Iznoŭ zdaroŭ. Dziaržava zamaroziła apieracyi z akcyjami małakazavodaŭ

Biełaruski ŭrad sioleta płanavaŭ admianić usialakija abmiežavańni na abaračeńnie akcyj, jakija pracoŭnyja kalektyvy atrymali ŭ pieryjad lhotnaj pryvatyzacyi. Adnak pakul Saviet ministraŭ na heta pajści nie advažyŭsia. U dakumiencie ź Minfina, tekstam jakoha vałodaje internet-hazieta Naviny.by, havorycca, što tarhi akcyjami niekatorych akcyjaniernych tavarystvaŭ prypynienyja. U tym liku i małočnych pradpryjemstvaŭ.

Ludzi, jakija ŭ pieryjad lhotnaj pryvatyzacyi atrymali akcyi biełaruskich pradpryjemstvaŭ, ciapier užo nie maładyja i chacieli b choć na staraści hadoŭ atrymać hrošy za tyja kaštoŭnyja papiery, jakija ŭ svoj čas im dastalisia.

Adnak urad zabłakavała tarhi pa akcyjach niekatorych akcyjaniernych tavarystvaŭ. Voś što havorycca ŭ liście Departamienta pa kaštoŭnych papierach Ministerstva finansaŭ, jaki atrymali minarytaryi adnaho sa staličnych pradpryjemstvaŭ.

«U metach abarony intaresaŭ Respubliki Biełaruś Savietam ministraŭ Respubliki Biełaruś było pryniata rašeńnie ab prypynieńni da asobaha rasparadžeńnia tarhoŭ pa akcyjach niekatorych adkrytych akcyjaniernych tavarystvaŭ, jakija pierapracoŭvajuć sielskahaspadarčuju pradukcyju i jakija majuć stratehičnaje značeńnie dla raźvićcia respubliki (rehijonu)».

U suviazi z ustanoŭlenym abmiežavańniem Departamient pa kaštoŭnych papierach Minfina pieradaŭ «Biełaruskaj valutna-fondavaj biržy» «adpaviednaje pradpisańnie». U vyniku, tarhi akcyjami pradpryjemstvaŭ, «jakija majuć stratehičnaje značeńnie», ciapier na biržy nie pravodziacca.

Prafudzielniki rynka kaštoŭnych papier nazyvajuć situacyju «pravavym nonsensam». Sprava ŭ tym, što z 1 studzienia 2011 hoda pavinien byŭ być kančatkova admienieny maratoryj na zvarot akcyj, atrymanych pracoŭnymi kalektyvami padčas ilhotnaj pryvatyzacyi.

U 1998—2008 hh. u Biełarusi, nahadajem, dziejničaŭ zabarona na abarot takich akcyjaŭ. Dekret prezidenta, padpisany ŭ 2008-m, paetapna admianiaŭ hety zabaronu.

Na pieršym etapie, ad 1 červienia 2008 hoda, byŭ źniaty maratoryj na prodaž akcyj AAT, u jakich u statutnym fondzie nie było dziarždoli abo jana składała 75% i bolš. Na druhim etapie, z 2009 hoda, zabarona admianiałasia ŭ dačynieńni da akcyjaniernych tavarystvaŭ, dzie dola dziaržavy składała bolš za 50%. Ad 1 studzienia 2011-ha, zhodna z dekretam, usie abmiežavańni na adčužeńnie akcyj, atrymanych padčas ilhotnaj pryvatyzacyi, pavinny być admienienyja.

Adnak siońnia na dvary ŭžo druhaja dekada sakavika, a niekatoryja akcyjaniery tak i nie mohuć puścić u abaračeńnie svaje kaštoŭnyja papiery. Prałanhacyja zabarony na zvarot akcyj kranuła, u pryvatnaści, małočnyja pradpryjemstvy. Dva roznyja akcyjaniery, jakija majuć «małočnyja» aktyvy, zajavili Naviny.by, što realizavać kaštoŭnyja papiery nie mohuć.

Čamu mienavita z «małačkom» uźnikli prablemy, zrazumieć nieskładana. Na lutaŭskaj naradzie ŭ Łukašenki było niedvuchsensoŭna zajaŭlena, što hetaja halina — zaruka charčovaj biaśpieki krainy, i vialikaj nieabchodnaści ŭ prodažy małočnych aktyvaŭ dziaržava nie bačyć.

Kab ustalavać kantrol za «małačkom», dziaržava zabłakavała mahčymaść pierapadziełu dolaŭ pamiž akcyjanierami małočnych pradpryjemstvaŭ. 11 sakavika byŭ padpisany pieršy ŭ hetym hodzie dekret, jaki zabaraniŭ druhuju i nastupnyja emisii akcyj sielhaśpierapracoŭčych pradpryjemstvaŭ biez zhody kiraŭnika dziaržavy.

Zrešty, ekśpierty rynku kaštoŭnych papier kažuć, što ŭstalavanyja abmiežavańni isnavali de-fakta i raniej, i pravieści pierapadzieł dolaŭ na małočnych pradpryjemstvach biez zhody Administracyi prezidenta było praktyčna niemahčyma.

«Tut, napeŭna, paśla vybaraŭ usie zrazumieli, što my zaraz budziem krainu na kavałki siekčy i razdavać. Što nam nie treba — addamo „Danon“, Hiermanii, Rasii, Polščy. Dyk voś — hetaha nie budzie, — kazaŭ Alaksandr Łukašenka ŭ lutym na naradzie. — I heta tyčycca nie tolki małočnaj haliny».

Situacyja składajecca supiarečlivaja. Z adnaho boku, Łukašenka daŭ zrazumieć, što małočnyja pradpryjemstvy dziaržava pradavać nie maje namieru. Ź inšaha boku, niekatoryja akcyjaniery, jakija majuć akcyi małočnych pradpryjemstvaŭ, chacieli b ich pradać.

Akcyjanier staličnaha harmałzavoda paviedamiŭ, što adrazu paśla admieny maratoryja vyrašyŭ pradać akcyi pradpryjemstva praź biržu. I navat zaklučyŭ adpaviedny dahavor z brokierskaj kampanijaj. Adnak ustanoŭlenyja abmiežavańni, najaŭnaść jakich paćvierdziŭ Minfin, nie dazvolili realizavać akcyi.

Dalejšaje raźvićcio padziej, miarkujučy pa ŭsim, moža pajści pa dvuch scenarach.

Pieršy źviazany z tym, što pracoŭnyja kalektyvy ŭsio-tki zmohuć pradać akcyi małočnych pradpryjemstvaŭ. Ale tolki dziaržavie. Ab takim varyjancie paviedamiŭ u siaredzinie lutaha staršynia Dziaržkammajomaści Hieorhij Kuźniacoŭ.

Pavodle jaho słoŭ,

padrychtavany prajekt ukaza prezidenta, jaki daje abłvykankamam prava pieravažnaha nabyćcia akcyj małočnych pradpryjemstvaŭ.

Adnak sakavik nabližajecca da siaredziny, a ukaza prezidenta, jaki b zamacoŭvaŭ hety paradak vykupu akcyj, usio niama. Žadajučych, jakija chočuć za akcyi atrymać žyvyja hrošy, paŭza niarvuje. U toj ža čas ekśpierty fondavaha rynku Biełarusi znachodziać finansavaje tłumačeńnie uźnikłaj paŭzie.

«Kab abłvykankamy zmahli vykupić akcyi pierapracoŭčych pradpryjemstvaŭ, nieabchodna vyłučyć biudžetnaje finansavańnie. A hrošaj u biudžecie niama. Vyjšła zamknionaje koła, i jakoje budzie znojdzienaje vyjście, ciapier možna tolki hadać», — zajaviŭ u hutarcy z karespandentam prafudzielnik rynka kaštoŭnych papier. Na dumku ekśpierta,

kali pytańnie ź finansavańniem vyrašanaje nie budzie, moža źjavicca ŭkaz prezidenta, jaki nakładzie zabaronu na adčužeńnie akcyj pierapracoŭčych pradpryjemstvaŭ. Pa sutnaści heta budzie aznačać, što pracoŭnyja kalektyvy tak i nie zmohuć skarystacca zakonnym pravam rasparadžacca svajoj majomaściu.

• 0
• 0
• 0
• 0
• 0
• 0
• 0
• 0