Čarhiniec: Miesca «sučki» Sambuki ŭ łožku pamiž dvuma narmalnymi ludźmi
Staršynia biełaruskaha Savieta pa maralnaści Mikałaj Čarhiniec, kažučy ab skandalnym kancercie rasijskaj pornazorki Kaci Sambuki ŭ Minsku 18 červienia, zajaviŭ, što «hetuju sučku» raniej nie viedaŭ i nie čuŭ. Pavodle jaho słoŭ, jaje miesca nie na scenie, a «u adnym pakoi, u adnym łožku pamiž dvuma narmalnymi ludźmi».
«Na maju dumku, takija kancerty ŭ luboj krainie viaduć da dehradacyi hramadstva. Ja razumieju: intym dvuch ludziej — heta narmalnaje, tak by mović, raźvićcio žyćcia. Ale kali pravodziacca voś takija pataskušnyja numary, kali dama imituje ŭsio, što zaŭhodna, što nie pavinna być navat blizka, to heta vyklikaje nie tolki pačućcio pratestu, a prosta pačućcio ahidy i nizaści noravaŭ asobnych našych dziejačaŭ kultury, kali možna ich tak nazvać. Tamu, viadoma, vielmi niepryjemna, što takuju kulturu sprabujuć ukaranić i ŭ biełaruskaje hramadstva», — cytuje jaho słovy «Jeŭrapiejskaje radyjo dla Biełarusi».
Mikałaj Čarhiniec nie ŭpeŭnieny, što arhanizatary šou ŭzhadnili jaho ŭ Kamisii pa procidziejańni kultu hvałtu, parnahrafii i žorstkaści. «Mianie ździŭlaje:
kali heta dazvolili, to, mabyć, treba ich pamianiać miescami z hetaj zorkaj.A kali prosta prajšło mima vačej peŭnych struktur, to treba prymać miery da arhanizataraŭ. My takoha nie dazvalajem. Nas naściarožvaje toje, što pad vyhladam svabody asoby, svabody słova časam sprabujuć praleźci voś takija šarłatany», — skazaŭ jon.
Nahadajem, što Kacia Sambuka pakazała ŭ Minsku šou, jakoha nie čakali navat sami arhanizatary.
«Dla nas hetaja artystka była ŭ pieršuju čarhu śpiavačkaj, i na scenie jana pavinna była siabie vieści jak minimum u dva razy praściej», — raspaviali ŭ kłubie, u jakim vystupiła Kacia.
Ministerstva ŭnutranych spraŭ Biełarusi ž pravodzić pravieračnyja mierapryjemstvy, pa vynikach jakich budzie dadziena pravavaja acenka kancertu. Akramia taho, ekśpierty pavinny buduć vyznačyć, ci byli ŭ šou elemienty parnahrafii.
Kamientary