Skandał na BT

Skandał vakoł karykaturaŭ z vyjavaju Muchamada prakamentavaŭ i aficyjny biełaruski lider. Maŭlaŭ, ichni pieradruk śviedčyć, što kamuści patrebna eskalacyja napružanaści miž cyvilizacyjami. Kantekst taki, što niama sumnievu — heta patrebna kamuści na Zachadzie.

Nu a prapahanda — taja biez ekivokaŭ davodzić: karykaturnuju vajnu spravakavaŭ Vašyhton. Kab padrychtavać hlebu dla sapraŭdnaj vajny suprać Iranu.

To bok, ałoŭki dackim mastakam tačyŭ niejki ŭvišny CRUšnik. A potym amerykanskija ahienty jašče j padbili mnostva redaktaraŭ z roznych krainaŭ rastyražavać tuju brydotu. I pajšło-pajechała... Usio elementarna, Uotsan!

Kanśpiralohija, abo teoryja zmovy, stała zvykłym instrumentam biełaruskaj prapahandy. Heta ŭniversalny šablon, mahutny srodak manipulacyi masavaj śviadomaściu. Apazycyjanery — najmity imperyjalizmu, kalarovyja revalucyi — scenar CRU. U pasolstvach spres špiehi, a pa perymetry dziaržaŭnaj miažy vierałomnyja susiedzi dresirujuć bajevikoŭ.

I ŭžo nia treba apraŭdvacca za niepavahu da demakratyi i pravoŭ čałavieka. U varožym atačeńni intelihienckich antymonijaŭ nie razvodziać!

Masa ž, na žal, lohka paddajecca spakusie prostych tłumačeńniaŭ. Pa-pieršaje, adbivajecca ciažkaja spadčyna savieckaj prapahandy. Pa-druhoje, miljony suajčyńnikaŭ uvohule nie atrymlivajuć niezaležnaj infarmacyi.

Pabyŭšy paru dzion u vioscy bieź Internetu, pačuvajeśsia dzikunom. Dyk što kazać pra tych, chto nie adroźnivaje Internet ad internatu?

Usie pačuli niadaŭna praz televiziju, što litoŭcy naładzili ahniavuju padrychtoŭku revalucyjnych bajevikoŭ. I mo dva adsotki daviedalisia praź niezaležnyja sajty, što nasamreč havorka idzie pra elektronny trenažor u vajskovaj častcy, na jakim dali «pastralać» navat biełaruskim dyplamatam.

Dva adsotki paśmiajalisia. Astatnija ŭražvajuć sacyjolahaŭ prafesara Manajeva pryličeńniem Litvy, Polščy dy Łatvii da liku varožych krainaŭ. Son rozumu sparadžaje pačvaraŭ!

Zrešty, u palitycy nasamreč jość patajemnyja spružyny. Što da «karykaturnaj vajny», to za jejnaj eskalacyjaj eksperty schilnyja bačyć najpierš intaresy Iranu, Syryi dy palestynskaha «Chamasu», da jakich u mižnarodnaj supolnaści jość sapraŭdy surjoznyja pytańni. «Malavany» skandał adciahvaje ŭvahu ad inšych rečaŭ — naprykład, atamnych ambicyjaŭ Tehieranu. Ci apraŭdvaje ich.

Darečy, pra hetyja imaviernyja matyvy kalizii šmat havorać navat rasiejskija medyi — pry ŭsich hulniach Maskvy ź isłamskim śvietam.

Ale mienskija kanśpirolahi ŭmiejuć dumać tolki ŭ adzin bok. «Vorah majho voraha — moj siabar» — voś ichny pryncyp. Pry patrebie jany hatovyja vyhladać bolšymi mahametanami, čym jak ajatoły.

❏

Kanśpiralohija (ad anh. conspiracy)— sakretnaść, zmova. Systema pohladaŭ, płyń u historyi dy palitalohii, što tłumačyć tyja abo inšyja źjavy jak vynik zmovaŭ patajemnych siłaŭ (naprykład patajemnych tavarystvaŭ, specsłužbaŭ, inšaplanetnikaŭ, akultnych źjavaŭ).

• 0
• 0
• 0
• 0
• 0
• 0
• 0
• 0