Ministr justycyi: Rašeńnie ab zabaronie ŭjezdu ŭ Jeŭrasajuz biełaruskich aficyjnych asob — niepravavoje

Rašeńnie ministraŭ zamiežnych spraŭ ES ab zabaronie ŭjezdu ŭ Jeŭrasajuz biełaruskich žurnalistaŭ, sudździaŭ i inšych hramadzian — niepravavoje. Pra heta zajaviŭ ministr justycyi Biełarusi Viktar Hałavanaŭ 11 lipienia padčas anłajn-kanfierencyi na sajcie BiełTA.

Pavodle jaho słoŭ, jano nie adpaviadaje normam jak Kanstytucyi Biełarusi, tak i jeŭrapiejskich dziaržaŭ. Jano taksama nie adpaviadaje asnovatvornym dakumientam AAN, dakumientu Chielsinkskaj narady (Narada pa biaśpiecy i supracoŭnictvie ŭ Jeŭropie). «Majecca na ŭvazie pryncyp nieŭmiašańnia va ŭnutranyja spravy krainy. Apošnim časam pajšła ŭžo takaja tendencyja, naviazanaja niekatorymi palitołahami… Havorycca, što pravy čałavieka — heta nastolki važnaje pytańnie, što, niahledziačy na zhadany pryncyp, možna niejkija sankcyi ŭvodzić. Heta niapravilna», — skazaŭ Hałavanaŭ. Jon padkreśliŭ, što dakumient Chielsinkskaj narady padpisany kiraŭnikami šerahu dziaržaŭ i pavinien vykonvacca.

Hałavanaŭ zaznačyŭ, što pryniaćcie sankcyj — heta, «viadoma, niepryjemna dla našaj krainy i ludziej, suprać jakich uviedzieny hetyja sankcyi». «Naprykład, u Minsku sudździa Frunzienskaha suda adna vychoŭvaje dzicia. Jano chvoraje. Maci chacieła jaho vyvieźci kudy-niebudź na mora, ale joj ža zabaronieny ŭjezd u ES. Parušany pravy jaje dziciaci. Voś heta adychodzić u bok», — skazaŭ jon.

Kamientujučy rezalucyju Parłamienckaj asamblei ABSIE pa Biełarusi, pryniatuju 9 lipienia ŭ Białhradzie, ministr justycyi zajaviŭ: «Vielmi drenna, što pavažanyja parłamientaryi ABSIE i pradstaŭniki inšych struktur biaruć infarmacyju pra našu krainu z peŭnych krynicaŭ. Tam praŭdy nie vielmi šmat…» Na jaho dumku, zabarončyja miery ničoha nie dajuć ni tym krainam, jakija ich uvodziać, ni tym bolš Biełarusi.

«Naadvarot, treba pašyrać dyjałoh, u bolšaj stupieni supracoŭničać, šukać punkty ŭzajemadziejańnia.

Nahadajem, u rezalucyi ŭtrymlivajecca zaklik vyzvalić usich zatrymanych padčas demanstracyi 19 śniežnia 2010 hoda, «jakich treba ličyć palityčnymi źniavolenymi». PA ABSIE «zaklikaje ŭłady spynić pieraśled, zapałochvańnie i represii ŭ dačynieńni da členaŭ apazicyjnych palityčnych partyj u formie zvalnieńniaŭ z pracy i vyklučeńnia z univiersitetaŭ». Aprača taho, Biełaruś zaklikajuć da demakratyzacyi zakanadaŭstva, vykanańnia kanviencyi ab pravach čałavieka, vykanańnia pryncypaŭ ABSIE, a taksama da supracoŭnictva z hetaj arhanizacyjaj.

• 0
• 0
• 0
• 0
• 0
• 0
• 0
• 0