Haz dla Biełarusi budzie 200 dalaraŭ u lubym vypadku

Rasiejski druk apošnija dni šyroka kamentuje sustreču Alaksandra Łukašenki i Ŭładzimiera Pucina, jakaja adbyłasia ŭ Maskvie ŭ minułuju piatnicu, šmat vydańniaŭ analizujuć perspektyvy dvuchbakovych adnosinaŭ.

Bolšaść vydańniaŭ sychodziacca na tym, što padčas pieramovaŭ, jakija doŭžylisia try hadziny, nivodzin z bakoŭ nie sastupiŭ. U svaim subotnim repartažy kramloŭski karespandent «Kommiersanta» Andrej Kaleśnikaŭ raspaviadaje pra nervovuju atmasferu pieramovaŭ, pavodle jaho «pieramovy skončylisia ničym, Łukašenku nie atrymałasia źnizić novuju canu rasiejskaha hazu ani na cent, jana składaje 200 dalaraŭ za tysiaču kubametraŭ». Kaleśnikaŭ padaje svaju razmovu z kramloŭskim čynoŭnikam u kuluarach sustrečy: "A što Vy prapanujecie? I dalej utrymlivać ich za naš košt?",– zadaŭ jon rytaryčnaje pytańnie, bo ŭsie adkazy jon atrymaŭ značna raniej i nie ad mianie». Žurnalist źviartaje ŭvahu na toje, što byli skasavanyja sumiesny śniadanak dvuch kiraŭnikoŭ, a taksama ich pajezdka ŭ ladovy pałac, zaplanavanaja za niekalki dzion da pieramovaŭ.

U siońniašnim numary «Kommiersant'» piša pra sustrečy Łukašenki i Pucina pad zahałoŭkam «U Miensku niama słovaŭ, ale moža nie zastacca i suverenitetu». Hazeta cytuje Alaksandra Milinkieviča, pavodle jakoha Rasieja patrabuje ad Biełarusi ŭviadzieńnia rubla i pryniaćcia kanstytucyjnaha aktu sajuznaj dziaržavy, jon nazyvaje heta «krokami da anšlusu». Hazeta nie padaje źviestak pra toje, što Łukašenka pajšoŭ nasustrač Maskvie ŭ hetych pytańniach, ale sa spasyłkaj na rasiejskija ŭradavyja krynicy piša, što Maskva ŭviadzie ekspartnuju mytu na naftu, a «Hazprom» uźnimie canu na haz da 200 dalaraŭ u lubym vypadku.

"Vriemia novostiej" taksama kanstatuje pravał pieramovaŭ i piša, što Miensk staić pierad dylemaj – ci iści na stvareńnie realnaj adzinaj dziaržavy, ci pracavać z Rasiejaj na rynkavych umovach. Vydańnie padaje ekspertnuju acenku cany apošniaha varyjanta – 5 miljardaŭ u hod. «Navat prodažam aktyvaŭ pakryć takuju nahruzku ciažka, a ŭžo praz hod – niemahčyma», – piša «Vriemia novostiej».

Hazeta apisvaje cikavuju podbiŭku sprečak vakoł koštu «Biełtranshazu». Pavodle «Vriemieni novostiej», pieršapačatkova niezaležny acenščyk – halandzki bank – nazvaŭ sumu ŭ 500 miljonaŭ dalaraŭ, navat mienš, čym hatovy byŭ płacić «Hazprom». Potym, pavodle vydańnia, Pucin damoviŭsia z Łukašenkam, što «niezaležnaja» acenka składzie pryblizna 3 miljardy, na heta ŭhavaryli i halandzki bank, mienavita pra hetuju zhodu bakoŭ prezydent Rasiei abviaściŭ paśla pieramovaŭ z Łukašenkam u Miensku u časie samitu SND. Ale 30 listapada – piša "Vriemia novostiej" – pieršy vice-premjer Biełarusi Ŭładzimier Siamaška zajaviŭ staršyni «Hazproma» Mileru, što niejkija amerykanskija partnery hatovyja dać za «Biełtranshaz» 17 miljardaŭ dalaraŭ, aby nie puścić rasiejcaŭ. Pieramovy byli spynienyja – piša «Vriemia novostiej".

«Niezavisimaja hazieta» cytuje premjer-ministra Biełarusi Siarhieja Sidorskaha, jaki na minułym tydni zajaviŭ, što kali Rasieja padvyšaje canu na haz da 200 dalaraŭ za tysiaču kubametraŭ, to košt «Biełtranshazu» budzie padniaty da 10-17 miljardaŭ dalaraŭ».

«Komsomolskaja pravda» pryvodzić mierkavańnie rasiejskaha ekanamista Michaiła Dzialahina, pavodle jakoha Miensku ŭsio ž daviadziecca pradać častku «Biełtranshazu», a Maskva ŭsio ž źnizić canu na haz. Na zaŭvahu, što Łukašenka namiaknuŭ na mahčymaść uviadzieńnia ŭ Biełarusi rasiejskaha rubla, Dzielahin adkazaŭ: «Hetuju vudu jon zakidaje nie ŭpieršyniu, kab padražnić Rasieju. Nasamreč, heta Łukašenku niavyhadna. Uviadzieńnie rubla faktyčna aznačaje stratu Mienskam niezaležnaści – chaj pakul i ekanamičnaj».

Cytavanaja "Vriemia novostiej" ličyć, što Miensk spadziajecca na asablivaści hazatranspartnaj systemy Biełarusi, jakaja dazvalaje lohka adpampoŭvać haz dla biełaruskich patrebaŭ. Da taho ž, pavodle vydańnia, Maskva moža pabajacca rostu antyrasiejskich nastrojaŭ u Biełarusi, jak heta było, pryčym nie biez dapamohi biełaruskich uładaŭ, padčas zakryćcia zasłonki ŭ 2004 hodzie.

Hazeta «Sovietskaja Rośsija» ŭ repartažy pra parlamencki schod sajuzu Biełarusi i Rasiei raspaviadaje, jak levyja rasiejskija parlamentary abvinavačvali śpikiera Dziarždumy Hryzłova ŭ tym, što kanstytucyjny akt dahetul nie pryniaty. Hazeta cytuje deputata, byłoha hubernatara Krasnadarskaha kraju Mikałaja Kandracienku, pavodle jakoha ekspartnaja myta ŭvodzicca dziela taho, kab spynić biełaruskija naftapierapracoŭčyja zavody. Pavodle jaho, peŭnyja siły ŭ Rasiei nia chočuć zbližeńnia našych narodaŭ. Dalej «Sovietskaja Rośsija» piša: "Usim ža bačna, što ŭ Rasiei niama nivodnaha palityka, paraŭnalnaha pa maštabu i razmachu z takoj asobaj, jak Łukašenka. I ci moža biełaruski prezydent davieryć kiravańnie svajoj krainaj kampradorskaj aliharchii, maryjanetkavym lideram, kampradorskim enerhietykam?»

• 0
• 0
• 0
• 0
• 0
• 0
• 0
• 0