ Jakaŭleŭ na 22:30. Ale na videa chłopiec bačny na Płoščy jašče ŭ 22:35. Śpiecnazaviec pryznaŭsia, što nie viedaje, a jakoj nasamreč jon zatrymlivaŭ Arcioma.

16:14

Skončyli hladzieć videa.

Nijakich dokazaŭ viny Breusa i Haponava tam niama.

15:48

Sudździa znoŭ uhledzieła na videa Breusa. Bačna, jak jon padaje ad šturchaniny ŭ natoŭpie. Sam Breus kaža, što drenna pamiataje hetym momant, spasyłajecca na mocnyja ŭdary pa hałavie, jakija atrymaŭ ad śpiecnazaŭcaŭ.

15:41

Śviedka-śpiecnazaviec (kali chto zabyŭ proźvišča — Jakaŭleŭ), hulajučysia z mabilnikam, ŭpuściŭ jaho na padłohu — narabiŭ hrukatu.

Sudździa tym časam praciahvaje prahlad videa, ale bolš ni Breusa, ni Haponava tam pabačyć nielha.

15:33

Na videa taksama bačna, što Haponaŭ baronicca ad śpiecnaza, zasłaniajecca vyciahnutaj napierad rukoj.

Kadraŭ, dzie było b bačna, jak hramadzianie Rasiei bjuć supracoŭnikaŭ śpiecnaza, niama.

15:28

Sudździa paznała Breusa na videa. Pakazała jamu hetyja kadry — jon paćvierdziŭ, što heta moža być jon. Na videa bačna, što Breusa šturchajuć inšyja ŭdzielniki akcyi.

Haponaŭ taksama siabie paznaŭ. Na videa jon staić. Napierad nie ruchajecca, jaho taksama šturchajuć zzadu mitynhoŭcy. Na videa šmat ludziej i tvaraŭ. Razabrać, što tam adbyvajecca, składana.

15:26

Videa idzie biez huku. Mahčyma, dziela taho kab paźbiehnuć kazusu, jak u vypadku z Parfiankovym, kali było čutno, jak supracoŭniki śpiecsłužbaŭ kryčali «Svaje, svaje!».

15:21

Abodva śviedki-milicyjaniery siadziać pobač z zale — im prynieśli admysłovyja miakkija fateli. Hladziać videa i pierašeptvajucca miž saboj.

15:17

Sudździa pačynaje hladzieć videazapis z Płoščy. Hladzić na vialikim televizary «Haryzont».

15:07

Charaktarystyki na Haponava i Breusa stanoŭčyja. Raniej nie pryciahvalisia navat da administracyjnaj adkaznaści, nie stajać na ŭliku ŭ milicyi i psichanieŭrałahičnym dyspansiery. Psichałahičnyja charaktarystyki taksama stanoŭčyja.

15:04

Sudździa začytała pratakoły pieratrusaŭ, jakija adbylisia ŭ Haponava i Breusa doma paśla ich zatrymańnia.

Pavodle pratakołaŭ, supracoŭniki śpiecsłužbaŭ pa miescy žycharstva padazravanych ničoha nie znajšli i ničoha nie kanfiskoŭvali.

14:50

Zaraz budzie ahučany pratakoł ahladu miesca padziej, a taksama začytajuć charaktarystyki na abvinavačanych.

14:48

U zału suda zapuścili žurnalistaŭ, praces adnaviŭsia.

13:34

Abvieščany pierapynak da 14.35.

13:29

Začytali pakazańni śviedkaŭ śledstva. Cikava, što jany supadajuć całkam u abodvuch śviedkaŭ, a ich pakazańni na sudzie adroźnivajucca. Jakaŭleŭ tłumačyć heta tym, što paprostu zabyŭsia ŭžo na padrabiaznaści.

13:25

Advakat zahnaŭ Jakaŭleva ŭ tupik, i jon prosta zamaŭčaŭ.

Sudździa sprabuje damahčysia ad śviedki adkazaŭ. Zaraz buduć čytać pakazańni Jakaŭleva, dadzienyja padčas śledstva 31 studzienia 2011 hoda.

13:23

Jakaŭleŭ na sudzie nie moža raskazać, što rabiŭ Haponaŭ, a što Breus. Chacia padčas śledstva heta dakładna tłumačyŭ. U raparcie jon paznačyŭ, što Breus biŭ śpiecnazaŭcaŭ. Zaraz kaža, što dakładna nie moža skazać, chto što rabiŭ na Płoščy. Jak mantru paŭtaraje pra toje, što na Płoščy było 400–500 aktyŭnych mitynhoŭcaŭ i jany ŭsie bili śpiecnaz rukami i nahami.

13:12

Sudździa nahadała śviedku Jakaŭlevu pra kryminalnuju adkaznaść za chłuślivyja pakazańni.

Śpiecnazaviec razhubiŭsia kančatkova.

Pryznaŭ, što na hadzińnik nie hladzieŭ, a čas vyznačaŭ prykładna. Pry hetym padčas śledstva jon davaŭ kankretnyja pakazańni. Sudździa padrabiazna raspytvaje jaho pra heta,

Jakaŭleŭ nie moža dać adkaz na bolšaść pytańniaŭ.

13:00

Jakaŭleŭ taksama błytajecca ŭ časie zatrymańnia Breusa i Haponava. Raźbiežka składaje 30 chvilinaŭ.

12:49

Advakat paprasiła śviedku apaznać abvinavačanych, jon nazvaŭ proźviščy. Ale kali advakat paprasiła śpiecnazaŭca pakazać, chto ź ich chto,

Jakaŭleŭ upeŭniena pierabłytaŭ abvinavačanych.

Nazvaŭ Breusa Haponavym i naadvarot. U zale pačali śmiajacca.

Uvohule Jakaŭleŭ vielmi niaŭpeŭniena daje pakazańni. Nie moža adkazać na bolšaść pytańniaŭ.

Prakuror Siarhiej Kunas jamu padkazvaje pravilnyja adkazy.

12:41

Śviedka kaža, što demanstranty na praciahu piaci chvilin bili śpiecnazaŭcaŭ nahami, rukami i vudami. Kaža, što jany chacieli zachapić Dom urada.

Kaža, što jamu asabista pabili nohi. Bili rukami, nahami, adabranymi ŭ śpiecnaza dubinkami.

12:35

Pačaŭsia dopyt druhoha śviedki — supracoŭnika pałka milicyi śpiecyjalnaha pryznačeńnia Alaksandra Jakaŭleva.

12.30

Dudarčyk zajaŭlaje, što razmaŭlaŭ z Haponavym na Akreścina. Sam Haponaŭ kaža, što nie viedaje Dudarčyka i nie pamiataje nijakaj razmovy ź im. Breus taksama zajaviŭ, što nie viedaje Dudarčyka. Kaža, što ŭsie supracoŭniki milicyi byli ŭ šlemach i chavali tvary.

12:17

Sudździa raspytvaje śviedku, dzie i kali jon znachodziŭsia. Dudarčyk błytajecca i nie moža nazvać kankretny čas. Błytajecca navat u roźnicy na 30 chvilin. Kaža, što da 22-j hadziny byŭ na Kastryčnickaj płoščy. Ale padčas śledstva jon kazaŭ, što ŭ žo, a 21.30 byŭ na Płoščy Niezaležnaści.

12:14

Dudarčyk nie zdoleŭ adkazać, kali jon bačyŭ Breusa i Haponava, a taksama kolki času jon znachodziŭsia na Płoščy, taksama nie zdoleŭ adkazać, čamu jaho pakazańni śledčamu i ŭ sudzie adroźnivajucca. Śledčamu Dudarčyk skazaŭ pra piać udaraŭ pa ščytach i pra ŭdary vudaj.

Taksama ŭ raparcie Dudarčyk pisaŭ pra antydziaržaŭnyja łozunhi «Žyvie Biełaruś!».

12:02

Breus pytajecca Dudarčyka,

čamu toj nie achoŭvaŭ Dom urada, a ličyŭ, kolki ŭdaraŭ demanstranty nanieśli pa ščytach śpiecnazaŭcaŭ.

Dudarčyk ničoha nie moža adkazać.

11:59

Śviedka apaznaŭ Breusa i Haponava i navat nazvaŭ ich proźviščy. Śviedka kaža, što bačyŭ, jak Breus biŭ śpiecnazaŭcaŭ pa ščytach (kaža pra dva ŭdary). Taksama padkreślivaje, što pamiataje Haponava — jon biŭ pa ščytach śpiecnazaŭcaŭ. Dudarčyk navat zdoleŭ uzhadać, jak byli apranutyja Breus i Haponaŭ. Taksama zaznačaje, što bačyŭ Breusa i Haponava na videa i moža ich apaznać.

11:54

Dudarčyk kaža, što demanstranty napadali na śpiecnazaŭcaŭ, vychoplivali ŭ iz dubinki i źbivali potym milicyjantaŭ.

Taksama kaža, što asoby, jakija šturmavali Dom Urada, dziejničali niaŭzhodniena. Butelek i armatury jon nie bačyŭ.

11:46

Sud adnaviŭsia. Pačaŭsia dopyt śviedki Aleha Dudarčyka. Jon milicyjanier, pracuje ŭ Hałoŭnym upraŭleńni unutranych spraŭ Minharvykankama.

11:20

Abvieščany pierapynak na 10 chvilin, da 11:30.

11:18

Hramadzianski pazoŭnik kaža, što pretenduje nie na 29 młn, a na 14 młn, bo była zroblena pieraacenka. Taksama skazaŭ, što ŭčora hramadzianie pradastavili hramadzianskamu pazoŭniku dakumienty ab apłacie 14 miljonaŭ, i siońnia jany čakajuć pastupleńnia hrošaj. Pry hetym jon nie skazaŭ, ci admoviacca ad patrabavańniaŭ u vypadku pastupleńnia srodkaŭ.

11:15

Sudździa apytvaje pradstaŭnika hramadzianskaha pazoŭnika Dźmitryja Lepieša.

11:11

Breus padčas hutarki z advakatkaj Kazak raspavioŭ, što padčas utrymańnia ŭ śledčym izalatary na Vaładarcy

śledčyja jamu pahražali fizičnaj raspravaj, kali jon nie pryznajecca z zmovie z kiraŭnikami biełaruskaj apazicyi.

11:05

Breus raskazvaje, što bačyŭ, jak śpiecnaz źbivaŭ ludziej i nie dazvalaŭ im razyścisia.

Zaraz Breusa apytvaje advakat, toj raskazvaje, jak jaho źbivaŭ śpiecnaz i jak jon straciŭ prytomnaść.

10:58

Prakuror pačaŭ dopyt Breusa. Toj kaža, što ŭ palityčnych arhanizacyjach nie ŭdzlničaje. Zaznačaje, što trapiŭ na akcyju vypadkova, tam zachapiŭsia i pajšoŭ z usimi u bok Płoščy Niezaležnaści. Chto kiravaŭ — jon nie viedaje,

u rukach demanstrantaŭ zbroi i butelek nie bačyŭ.

Kaža, što kryknuŭ łozunhi «Žyvie Biełaruś!».

10:40

Prakuror skončyŭ dopyt Haponava. Ciapier ź im raŭmaŭlaje advakat. Haponaŭ zajaviŭ, što nie bačyŭ u prysutnych na płoščy ludziej u rukach niejkich pradmietaŭ, a taksama nie bačyŭ, chto bje škło, tolki čuŭ huk pabitaha škła.

10:36

Haponaŭ kaža, što nie bačyŭ, chto bje škło, nie viedaje palitykaŭ, jakija kiravali mitynham z trybuny. Kaža, što ludzi nie supraciŭlalisia śpiecnazu.

Supracoŭniki milicyi ŭ zale suda pilna sočać za fota i videa. Karespandenta NN prymusili apuścić telefon na ŭzrovień kaleniaŭ, kab jon nie moh vykarystoŭvać fotakamieru mabilnika.

10:34

Haponaŭ: «Ja vykrykvaŭ: «Žyvie Biełaruś».

10:29

Vinavaciać taksama va ŭzbrojenym supracivie śpiecnazu z vykarystańniem admysłovych pryładaŭ (mahčyma, majecca na ŭvazie armatura). Haponaŭ kaža, što z Breusam znajomy nie byŭ, u partyjach nie ŭdzielničaŭ. Ciapier prakuror apytvaje jaho ab padziejach 19-ha śniežnia.

Pytańni prakurora dastatkova ahresiŭnyja, jon ich amal vykrykvaje,

staŭleńnie da Haponava niehatyŭnaje; prakuror dazvalaje sabie zaŭvahi, jakija datyčać asoby Haponava.

10:26

Breusa prakuror Siarhiej Kunas vinavacić u aktyŭnym udziele ŭ biesparadkach, paškodžańniach Doma ŭrada, supraciŭleńni supracoŭnikam unutranych spraŭ — udary pa ščytach spriecnazaŭcaŭ, suma ahulnaj naniesienaj škody — 29 młn. Haponavu zakidajuć toje ž samaje.

Abodva nie pryznali siabie vinavatymi.

10:15

Apytvajuć Breusa, taksama vyhladaje stomlenym, adkazvaje bolš raźniavolena, hołas cichi, adčuvajecca chvalavańnie.

10:12

Sudździa Luboŭ Siamachina apytvaje Haponava. Jon adkazvaje davoli ŭpeŭniena, vyhladaje stomlenym, ale adkazy kankretnyja i dakładnyja.

10:05

Zabaranili fota i videazdymku, pačynajecca praces. Sudździa Siamachina zajšła ŭ zału tolki paśla taho, jak vyjšli fatohrafy.

10:02

Sudździu i dziaržaŭnaha abvinavaŭcu zdymać zabaroniena. Z zały vyvieli ŭsich, kamu nie chapiła miesca na łaŭkach. U prośbie prynieści dadatkovyja miescy admovili. U zale zastałosia kala 60 čałaviek.

9:55

Žurnalistaŭ šmat, taksama ŭ zali prysutničajuć pravaabaroncy na čale z Alesiem Bialackim, jość niamieckija i anhłamoŭnyja žurnalisty, prysutničajuć usie centralnyja rasijskija telekanały.

9:50

Žurnalistaŭ zapuścili ŭ zału. Ale dazvalajuć siadzieć tolki na dvuch apošnich šerahach (usiaho ich 5), choć zała dastatkova vialikaja. Padsudnyja taksama tut, sudździ pakul niama. Tamu dazvolena fota i videa. Ludziej u zału zapuskaje asabista pałkoŭnik Jaŭsiejeŭ, viadomy aktyŭnym udziełam u razhonie akcyj 19 i 20 śniežnia, a taksama źbićci žurnalista Uładzia Hrydzina.

* * *

22 lutaha ŭ Maskoŭskim sudzie Minska pačynajecca praces nad hramadzianami Rasii Ivanam Haponavym i Arciomam Breusam, jakich abvinavačvajuć va ŭdziele ŭ tak zvanych «biesparadkach» u Minsku 19 śniežnia.

Sudździa — Luboŭ Siamachina, uniesienaja ź śpis nieŭjaznych u ES pad numaram 140. Dziaržaŭny abvinavaŭca — staršy pamočnik prakurora Maskoŭskaha rajona Minska Siarhiej Kunas.

***

Na minułym tydni adbyŭsia sud nad pieršym fihurantam kryminalnaj spravy ab masavych biesparadkach.

17 lutaha sud Frunzienskaha rajona (sudździa Volha Komar) pryznaŭ 27-hadovaha Vasila Parfiankova vinavatym va ŭdziele ŭ masavych biesparadkach.

Parfiankoŭ pryhavorany da čatyroch hadoŭ pazbaŭleńnia voli z adbyvańniem pakarańnia ŭ kałonii strohaha režymu,

a taksama da štrafu bolš čym na 14 młn. rubloŭ u jakaści kampiensacyi za raźbityja padčas akcyi dźviery ŭ Domie ŭrada.

***

Artykuł 293 «Masavyja biesparadki»

1. Arhanizacyja masavych biesparadkaŭ, jakija supravadžajucca hvałtam nad asobaj, pahromami, padpałami, źniščeńniem majomaści, uzbrojenym supracivam pradstaŭnikam ułady, karajecca pazbaŭleńniem voli na termin ad piaci da piatnaccaci hadoŭ.

2. Udzieł u masavych biesparadkach, jaki vyjaviŭsia ŭ niepasrednym učynieńni dziejańniaŭ, nazvanych u častcy pieršaj, karajecca pazbaŭleńniem voli na termin ad troch da vaśmi hadoŭ.

• 0
• 0
• 0
• 0
• 0
• 0
• 0
• 0