Znojdzieny «hien ščaścia»

Źjavilisia novyja śviedčańni taho, što hien 5-HTTLPR adkazvaje za pačućcio ščaścia ŭ čałavieka. Zrešty, aŭtary daśledavańnia pieraścierahajuć ad niapravilnych vysnovaŭ: zaŭvažana, što na zadavolenaść čałavieka žyćciom upłyvajuć mnohija faktary, a nie adzin hien.

Nie tak daŭno navukoŭcami byli adkrytyja hieny, jakija adkazvajuć, naprykład, za schilnaść da ałkahalizmu, za doŭhaje žyćcio, za abłysieńnie, za schilnaść da dyjabietu i navat da suženskaj zdrady. Ciapier ža, zhodna z pracaj, apublikavanaj u Journal of Human Genetics, znojdzieny «hien ščaścia». Viadučy aŭtar artykuła Jan-Emanuel de Nievie z Łondanskaj škoły ekanomiki ŭ intervju New Scientist adznačyŭ: «Heta pieršy raz, kali hien, jaki adkazvaje za ščaście, aficyjna znojdzieny».

Navukoviec dadaŭ, što ŭ jaho niama nijakich sumnievaŭ u tym, što nieŭzabavie buduć znojdzienyja i inšyja padobnyja hieny.

Pakul adkryćcio maje statystyčny charaktar, i heta tłumačyć toj fakt, što asnoŭnym aŭtaram publikacyi źjaŭlajecca nie bijołah. Dla svajoj pracy de Nievie z kalehami vykarystaŭ dadzienyja Amierykanskaha nacyjanalnaha padoŭžnaha daśledavańnia zdaroŭja padletkaŭ (jano pravodziłasia ŭ 1995 — 2008 hadach). Padoŭžnymi (łanhitudzinalnymi) zavucca daśledavańni, dzie vyłučajecca hrupa ludziej, za jakimi ciaham peŭnaha času nazirajuć i zatym paŭtorna aceńvajuć ich stan, pry hetym praciahłaść nazirańnia nie abaviazkova vialikaja. Dadzienaje daśledavańnie ŭtrymlivała infarmacyju ab hienietyčnym daśledavańni 2574 padletkaŭ, a taksama ankietu respandentaŭ, dzie siarod inšych pytańniaŭ było i takoje: «Nakolki vy ŭ cełym zadavolenyja svaim žyćciom?» Varyjanty adkazaŭ byli nastupnymi: «vielmi zadavoleny», «zadavoleny», «nie zadavoleny, ale i nie niezadavoleny», «niezadavoleny» i «vielmi niezadavoleny».

De Nievie z kalehami vyjavili karelacyju pamiž adkazami padletkaŭ na hetaje pytańnie i varyjacyjaj hiena 5-HTTLPR.

Ułasna, navukoŭcy i raniej mierkavali, što varyjatyŭnaść hetaha hiena ŭpłyvaje na funkcyjanavańnie ŭ mozhu «harmonu radaści» sierataninu.

Kali čałaviek maje «doŭhuju» varyjacyju hetaha hiena, to jon bolš padlehły ŭpłyvu sierataninu i, jak vynik, bolš ščaślivy. Kali ž u čałavieka bolš «karotkija» varyjacyi hiena 5-HTTLPR, to jon bolš schilny da piesimizmu.

Ale kali raniej hetaja zdahadka hrutnavałasia na daśledavańni hrupy ludziej u niekalki dziasiatkaŭ čałaviek, to ciapier havorka idzie pra niekalki tysiač ludziej, što ŭžo maje surjoznuju statystyčnuju značnaść.

U publikacyi ŭ Journal of Human Genetics havorycca, što z 40% amierykanskich padletkaŭ, jakija zajavili, što «vielmi zadavolenyja» svajoj žyćciom, 35,4% mieli dźvie «doŭhija» varyjacyi «hiena ščaścia», a 19,1% — dźvie «karotkija». Pavodle padlikaŭ de Nievie, pry inšych roŭnych umovach najaŭnaść adnoj «doŭhaj» varyjacyi hiena 5-HTTLPR pavialičyła b kolkaść ludziej, «vielmi zadavolenych» svaim žyćciom na 8,5%, a najaŭnaść dźviuch «doŭhich» varyjacyj — na 17,3%.

Nie raskryvajučy detalaŭ, de Nievie paviedamiŭ, što hetyja vyniki ŭžo prajšli niezaležnuju pravierku na inšaj hrupie ludziej.

Pra hetaje daśledavańnie budzie raskazana ŭ publikacyi, jakaja vyjdzie ŭ časopisie Econometrica.

Padahulniajučy vyniki svajoj pracy, navukoviec padkreślivaje, što na adčuvańnie čałaviekam ščaścia robić upłyŭ zanadta vialikaja kolkaść faktaraŭ. «Kali vam nie šancuje ŭsio žyćcio kali vy stracili pracu abo, horš za toje, svaich rodnych, to heta budzie značna bolš mocnaja krynica niaščaścia, niezaležna ad taho, jakaja kolkaść jakich hienaŭ u vas jość», — zajaviŭ de Nievie.

• 0
• 0
• 0
• 0
• 0
• 0
• 0
• 0