Devalvacyja: Nacbank dazvoliŭ svabodny kurs najaŭnymi. Banki vystaŭlajuć 4000 za dalar

Paviedamleńnie pra heta źjaviłasia na sajcie Nacyjanalnaha banka 11 maja. Banki ŭžo vystaŭlajuć kursy valuty, blizkija da 4000 za rubiel.

Voś poŭny tekst zajavy Nacbanka:

«Ab kupli-prodažu zamiežnaj valuty nasielnictvam

U ramkach realizacyi płana paetapnaha vychadu na adziny kurs biełaruskaha rubla i stabilizacyi situacyi na ŭnutranym valutnym rynku Nacyjanalny bank z 11 maja 2011 h. admianiŭ rekamiendacyjnyja abmiežavańni pa ŭstanaŭleńni bankami kursaŭ ździełak pa kupli-prodažy zamiežnaj valuty z nasielnictvam.

Deficyt valutnych srodkaŭ na dadzienym siehmiencie rynka skłaŭsia ŭ sakaviku biahučaha hoda ŭ vyniku pavyšanaha popytu hramadzian na najaŭnuju zamiežnuju valutu dla nabyćcia transpartnych srodkaŭ za miažoj, a taksama ŭ suviazi z raspaŭsiudžvańniem roznych čutak, jakija pravakujuć ažyjatažnyja pavodziny nasielnictva.

Vykarystańnie rynkavych padychodaŭ da farmavańnia kursu biełaruskaha rubla pry ažyćciaŭleńni ździełak ź fizičnymi asobami dazvolić nie tolki zadavolić popyt hramadzian na zamiežnuju valutu, ale i pazbavić sensu dalejšaje aktyŭnaje nabyćcio zamiežnaj valuty nasielnictvam dla stvareńnia źbieražeńniaŭ, jakoje nazirałasia ŭ apošni čas u suviazi z čakańniem źmieny abmiennaha kursu».

Prablemy na finansavym rynku byli vyklikany pieradvybarčym pierahrevam ekanomiki Biełarusi. Kab harantavać padtrymku nasielnictva, urad Łukašenki pampavaŭ haspadarku tannymi hrašyma. Zaraz ramiani pryjdziecca zaciahnuć usiamu nasielnictvu. Siaredni zarobak u Biełarusi z devalvacyjaj źnižajecca da 390 dalaraŭ — čaćviorty ad nizu ŭzrovień siarod jeŭrapiejskich krain. U minułym hodzie Biełaruś vyjšła na pieršaje miesca ŭ Jeŭropie pa ŭzroŭni inflacyi, a sioleta jana budzie, vidavočna, vymiaracca dziasiatkami pracentaŭ.

Łukašenkaŭcy sprabujuć pierakłaści adkaznaść za krach rubla na nasielnictva. Sam Łukašenka nie raz abvinavačvaŭ ludziej, što jany «paddalisia panicy» i «kinulisia kuplać mašyny», što, maŭlaŭ, i pryviało da ažyjatažu na valutnym rynku. Bankiry ŭziali na ŭzbarieńnie tuju ž rytoryku.

Nacbank u svajoj zajavie siońnia zvaliŭ deficyt valuty na ŭpłyŭ «pavyšanaha popytu hramadzian na najaŭnuju zamiežnuju valutu dla nabyćcia transpartnych srodkaŭ za miažoj, a taksama ŭ suviazi z raspaŭsiudžvańniem roznych čutak, jakija pravakujuć ažyjatažnyja pavodziny nasielnictva».

Miž tym devalvacyja stała łahičnym vynikam ekanamičnaha kursu krainy. Kraina doŭhija hady žyła nie pa srodkach. Deficyt biahučaha rachunku apošnija hady stabilna składaŭ 10–15% ad VUP. Paśla 2006 hoda, kali Rasija ŭźniała ceny na haz, zamiežnaja zapazyčanaść narastała na 5–6 miljardaŭ dalaraŭ štohod. Bolš za toje, Biełaruś apynułasia ŭ tatalnaj ekanamičnaj, palityčnaj i finansavaj zaležnaści ad Rasii. Navat majučy najtańniejšyja ŭ Jeŭropie haz i naftu ŭzamien za palityčnuju zaležnaść, Biełaruś pahruziłasia ŭ hłyboki finansavy kryzis.

Nastupnyja hady biełarusam nie vypadaje čakać manny niabiesnaj. Pa vynikach 2011 hoda zamiežnaja zapazyčanaść krainy moža dasiahnuć 65% ad VUP, što abmiažuje mahčymaści dla zapazyčvańnia na zamiežnych rynkach. U toj ža čas na 2012–2013 hady prypadzie pik vypłat pa kredytach, atrymanych u 2006–2008-m. Krainu čakajuć hady žorstkaj ekanomii i nie mienš žorstkaha rasijskaha cisku. Maskva pasprabuje skarystacca ŭ biełaruskaj finansavaj katastrofy, pravodziačy apieracyju pa zmušeńni da pryvatyzacyi.

Biełaruś stała adzinaj krainaj Jeŭropy, što ažyćciaviła rezkuju devalvacyju nacyjanalnaj valuty za apošnija 12 miesiacaŭ.

Usiaho ad 2008 hoda biełaruski rubiel abiasceniŭsia bolš jak na 90% (bieznajaŭny — na 135%). Heta absalutny antyrekord kantynienta.

• 0
• 0
• 0
• 0
• 0
• 0
• 0
• 0