Novaziełandskaja kampanija pradaje indyvidualnyja latalnyja aparaty

Reaktyŭny raniec, jaki dazvolić čałavieku padniacca ŭ pavietra nie ŭ sałonie samalota i navat nie na kryłach deltapłana, narešcie zmoža nabyć luby žadajučy. Kampanija-vytvorca Martin Aircraft Company martinjetpack.com abviaściła, što nabyć hety cud techniki možna budzie da kanca hoda za 75 tysiač dalaraŭ, piša brytanskaja hazieta The Daily Mail..

Padjomnaja siła zabiaśpiečvajecca kručeńniem dvuch vintoŭ z chutkaściu da 6000 abarotaŭ u chvilinu. Mahutnaść bienzinavaha ruchavika składaje 200 konskich sił, abjom — 2 ł. Maksimalnaja chutkaść — kala 90 km/h, vyšynia palotu — da 50 m. Zapasu paliva chapaje na paŭhadziny palotu.

Kančatkovaje rašeńnie ab dopusku hetaha pryłady da prodažach było pryniata paśla paśpiachovaha vyprabavalnaha palotu, padčas jakoha byŭ dasiahnuty rekord — maniekien pravioŭ u pavietry siem chvilin, padnimajučysia časam na vyšyniu kala 30 m. Kiravaŭ im čałaviek ź ziamli, karystajučysia pultam dystancyjnaha kiravańnia. Dla paraŭnańnia, u 2008 hodzie na praviedzienym u ZŠA avijašoŭ reaktyŭny raniec nie pratrymaŭsia ŭ pavietry daŭžej 45 siekund, padniaŭšysia tolki na 1,8 m.

Pryłada raspracoŭvałasia z metaj stać samym prostym u kiravańni latalnym aparatam. «Usie zasnavana na prostych zakonach fiziki. Jak skazaŭ Ńjutan, na kožnaje dziejańnie jość procidziejańnie. Tamu, vystrelvajučy vialikija abjomy pavietra ŭniz, vy padymajeciesia ŭvierch i lacicie», — rastłumačyŭ vynachodnik mašyny Hlen Marcin.

Kab vybrać kirunak palotu, piłot vykarystoŭvaje džojścik, raźmieščany pad levaj rukoj, a rehulavańnie vuhła nachiłu i drosiel kirujucca pravaj rukoj.

Zamovy na mašynu ŭžo raźmiaścili kala 2500 čałaviek, uklučajučy arabskich šejchaŭ i amierykanskich miljanieraŭ.

Vytvorcy raźličvajuć, što ich pradukcyja znojdzie popyt u amataraŭ pazabaŭlacca i lotčykaŭ-amataraŭ. «A chtości, mahčyma, zachoča abyjści korki i zrabić heta stylna», — vykazaŭ zdahadku Marcin.

Ale pieršymi atrymalnikami reaktyŭnych rancaŭ stanie amierykanskaja armija, a mienavita pamiežnyja vojski. Vajennaja viersija reaktyŭnaha zaplečnika, tłumačyć Marcin, moža vykarystoŭvacca ŭ ciažkadastupnych miescach i zonach vajennych dziejańniaŭ. Jaje možna ŭžyvać dla dastaŭki nie tolki ludziej, ale i charčoŭ, dla raźviedki i rekahnascyroŭki.

Žychar Novaj Ziełandyi stvaryŭ svaju kampaniju ŭ 1998 hodzie z metaj skanstrujavać efiektyŭny i daŭhaviečny reaktyŭny raniec, jaki b značna pierasiahnuŭ raspracavany ŭ 60-ch hadach Bell Rocket Belt, zdolny trymacca ŭ pavietry tolki 28 siekund.

Reaktyŭny raniec budzie abstalavany elektronnymi stabilizatarami palotu i parašutam. Kab zrušyć centr ciažaru i nie dapuścić pierahortvańnia pryłady, ruchavik, paliŭny bak i sam piłot raźmieščany pad prapielerami.

Pytańnie licenzavańnia piłotaŭ pakul nie vyrašana. U šmatlikich jeŭrapiejskich krainach, uklučajučy Vialikabrytaniju, licenzavańnie nie budzie treba z-za nievialikaj masy pryłady. A voś Fiederalnaja avijacyjnaja administracyja ZŠA pakul nie pryniała rašeńnia. Tak ci inakš, kampanija Martin Aircraft papiaredziła, što sproby karystańnia reaktyŭnym ranciem biez papiaredniaha prafiesijnaha navučańnia buduć biezrazvažnymi. Usie žadajučyja nabyć mašynu buduć dapuščanyja da palotaŭ tolki paśla prachodžańnia prahramy navučańnia.

• 0
• 0
• 0
• 0
• 0
• 0
• 0
• 0