Top-mieniedžarku OpenAI zvolnili za seksualnuju dyskryminacyju supracoŭnika-mužčyny

Jak piša The Wall Street Journal, u pačatku studzienia OpenAI, lidar u śfiery štučnaha intelektu, razarvała kantrakt z Rajan Bajermajstar — vice-prezidentkaj, jakaja ŭznačalvała kamandu pa praduktovych palitykach. Pad «praduktovymi palitykami» majucca na ŭvazie praviły i normy, jakija rehulujuć, jak karystalniki mohuć vykarystoŭvać pradukty OpenAI —naprykład, ChatGPT, GPT-madeli, API, GPT Store, Sora dy inšyja servisy.

Pavodle słoŭ ludziej, znajomych ź situacyjaj, pra zvalnieńnie top-mieniedžarka daviedałasia paśla adpačynku.

Kiraŭnictva patłumačyła, što rašeńnie ab spynieńni pracoŭnych adnosin źviazana z seksualnaj dyskryminacyjaj ź jaje boku ŭ dačynieńni da adnaho z kaleh-mužčyn. Heta davoli niezvyčajnaja pryčyna dla zvalnieńnia. Na hety momant kankretnyja detali taho, što mienavita jana zrabiła ci skazała, nie razhałošvajucca. 

Sama Bajermajstar abviarhaje hetyja zakidy. U aficyjnaj zajavie jana padkreśliła: «Abvinavačvańnie ŭ tym, što ja kahości dyskryminavała, absalutna chłuślivaje».

U toj ža čas pradstaŭniki OpenAI, addajučy naležnaje jaje prafiesijnym dasiahnieńniam, nastojvajuć, što zvalnieńnie nie maje nijakaj suviazi ź jaje pohladami na palityku kampanii abo ŭnutranymi sprečkami.

Krynicy WSJ unutry kampanii źviazvajuć zvalnieńnie z pryncypovaj pazicyjaj Bajermajstar adnosna budučyni ChatGPT.

Jaje sychod adbyvajecca napiaredadni zapłanavanaha na pačatak hetaha hoda zapusku režymu, jaki dazvolić karystalnikam stvarać u ChatGPT eratyčny kantent z dapamohaj štučnaha intelektu. Hetaja funkcyja, jakaja dapuskaje razmovy na darosłyja i seksualnyja temy dla paŭnaletnich karystalnikaŭ, vyklikała krytyku z boku daśledčykaŭ kampanii. Jany vykazali zdahadku, što seksualny kantent moža ŭzmacnić pačućci niekatorych karystalnikaŭ da ŠI-pierson, jakich jany ŭsprymajuć jak svaich siabroŭ.

Členy kansultatyŭnaj rady pa pytańniach «dabrabytu i štučnaha intelektu», jakuju rehularna sklikaje OpenAI, taksama vykazalisia suprać «režymu dla darosłych» i zaklikali kampaniju pierahledzieć płany pa jaho zapusku.

Pavodle słoŭ ludziej, znajomych ź situacyjaj, Bajermajstar była adnoj ź niekalkich supracoŭnikaŭ OpenAI, chto vykazvaŭ tryvohu z nahody zapusku režymu dla darosłych. Pierad zvalnieńniem jana adkryta papiaredžvała kaleh pra mahčymyja škodnyja nastupstvy hetaha kroku dla karystalnikaŭ. Na jaje dumku, miechanizmy OpenAI pa błakavańni kantentu z ekspłuatacyjaj dziaciej niedastatkova efiektyŭnyja, a kampanija nie zdolnaja nadziejna abaranić padletkaŭ ad kantentu dla darosłych.

Pry hetym, jak zaŭvažaje WSJ, hienieralny dyrektar OpenAI Sem Altman zajmaje inšuju pazicyju. Jon publična adstojvaje pašyreńnie miežaŭ dazvolenaha, zajaŭlajučy, što kampanija pavinna «stavicca da darosłych karystalnikaŭ jak da darosłych». Hetaja stratehija abumoŭlena žorstkaj kankurencyjaj na rynku.

Štotydzień ChatGPT pryciahvaje bolš za 800 miljonaŭ karystalnikaŭ u miežach stratehii OpenAI pa stvareńni samaha daskanałaha štučnaha intelektu. Ciapier kampanija płanuje manietyzavać hetuju aktyŭnaść z dapamohaj rekłamy.

OpenAI uvažliva sočyć za kankurentami i ŭ śniežni abviaściła ŭnutrany «čyrvony ŭzrovień niebiaśpieki» paśla niečakanaha pośpiechu i rostu čat-bota Gemini ad Google. Inšy kankurent, xAI, vyjaviŭ, što bolš svabodnyja praviły vakoł kantentu seksualnaha charaktaru ŭ jaho čat-bocie Grok dapamahli pavialičyć uciahnutaść karystalnikaŭ.

Chto takaja Rajan Bajermajstar?

Bajermajstar pryjšła ŭ OpenAI ŭ siaredzinie 2024 hoda, pierajšoŭšy z Meta (byłoj Facebook). Jana była častkaj chvali top-mieniedžaraŭ, jakija stavili za metu refarmavać technałahičnyja hihanty znutry, robiačy ich bolš etyčnymi.

Akramia svajoj asnoŭnaj pracy, jana aktyŭna zajmałasia karparatyŭnaj kulturaj. U pačatku 2025 hoda Bajermajstar zapuściła ŭ OpenAI prahramu mientarstva dla žančyn. Hetaja inicyjatyva dapamahała supracoŭnicam z roznych adździełaŭ abjadnoŭvacca ŭ hrupy dla abmierkavańnia karjernych stratehij i padtrymki adna adnoj.

• 3
• 2
• 2
• 2
• 0
• 2
• 1
• 0