PUTIN «padarvaŭ» sajt biełaruskaha kiraŭnika
Užo bolš za dźvie hadziny niedastupny sajt Alaksandra Łukašenki.
Užo bolš za dźvie hadziny (na momant napisańnia hetych radkoŭ) niedastupny sajt kiraŭnika Biełarusi. U Administracyi prezydenta zajaŭlajuć, što heta — «časovyja ciažkaści», ale ŭsie simptomy śviedčać pra kibierataku…
Na resursie putinvzrivaetdoma.org abvieščana, što składanaści z dostupam da sajtu biełaruskaha prezidenta — vynik arhanizavanaj imi DDOS-ataki: «Paśpiachova padarvany sajt prezidenta Biełarusi president.gov.by. Zyčym biełarusam chutčejšaha vychadu z kryzisu i novaha, adekvatnaha lidara».
Amal usie pryniatyja sproby zahruzić hałoŭnuju staronku prezidenckaha sajta byli biezvynikovyja, tolki ŭ pary vypadkaŭ častka kantentu zahruziłasia.
Kiraŭnik pres-słužby biełaruskaha prezidenta Pavieł Lohki kaža, što heta — «časovyja ciažkaści». U Apieratyŭna-analityčnym centry pry Administracyi prezidenta, jaki źjaŭlajecca rehulujučym orhanam, adkazali, što pryčyny niedastupnaści sajta jašče vyśviatlajucca.
Miž tym resurs host-tracker.com, jaki prapanuje pasłuhi manitorynhu dastupnaści internet-sajtaŭ, paćviardžaje, što prykładna dźvie traciny zvarotaŭ da sajta biełaruskaha prezidenta biezvynikovyja; siervier vydaje adkaz «Unknown reason (eg unexpected eof, timeout»).
Vierahodniej za ŭsio, siervier, na jakim chościcca sajt biełaruskaha prezidenta, prosta nie moža dać rady vialikaj kolkaści zapytaŭ, arhanizavanych złamyśnikami.
Amal pałova zapytaŭ adpraŭlajecca ź siervieraŭ Paŭnočnaj Amieryki. Resurs «Putinvzryvajetdoma», jak pazicyjanujuć siabie sami jaho ŭładalniki, — «instrumient dla praviadzieńnia kalektyŭnych raźmierkavanych
ddos-napadaŭ (ad anhł. Denial of Service, Admova ŭ absłuhoŭvańni), metaj jakich źjaŭlajecca vyviadzieńnie sajtaŭ z ładu šlacham pierahruzki mahutnaściaŭ atakavanych siervieraŭ. Kožny naviednik moža paŭdzielničać u napadzie, dobraachvotna padajučy resursy svajho kamputara. Pryncyp ataki hruntujecca na adkryćci vialikaj kolkaści padklučeńniaŭ z dapamohaj JavaScript na klijenckim baku. U śpisie svaich «pieramoh» resurs pryvodzić bolš za tryccać sajtaŭ, ale sajt biełaruskaha prezidenta ŭ im — mabyć, samy «hučny».
Jak stała viadoma internet-haziecie Naviny.by, sajt «Putinvzryvajetdoma» zarehistravany na imia Helga Putana, nibyta jakaja pražyvaje pa adrasie Maskva, vuł. Lenina, 10 kv. 29. Pry rehistracyi sajta byŭ pakazany niaisny numar maskoŭskaha telefona. Raniej u hetaha resursu ŭžo byli adabranyja try damiennyja imieni.
Kamientary