Pres-sakratar "Hazpromu": Pavodziny Biełarusi staviać pad pahrozu enerhazabieśpiačeńnie krainy

«Hazprom» zhodny atrymać ad Biełarusi častku apłaty rasiejskaha hazu hrašyma, častku - akcyjami «Biełtranshazu», -- paviedamiŭ pres-sakratar «Hazpromu» Siarhiej Kupryjanaŭ.

«Hazprom» hatovy atrymlivać častku koštu hazu hrašyma, naprykład, $80 za tys. kubametraŭ u 2007 hodzie, a reštu - akcyjami «Biełtranshazu» z tym, kab urešcie ŭ «Hazpromu» było 50%», - skazaŭ jon.

Niežadańnie Biełarusi kuplać rasiejski haz za rynkavuju canu biezadkaznaje i stavić pad pahrozu enerhazabieśpiačeńnie krainy, zajaviŭ S. Kupryjanaŭ.

«Siońnia biełaruski bok iznoŭ zajaviŭ, što maje namier kuplać rasiejski haz pa canie, nie vyšejšaj za vyznačanuju dla Smalenskaj vobłaści», – skazaŭ jon, nahadaŭšy, što dziejny kantrakt na pastaŭku hazu ŭ Biełaruś vyhasaje za šeść dzion.

Nahadajem, što Biełaruś apošniaje dziesiacihodździe atrymlivała enerhanośbity pa źnižanych cenach uzamien za padparadkavańnie Rasiei i palityku rusifikacyi. U adroźnieńnie ad Polščy ci Bałtyi, Biełaruś nie razbudavała alternatyŭnych šlachoŭ pastavak enerhanośbitaŭ i nie prainvestavała pierachod haspadarki na enerhaaščadnyja technalohii.

Adzinaj krynicaj pastavak hazu ŭ Biełaruś zastajecca Rasieja. Z Rasiei Biełaruś taksama atrymlivaje 90 % nafty (10 % pachodziać z ułasnych radoviščaŭ). Nafta- i hazapravodaŭ z portaŭ Čornaha i Bałtyjskaha moraŭ nie było zbudavana.

Prablema taksama ŭ tym, što abjomu padziemnych hazaschoviščaŭ Biełarusi chapaje tolki na čverć dzionnaha spažyvańnia hazu ŭ zimovy peryjad. Heta značyć, što ŭ vypadku adklučeńnia hazu Biełaruś amal adrazu pačnie adčuvać jaho deficyt. Ź inšaha boku, Kalininhradzkaja vobłaść Rasiei zabiaśpiečvajecca hazam vyklučna praź Biełaruś (u Polšču, Litvu, Łatviju, Niamieččynu jon moža pastaŭlacca ź inšych šlachoŭ). Kalininhrad taksama nia maje schoviščaŭ hazu zusim. Padčas minułaha adklučeńnia hazu, u 2004 hodzie, Biełaruś adrazu pačała karystacca hazam, pryznačanym dla Kalininhradu.

Biełaruś sioleta zakuplała kala 20 młrd kubametraŭ hazu za 46 dalaraŭ za tysiaču kubametraŭ. “Hazprom” maje namier pradavać Biełarusi haz za 200 dalaraŭ za kubametar z nastupnaha hodu (Litvie i Ŭkrainie za 230, Niamieččynie za 293). U vypadku kali biełaruskija ŭłady pieradaduć Rasiei “Biełtranshaz”, tańniejšuju canu na haz udasca zachavać na hod-dva. Pavyšeńnie cany na haz budzie aznačać, najchutčej što, devalvacyju rubla, rost uzroŭniu inflacyi, źnižeńnie ciepłazabieśpiačeńnia asobnych rehijonaŭ i padzieńnie vytvorčaści ŭ chimičnaj pramysłovaści.

• 0
• 0
• 0
• 0
• 0
• 0
• 0
• 0