Da vybaraŭ u miascovyja saviety zastałosia čatyry dni, a apazycyja nia vyznačyłasia, što rabić
Kamentar Redakcyi.
14 studzienia ŭ Biełarusi majuć prajści vybary ŭ miascovyja saviety. Adnak lidery demakratyčnaj apazycyi tak i nie dali jasnaha adkazu, što rabić vybarcam u hety dzień.
Rašeńnie moža być lubym: iści na vybary i hałasavać tam, dzie ŭ śpisie jość apazycyjnyja kandydaty, i hałasavać suprać usich tam, dzie niama alternatyvy; abo bajkatavać vybary. Ale musić być ćviordaja, adzinaja pazycyja ŭsiaho niezaležnaha hramadztva.
U abstavinach, kali niedziaržaŭnyja ŚMI niedastupnyja bolšaści hramadzianaŭ, pryncypovyja pasłańni farmulavać jak minimum za miesiac da padziei, kab ludzi paśpieli pieradać ich z vusnaŭ u vusny.
Precedent ź nievykazvańniem jasnaj pazycyi ŭžo byŭ dva hady tamu, pierad referendumam 2004 h. Kiraŭniki apazycyi tak kančatkova nia vyznačylisia, što rabić 17 kastryčnika. Bajkatavać referendum, iści na vybary, zabirać biuleteń, a kali zabirać, to što ź im rabić i jak rezać. Vynik my viedajem.
Pryčyna zaciažak i niapeŭnaściaŭ zrazumiełaja. Heta adsutnaść u apazycyi dakładnaha mechanizmu pryniaćcia rašeńniaŭ. Jon moža źjavicca, kali lider budzie nadzieleny paŭnamoctvami i nahružany adkaznaściu i kali buduć pryniatyja inšyja dyscyplinujučyja ramki. Palityčnaja rada nia moža padmianić lidera. Hety niepavarotlivy orhan moža dva tydni rychtavać pazycyju Demakratyčnych siłaŭ u hazavym kanflikcie i paśla jašče tydzień uzhadniać tekst. I nichto ni za što nie adkazvaje, i niama z kaho spytacca. Viačorka kivaje na Labiedźku, Labiedźka na Viačorku.
Biełaruskaja apazycyja jadnaje sumlennych ludziej, dobrych specyjalistaŭ. Jany zdolnyja nastolki ž efektyŭna kiravać krainaj, jak ich estonskija ci słavackija kalehi. Adnak palityčny efekt ichnaje achviarnaje dziejnaści vysiłki časta nizki praz elementarnuju adsutnaść dyscypliny.
Razumnych historyja vučyć, nierazumnych mučyć, kaža prymaŭka.
Hetaja dziaŭčyna vyjšła ŭ centry Hrodna z płakatam «Nie vajnie». Jana raskazała, što pieražyła paśla6
Kamientary