Siońnia ŭviečary ŭ minskim Pałacy mastactva adbudziecca adkryćcio vystavy«Pahonia-20» . Ale hledačy ŭbačać nie ŭsie tvory, padrychtavanyja mastakami dla hetaj ekspazicyi.
Napiaredadni stała viadoma, što niekatoryja tvory cenzura zapatrabavała źniać z ekspazicyi. Sproby mastakoŭ adstajać ich nie dali žadanych vynikaŭ. Staršynia supołki «Pahonia» Alaksiej Maračkin tak prakamientavaŭ situacyju:
«Čorny śpis dziejničaje. Voś usio, što mahu skazać. Spadciška, telefonnyja zvanki i tak dalej, i da taho padobnaje. Tamu dalej ja havaryć ničoha nie budu. Pabačycie — budzie vialikaja prapołka tvoraŭ».
Spadar Maračkin nie staŭ udakładniać, pra jakija kankretna tvory i jakich mastakoŭ było patrabavańnie cenzury źniać ich z ekspazicyi. Viadoma, što svaje pracy dla hetaj vystavy pradstavili R. Bataljonak, H. Drazdoŭ, A. Maračkin, V. Mikita, M. Nazarčuk, H. Skrypničenka, V. Markaviec, A. Rodzin, V. Śvientachoŭskaja, M. Kupava, A. Cyrkunoŭ, M. Janickaja i inšyja mastaki, što ŭvachodziać u supołku.
Spadar Maračkin taksama admoviŭsia nazvać tych, chto staić za hetym patrabavańniem. Ale vyhladaje, što jano datyčyć pracaŭ, jakija naŭprost ci ŭskosna źviazanyja z temaj padziejaŭ 19 śniežnia.
Sakavickaja vystava mastakoŭ, jakich ad 1991 hoda abjadnoŭvaje supołka «Pahonia», tradycyjnaja.
Za časami Łukašenki tradycyjnymi zrabilisia i prablemy z ekspazicyjaj.
Niekalki hadoŭ jaje ŭvohule nie dazvalali ładzić u Pałacy mastactva. Niepryniaćcie vyklikała sama ideja prymiarkoŭvać hetuju vystavu da Dnia voli. Sioleta farmalna jana pryśviečanaja dvaccacihodździu supołki, ale čas jaje praviadzieńnia abrany admysłova da 25 sakavika. Kali ničoha nie źmienicca i vystava, jak zapłanavana, adkryjecca siońnia ŭ 17.30, to jaje možna budzie pabačyć da 27 sakavika. Ci, prynamsi, toje, što acaleje ŭ ekspazicyi paśla cenzurnaj prapołki.
Kamientary