Čatyry hady strohaha režymu. Pieršy prysud za Płošču

Jość mierkavańnie, što sudy pačali z Parfiankova, bo jon adkryty radykał i ŭ časie śledstva pryznaŭ svaju vinu.

17.45

Viadomy prysud: jon žorstki. Vasila Parfiankova pakarali 4 hadami pazbaŭleńnia voli ŭ kałonii strohaha režymu. Taksama jon pavinien vypłacić 14 miljonaŭ 48 tysiač za zamienu dźviarej i ściokavych trub u budynku pa adrasie Savieckaja, 11, «raślinnaha śvietu» pobač ź im.

15.53

Čakajecca, što ŭ 17.30 budzie vyniesieny prysud.

U svaim apošnim słovie Parfiankoŭ paprasiŭ sud nie karać jaho surova. Jon kaža, što nie rabiŭ złačynstva, a paddaŭsia nastroju, niekalki razoŭ udaryŭ pa aharodžach i nie nanios škody.

Vasilova maci Valancina skazała, što jaje syna zrabili kazłom adpuščeńnia, padstavili. Ale jana kaža, što nie asudžaje syna, bo jon vykazvaŭ svaju pazicyju.

15.47

Pavodle advakata, Parfiankoŭ parušyŭ paradak, ale nie ŭčyniaŭ złačynstva. Jon ličyć nieabchodnym apraŭdać Parfiankova.

15.20

Prakuror Anton Zaharoŭski ličyć słovy Parfiankova chłuśnioj i patrabuje asudzić jaha na 6 hod pazbaŭleńnia voli.

15.18

U sud pryjšła maci Parfiankova.

15.15

Pačalisia sprečki. Vystupaje prakuror.

15.10

Uvieś čas u budynku suda dziažurać kamiery BT.

15.00

Dapytany śviedka Pavieł Jałovik, aktyvist štaba Uładzimiera Niaklajeva. Pavodle śledstva, jon vydavaŭ hrošy, haziety i drukavanyja materyjały, u jakich byli zakliki da biesparadkaŭ. Jałovik abviarhaje, kaža, što nie davaŭ. Ciapier u sudzie abvieščany 10-chvilinny pierapynak, padčas jakoha buduć vyvučać pryvatnuju pierapisku abvinavačanaha. Jon słaŭ roznyja sms-ki. Ale pakolki hetaja pierapiska pryvatnaja, jon zapatrabavaŭ, kab jany razhladalisia zakryta.

14.10

Sud adnaviŭ pracu paśla pierapynku.

Apracavany repartaž z ranišniaha pasiedžańnia — nižej.

Užo a 9.30 ranicy milicyjanty ŭ cyvilnym admaŭlalisia puskać žurnalistaŭ u zału suda Frunzienskaha rajona stalicy. Tłumačyli heta tym, što niama svabodnych miescaŭ. Ale kali pryjechała zdymačnaja hrupa telekanała ANT, im dazvolili ŭvajści. Paśla pieramovaŭ z administracyjaj prapuścili i fatohrafaŭ z apieratarami. Ale pry ŭmovie, što jany vyjduć z pačatkam suda.

Sudździa Volha Komar zabaraniła vieści fota- i videazdymki. I paprasiła vyjści tych, kamu nie chapiła volnych miescaŭ.

Spačatku farmalnyja pracedury, paśla jakich hramadzianski pazoŭnik padaŭ pazoŭnaje patrabavańnie na 14 miljonaŭ 48 tysiač za zamienu dźviarej i ściokavych trub u budynku pa adrasie Savieckaja, 11, «raślinnaha śvietu» pobač ź im.

Vasila Parfiankova abvinavačajuć u tym, što jon udzielničaŭ u niesankcyjanavanym mitynhu, nanios nie mienš za 61 udar pa dźviarach Doma ŭrada.

Parfiankoŭ pryznaje vinu častkova. Maŭlaŭ, u šeści i mitynhu ŭdzielničaŭ, a ŭ pahromach — nie.

Padčas dopytu jamu pryjšłosia ŭzhadać usie padziei, śviedkam jakich źjaŭlaŭsia. Ad 19 hadzin 19 śniežnia, kali jon pryjšoŭ na ofis Uładzimira Niaklajeva.

Parfiankoŭ byŭ u kałonie eks-kandydata na prezidenta, jakaj ruchałasia na Kastryčnickuju płošču.

«Jechaŭ mikraaŭtobus pobač z nami. Paśla źjavilisia niezrazumiełyja ludzi ŭ čornym biez znakaŭ adroźnieńnia. Pakłali tvaram na śnieh. Prajšło chvilin dziesiać. Jak pakłali, tak i adpuścili. Mikraaŭtobus zastaŭsia tam. Pavybivali ŭ im šyby».

Źbity Niaklajeŭ. Jaho zabiraje chutkaja. Kastryčnickaja. Šeście da płoščy Niezaležnaści. Kali Parfiankoŭ stajaŭ kala pomnika Leninu, pačuŭ huk raźbitaha škła. Padyšoŭ pahladzieć, što adbyvajecca na hanku Doma ŭrada.

«Ubačyŭ ludziej. Šyby byli raźbity. Jany šturchali dźviery. Za dźviaryma stajała draŭlanaje zahruvaščvańnie. I ludzi šturchali jaho».

Kali ŭ Pafiankova pasprabavali spytać, navošta jon pačaŭ nanasić udary, toj adkazaŭ.

«Nie toje kab udary. Šturchaŭ. Niemahčyma było nie šturchać, natoŭp zzadu...» Prakuror nie daŭ dahavaryć — abarvaŭ Parfiankova inšym pytańniem.

Ale paśla jon zmoh dahavaryć: «Staiš. Natoŭp zzadu napiraje i kidaje na hetaje nahruvaščvańnie». Adyści było niemahčyma. I tolki paśla zaklikaŭ Rymašeŭskaha supakoicca, kali da paradku zaklikali Statkievič i Sańnikaŭ, natoŭp adstupiŭ ad dźviarej.

Uvaha advakata Jahora Papkoŭskaha nieadnarazova źviartałasia na toje, što na Kastryčnickaj płoščy Parfiankoŭ nie čuŭ aficyjnaha papiaredžańnia. Maŭlaŭ, kab prysutnyja razychodzilisia, bo akcyja źjaŭlajecca niesankcyjanavanaj. Nie čuŭ jon i zaklikaŭ razyścisia z nahody niesankcyjanavanaha šeścia pierad napadam na kałonu Niaklajeva.

U adkazach na pytańni abaroncy Parfiankoŭ nieadnarazova padkreśliŭ, što nie čuŭ nijakich zaklikaŭ da biesparadkaŭ. Nie bačyŭ jon i nijakich pradmietaŭ, akramia ściahoŭ na vudziłach u rukach ludziej. A ŭ materyjałach spravy pieraličany rečy, jakija byli znojdzieny kala Doma ŭrada. Rydloŭka, siakiera, lodaruby, łom, truby, butelki. Apošnich było kala dvuch dziasiatkaŭ: z-pad harełki, kańjaku, piva. Ale na nivodnaj rečy niama adbitkaŭ palcaŭ, pa jakich možna było b identyfikavać čałavieka.

Padčas prahladu videa z płoščaŭ, Kastryčnickaj i Niezaležnaści, źjavilisia novyja kadry, jakich u internecie da hetaha nie było. Naprykład, kali pačynaje biehčy śpiecnaz, ludzi ŭ cyvilnym pačynajuć vykrykvać im «Svoi, svoi!», «HUVD, HUVD!»

Pa słovach pravaabaroncy Alesia Bialackaha, jaki prysutničaŭ na sudzie, spravu Parfiankova naciahvajuć na artykuł «masavyja biesparadki». Jon ličyć, što jana chutčej padychodzić da administracyjnaj spravy — «chulihanstva». Pravaabaronca ŭpeŭnieny, što nie sudździa Volha Komar budzie vyrašać los spravy. Heta vyrašycca ŭ Administracyi prezidenta.

* * *

17 lutaha (čaćvier) pačalisia pieršyja sudy pa spravie ab masavych biesparadkach. A 10-j hadzinie ŭ hety dzień u sudzie Frunzienskaha rajona Minska pačali sudzić Vasila Parfiankova.

Adras Frunzienskaha suda: Minsk, vuł. Dunina-Marcinkieviča, (st.mietro Spartyŭnaja).

Što viadoma pra Vasila Parfiankova? Padčas vybaraŭ-2010 jon supracoŭničaŭ z kampanijaj «Havary praŭdu!», byŭ aktyvistam štaba Uładzimira Niaklajeva.

Imia Vasila Parfiankova zhadvajecca ŭ «vykryvalnych» artykułach u prezidenckaj haziecie «Sovietskaja Biełoruśsija» pad zahałoŭkam «Za kulisami odnoho zahovora».

Havorycca, što z 2001 pa 2005 hady Vasil byŭ siabrom «Zubra» dy «Maładoha fronta», a potym byŭ na ŭkrainskim Majdanie. «Sovietskaja Biełoruśsija» z padačy śpiecsłužbaŭ namiakaje, što Parfiankoŭ — ledź nie bajavik: «Udzielničaŭ u zachopie štaba V.Janukoviča sumiesna ź siabrami UNA UNSO, ź jakimi padtrymlivaje tavaryskija adnosiny». Što da padziej 19 śniežnia, naŭprost śćviardžajecca, što Vasil byccam by «niepasredna ŭdzielničaŭ u pahromach, ažyćciaŭlaŭ šturm administratyŭnaha budynka — Doma ŭrada, raźbivaŭ škło, dźviery, nanosiŭ udary supracoŭnikam pravaachoŭnych orhanaŭ z vykarystańniem pobytavych pradmietaŭ, zaklikaŭ natoŭp da aktyŭnych dziejańniaŭ».

Parfiankoŭ byŭ udzielnikam abarony Kurapataŭ u 2001–2002 hadach.

Jon trymajecca adkryta radykalnych pohladaŭ i ŭ časie śledstva adkryta pryznaŭ svaju vinu. Napeŭna, mienavita heta stała pryčynaj taho, što jaho sudziać pieršym. Heta svojeasablivy test dla zachodniaj dypłamatyi.

Jeŭrasajuz papiaredžvaŭ Minsk, što ŭ vypadku žorstkich prysudaŭ palitviaźniam, ES uviadzie novyja sankcyi za parušeńni pravoŭ čałavieka ŭ Biełarusi.

• 0
• 0
• 0
• 0
• 0
• 0