Biez apładysmientaŭ Sierada zhubiła drajv

Sotni pratestoŭcaŭ sabralisia na płoščy Jakuba Kołasa ŭ Minsku. Ludzi vychodzili na Płoščy i ŭ rehijanalnych haradach. Ale kolkaść pratestoŭcaŭ była značna mienšaj, čym pry kancy červienia. Pry adsutnaści apładysmientaŭ akcyi zhubili drajv.

Akcyi, jakija stali samaj jarkaj palityčnaj padziejaj leta, traciać enerhiju. «U ludziej užo niama cikavaści», — napisaŭ u kamientach čytač z Kobryna. Jany prademanstravali niezadavolenaść hramadstva i vymusili łukašenkaŭcaŭ adkryć palicejskaje abličča režymu. Ale masavyja zatrymańni ŭdzielnikaŭ adstrašyli publiku. Kolkaść udzielnikaŭ pačała źmianšacca.

20:55

Siońnia z Žodzina mielisia vyjści asudžanyja za akcyju 3 i 6 lipienia — 49 čałaviek. Sustrakać ich pryjechali kala 30 mašyn. Zatrymanyja pavinny byli vyjści ŭ 19:30, ale ŭ aznačany čas nichto z varot SIZA nie vyjšaŭ, ludziej čakali hadzinu. Znajšlisia jany na čyhunačnym prypynku «Čyrvony Ściah», paviedamiŭ hramadski aktyvist Pavieł Juchnievič.

20:35

Na płoščy Jakuba Kołasa źjaviŭsia pres-sakratar HUUS Minharvykankama Alaksandr Łastoŭski. Žurnalisty pytajucca ŭ jaho, čamu ludzi ŭ cyvilnym pieraškadžali pracy žurnalistaŭ, bili pa rukach i pa fota- i videakamerach? Na pytańnie, chto takija ludzi ŭ cyvilnym, Łastoŭski skazaŭ, što adkazać na hetaje pytańnie nie moža.

Siarod zatrymanych byŭ Andrej Cimašenka. Jon zdoleŭ pazvanić i paviedamić, što jon užo ŭ aŭtazaku. Jahonaja žonka Alesia Žyźnieŭskaja spytała ŭ Ihara Jaŭsiejeva, dzie jaje muž. Jaŭsiejeŭ adkazaŭ, što jon nia viedaje, bo pracuje šmat roznych śpiecsłužbaŭ.

20:26

Tut pa-raniejšamu znachodzicca značnaja kolkaść ludziej — bolš za 300 čałaviek. U centry płoščy — namieśnik načalnika HUUS Ihar Jaŭsiejeŭ.

Źjavilisia milicejskaja infarmacyjnaja hrupa.

20:22

Zatrymanyja jašče čatyry čałavieki. Žurnalistam, kali sprabavali heta zdymać, prosta bili pa rukach, pa kamierach.

20:16

Ludzi patrochu razychodziacca z Płoščy. Ale častka zastałasia. Žurnalistam nastojliva nie rekamiendujuć zdymać. Padčas chapuna ich adhaniali, zakryvali kamiery, sprabavali vyrvać kamiery.

Źjavilisia dźvie hrupy maładych ludziej spartyŭnaha vyhladu pa 15–20 čałaviek, pačali zaciahvać ludziej u aŭtazaki, što stajali za pomnikam Kołasa. Zatrymanyja jak minimum 5 čałaviek.

U Słucku zatrymana žurnalistka Taćciana Husieva.

Na vulicy Jakuba Kołasa, kala kłuba «NŁO», spyniŭsia bieły mikraaŭtobus, ź jakoha vyvieli dvuch maładych chłopcaŭ. Skłałasia ŭražańnie, što heta byli ŭdzielniki akcyi.

20:03

Na Płoščy źjavilisia brytahałovyja, z vyhladu — poŭnaja hapata. Ludzi pačynajuć razychodzicca.

Praśpiekt pierakryty, daišniki pieranakiroŭvajuć mašyny z praśpiekta na bakavyja vulicy.

Padjechaŭ na płošču Jakuba Kołasa aŭtazak, padjazdžajuć jašče dźvie mašyny śpiecsłužbaŭ — minivien i jašče adzin aŭtobus.

Pačalisia zatrymańni, ludziej vychoplivajuć z natoŭpu i vałakuć u mašyny.

20:00

U ludziej, a 20:00 va ŭsich zazvanili mabilniki — u kaho miełodyja, u niekaha — sihnał.

Masava sihnalać aŭtamabilisty. Ale huk mabilnikaŭ byŭ cichi. Uvohule, biez apładysmientaŭ i łozunhaŭ akcyi pieratvarylisia ŭ biaskolernyja, zhubiŭsia drajv, vyklik, jaki byŭ ułaścivy pieršym schodam.

19:58

Na płoščy Jakuba Kołasa — kala 500 čałaviek. Nichchto nie apładziruje. Z maššynaŭ, što prajazdžajuć, danosicca «Pieramien» Viktara Coja.

19:54

Kala «Kastryčnika» zatrymali prynamsi dvuch čałaviek. Kala Doma ŭrada — aŭtobus ź ludźmi cyvilnym i staić supracoŭnik DAI.

Dva aŭtazaki stajać kala kramy «Siemieła», što na rahu praśpiekta Niezaležnaści i vulicy Čyrvonazornaj (za płoščaj Pieramohi).

Zatrymany žurnalist «KP v Biełarusi» ŭ Homieli Pavieł Mickievič.

19:51

Na płoščy Jakuba Kołasa sabrałasia kala 200 čałaviek. Siadziać na łavačkach, hurtujucca vakoł pomnika piśmieńniku. Usie čakajuć 20:00, kali pavinny zazvanić budzilniki na mabilnikach.

19:50

Mašyny niaśmieła sihnalać u rajonie płoščy Jakuba Kołasa. Prajechaŭ matacyklist sa ściažkom i ŭklučanaj pieśniaj «My ždiem pieriemien».

19:45

Ludziej u rajonie płoščy Jakuba Kołasa boleje, siudy ruchajucca taksama ŭdzielniki akcyi ad Akademii navuk.

Nieviadomyja ŭ cyvilnym nie davali źbiracca maładym ludziam kala restarana «Maksi bis».

Kala dvuch dziasiatkaŭ čałaviek, jakija stajali nasuprać budynku kinastudyi «Biełaruśfilm», rušyli na stancyju mietro «Maskoŭskaja».

Uvachod na stancyju «Partyzanskaja» znachodzicca pad nahladam supracoŭnikaŭ milicyi. Milicyja zdymaje usich, chto vychodzić sa stancyi mietro «Akademija navuk» kala kinateatra «Kastryčnik». Źleva ad kinateatra stajać dva ciomna-sinich aŭtobusy biez numaroŭ ź nieviadomymi ŭ cyvilnym.

19:35

Na Jakuba Kołasa vielmi šmat ludziej u cyvilnym. Siadziać na łavačkach, pa dvoje, na adnoj — šaściora. U rajonie Płoščy Jakuba Kołasa pakul usio spakojna. Ludzi mirna prahulvajucca. Ludziej na Płoščy bolš, čym zvyčajna.

Na praśpiekcie pamiž Kołasa i AN, dzie pavinna adbyvacca akcyja (uzdoŭž BNTU, Lido) ludziej u piać razoŭ bolej, čym z adnavarotnaha. Jany iduć u bok płoščy Jakuba Kołasa.

Kala pierachodu, što kala BNTU, asoby ŭ cyvilnym filmujuć na videa. Na pravaj pałasie praśpiekta pavoli ruchajecca sierabrysty «Opiel-Viektra», u im siadziać čaćviora brytahałovych i pahroźliva ŭhladajucca ŭ ludziej na hulańni.

19:24

Kala płoščy Pieramohi adnosna spakojna. Ludzi chodziać tudy-siudy, niahledziačy na kancentracyju supracoŭnikaŭ milicyi i asobaŭ u cyvilnym napružanaści nie adčuvajecca.

U rajonie stancyi mietro «Frunzienskaja» zatrymanyja dva žurnalisty BiełaPAN: Zachar Ščarbakoŭ i videaapieratar Pavieł Padabied.

U rajonie vulicy Daraševiča sustreli pałkoŭnika Ihara Jaŭsiejeva.

Ludzi pakul spakojna chodziać, pieramaŭlajucca.

Kala Akademii navuk na prypynku staić maršrutka «Anharskaja — Ždanovičy», nabitaja daišnikami.

19:22

Na Jakuba Kołasa adnosna spakojna. Stajać u dvarach dva aŭtazaki: u adnym śpiecnaz u formie, u druhim — ludzi ŭ cyvilnym, hetyja hulajuć

u karty.

Ale acanić kolkaść udzielnikaŭ akcyi niemahčyma, ich ciažka adroźnić ad hradžanaŭ paśla rabočaha dnia.

Kala kinateatra «Kastryčnik» šmat ludziej u cyvilnym i supracoŭnikaŭ DAI. Ludzi spakojna jaduć marožanaje, ruch nie pierakryvajecca, zatrymańniaŭ niama.

19:15

Kala «Ryhi» narodu amal niama, pieryjadyčna pa Surhanava prajazdžaje milicejskaja mašyna. Kala «Ryhi» hurtujucca typy ŭ cyvilnym. Asoby ŭ cyvilnym prysutničajuć va ŭsich raniej abvieščanych miescach zboru ludziej, a taksama ŭ rajonie Kastryčnickaj płoščy. Ich kolkaść dasiahaje časam dziasiatkaŭ čałaviek u adnym punkcie.

19:12

Na praśpiekcie Niezaležnaści, ad stancyi mietro «Płošča Pieramohi» da «Akademii navuk» praz peŭnyja adlehłaści stajać asoby ŭ cyvilnym pa dvoje.

19:03

Na «Niamizie» adnosna spakojna. Ludziej vobmal. U asnoŭnym ludzi śpiašajucca na transpart. Čałaviek u cyvilnym prosić «nie stvarać natoŭp» i žartuje ŭ bok prysutnych žurnalistaŭ: «Vy jašče tut? Darma. Usie ŭžo na Akademii navuk».

18:58

Kala «Karony» sabrałasia kala 20 čałaviek, jany nie abjadnoŭvajucca pakul, stajać hrupami pa dva-try čałavieki. Prajechała mima mašyna, ź jakoj danosiłasia pieśnia «Pieramien» Coja. Cichary pakul siabie nie vyjaŭlajuć.

Kala Jeŭrapiejskaha na st. mietro «Maskoŭskaja» źjaviŭsia aŭtobus, kala jakoha chodziać ludzi ŭ milicejskaj formie i ŭ cyvilnym.

18:40

A voś na «Kastryčnickaj» chłopaj nie chaču. Płošča svabodnaja, milicyja niama. Chodziać paru asobaŭ u cyvilnym (adzin u ružovaj kašuli), ale asabliva nikomu nie nazalajuć. Praŭda, kala Pałaca prafsajuzaŭ lažać turnikiety. Z boku vulicy Enhielsa zabaroniena stajanka transpartnych srodkaŭ.

Zatoje pavyšanaja kancentracyja milicyi nazirajecca ŭ rajonie Płoščy Pieramohi.

Ludźmi ŭ formie i cyvilnym patrulujucca vychady ź pierachodaŭ stancyj mietro «Płošča Pieramohi», «Płošča Jakuba Kołasa», «Akademija navuk». Na stajancy kala Nacyjanalnaj akademii navuk staić aŭtobus ź nieviadomymi ŭ cyvilnym i mikraaŭtobus ź ludźmi ŭ formie supracoŭnikaŭ milicyi, paviedamlaje BiełaPAN. Na Akademičnaj pryparkavany aŭtobus PAZ biez numaroŭ ź nieviadomymi ŭ cyvilnym, jakija hulajuć u karty.

Aŭtobusy znachodziacca taksama pa abodvuch bakach płoščy Jakuba Kołasa.

18:35

Kala handlovaha doma «Rahnieda» na Niamizie staić samotny aŭtazak, niekalki charakternych maładych ludziej stajać na hanku carkvy na Niamizie. Ale pakul usio cicha.

Kala HC «Jeŭrapiejski» na stancyi mietro «Maskoŭskaja» taksama adnosna spakojna — stajać asoby ŭ cyvilnym.

Kala hipieramarkieta «Karona» staić kala 10 čałaviek, zusim nie padobnych na šarahovych pakupnikoŭ.

Kala «Ryhi» na Surhanava taksama pakul usio spakojna. Praŭda, zaŭvažanyja niekalki čałaviek u formie i ŭ cyvilnym.

Supracoŭniki pravaachoŭnych orhanaŭ raźmiaścilisia pierad univiermaham «Biełaruś» na Partyzanskim praśpiekcie, u budynku i za im. Niekatoryja ź ich u formie, niekatoryja — u cyvilnym. Za budynkam «Biełarusi» ŭ aŭtobusie MAZ znachodziacca supracoŭniki ŭ milicejskaj formie i cyvilnaj.

18:23

U internecie źjaviłasia infarmacyja, što niekalki stancyjaŭ mietro ŭ centry Minska buduć začynienyja. Pakul mietro pracuje.

18:10

Milicyja pačynaje brać pad kantrol miescy zboru ŭdzielnikaŭ akcyi na rajonach.

18:06

Šmat miliicyi zaŭvažana ŭ rajonie Płoščy Pieramohi, za mahazinam Tom Tejłar.

17:58

Praśpiekt Niezaležnaści pakrysie zakryvajecca milicyjaj, siam-tam zaŭvažanyja aŭtazaki.

17:43

A 17:30 u Biełarusi pierastaŭ hruzicca sajt sacyjalnaj sietki «Vkontaktie». Mienavita tam raźmieščanaja supołka «Revalucyja praz sacyjalnuju sietku», jakaja arhanizuje štosieradavyja akcyi pratestu ŭ Minsku i rehijonach.

***

Pavodle arhanizataraŭ, u Minsku akcyja znoŭ, jak tydzień tamu, padzielicca na niekalki punktaŭ.

Pieršym čynam arhanizatary prosiać źbiracca z 18:30 da 19:00 u handlovych centrach svajho rajona, dzie prosta hulać, jeści. Śpis handlovych centraŭ pryvodzicca. Zbor u ludnych miescach rajonaŭ udzielniki minuły raz paličyli vialikaj udačaj dla prapahandy idej pratestu.

Paśla ludziej prosiać ruchacca da mietro, i jechać na stancyi «Płošča Pieramohi» i «Akademija navuk». A tam hulać pa praśpiekcie.

Arhanizatary prosiać nie chłopać, kali heta stvaraje ryzyki zatrymańnia. Zatoje, «kab usio ŭdałosia, stavim budzilnik na mabilniku na 20:00».

U toj čas, jak zahučać budzilniki, akcyja ličacca skončanaj.

Źmianilisia miescy sustrečy i ŭ abłasnych centrach. U Breście, naprykład, prosiać sustrakacca la CUMa, u Homieli — kala ŭniviermaha, a ŭ Hrodnie — na płoščy la aŭtavakzała. Dla rajonnych centraŭ usio bieź źmienaŭ.

***

Na raniejšyja maŭklivyja akcyi — 8, 15, 22, 22, 29 červienia, 3 i 6 lipienia — vyjšli sotni i navat tysiač ludziej u roznych rajonach i haradach. Pra Narodnyja hulańni pratestu paviedamlali najbolšyja suśvietnyja ŚMI.

Łukašenkaŭcy hetymi hulańniami strašna razdražnilisia, prapahanda prykładaje ŭsie vysiłki, kab ich dyskredytavać.

Hetyja mirnyja i viasiołyja akcyi pratestu sarvali šyrmu ŭsienarodnaj padtrymki režymu. Udzielniki pratestaŭ u maŭklivaj ci apładysmientavaj formie vykazvajuć svajo žadańnie ekanamičnych i sacyjalnych pieramien u krainie, dzie ŭžo 17 hadoŭ adnaasobna kiruje Alaksandr Łukašenka.

Apošnija akcyi byli žorstka padaŭlenyja. Za ŭvieś čas byli zatrymanyja 1 730 čałaviek, častka pakaranyja štrafami i sutkami. Zaznali pieraśled i žurnalisty. U čas akcyj byli zatrymanyja 77 žurnalistaŭ.

• 0
• 0
• 0
• 0
• 0
• 0
• 0
• 0